ء«وڭىر-ورتالىق» روتاتسيا نەگىزىندە وبلىس اكىمىنىڭ ءبىرىنشى ورىنباسارى يگور ستەكسوۆ قازاقستان رەسپۋبليكاسى پرەزيدەنتى اكىمشىلىگى مەملەكەتتىك باقىلاۋ جانە اۋماقتىق-ۇيىمداستىرۋ جۇمىسى ءبولىمىنىڭ مەملەكەتتىك ينسپەكتورى قىزمەتىنە اۋىستى.
التاي كولگىنوۆ بۇرىنعى وبلىس اكىمىنىڭ ءبىرىنشى ورىنباسارىنىڭ ءوڭىردىڭ الەۋمەتتىك-ەكونوميكالىق دامۋى جولىنداعى جەمىستى جۇمىسىن اتاپ ءوتىپ, جاڭا قىزمەتتە تابىس تىلەدى.
قازاقستان رەسپۋبليكاسى پرەزيدەنتى اكىمشىلىگى كەلىسىمىمەن باتىس قازاقستان وبلىسى اكىمىنىڭ ءبىرىنشى ورىنباسارى بولىپ تاعايىندالعان عالي يسقاليەۆ – 1970 جىلى تۋعان, ءبىلىمى جوعارى, باتىس قازاقستان اگرارلىق ۋنيۆەرسيتەتىن «ەكونوميكا», حالىقارالىق بيزنەس اكادەمياسىن «مەنەدجمەنت» ماماندىقتارى بويىنشا بىتىرگەن. ءار جىلدارى «تۇران-الەم بانك» اق ورال قالاسىنداعى فيليالىندا مامان, ءبولىم باسشىسى, «تەمىربانك» اق فيليالىنىڭ ديرەكتورى, بقو كاسىپكەرلىكتى قولداۋ جانە دامۋ دەپارتامەنتىنىڭ ديرەكتورى, «قازاقستان دامۋ بانكى» اق اتقارۋشى ديرەكتورى, ۆيتسە-پرەزيدەنتى, باسقارما توراعاسى, جامبىل وبلىسى اكىمىنىڭ ورىنباسارى, اقتوبە وبلىسى اكىمىنىڭ ورىنباسارى, استانا قالاسى اكىمدىگى قالالىق ورتانى رەگەنەراتسيالاۋ باسقارماسىنىڭ باسشىسى بولىپ جۇمىس ىستەگەن.
ايتا كەتەيىك, عالي يسقاليەۆتىڭ اكەسى ەسقاليەۆ ناجىمەدەن ىقسان ۇلى 1986 جىلدان 1993 جىلعا دەيىن ورال (قازىرگى باتىس قازاقستان) وبلىسىن باسقارعان بولاتىن.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان وبلىسى
