بولگاريالىق مامان ۇلتتىق قۇراماداعى ورنىن كلۋب باپكەرلىگىنە اۋىستىرادى. SPORTINFORM سايتىنىڭ جازۋى بويىنشا ستويلوۆ شىمكەنتتىڭ «ورداباسى» كومانداسىن قاڭتار ايىنىڭ سوڭىنا قاراي جاتتىقتىرماق. ال «ورداباسىنىڭ» قازىرگى باپكەرى كاحابەر تسحادادزە جاقىن ارادا قىزمەتىنەن كەتۋى مۇمكىن. دەرەككوزدىڭ اقپاراتى بويىنشا ستانيمير ستويلوۆتىڭ «ورداباسى» كلۋبىنا كەلۋىن «استانانىڭ» ەكس-باسشىسى سايان حاميتجانوۆ شىمكەنتتىك كوماندانىڭ پرەزيدەنت كەڭەسشىسى بولعانىمەن بايلانىستىرادى.
ستويلوۆ قازاقستاندا 2014 جىلدان بەرى جۇمىس ىستەيدى. ونىڭ باسشىلىعىمەن «استانا» كلۋبى ءتورت رەت ەل چەمپيونى اتانىپ, چەمپيوندار ليگاسىنىڭ جانە ەۋروپا ليگاسىنىڭ توپتىق كەزەڭىندە وينادى. 2018 جىلدىڭ ناۋرىز ايىنان بەرى قازاقستان ۇلتتىق قۇراماسىن جاتتىقتىرىپ كەلەدى.
«ورداباسى» ەل چەمپيوناتىنىڭ بىلتىرعى ماۋسىمىندا ءتورتىنشى ورىن يەلەنىپ, ەۋروپا ليگاسىنىڭ ىرىكتەۋ كەزەڭىندە ويناۋعا مۇمكىندىك العان ەدى.
