2020 جىلعى ەۋروپا چەمپيوناتىنىڭ ىرىكتەۋ كەزەڭى قارساڭىندا قازاقستان قۇراماسى العاشقى وقۋ-جاتتىعۋ جيىنىن 15-22 اقپان ارالىعىندا تۇركيادا وتكىزەدى. 21 اقپان كۇنى مولدوۆا قۇراماسىمەن جولداستىق ماتچ بەلگىلەنگەن.
2018 جىلدىڭ جەلتوقسان ايىنداعى فيفا رەيتينگى بويىنشا مولدوۆا قۇراماسى 170-ورىندا تۇر. ال قازاقستان 119-ورىنعا جايعاسقان. بۇگىنگە دەيىن ەكى قۇراما جاسىل الاڭدا ءتورت رەت كەزدەسكەن. ءبىر ويىندا قازاقستان قۇراماسى جەڭىسكە جەتسە, ەكى ويىندا مولدوۆا فۋتبولشىلارى باسىم تۇسكەن. ال ءبىر ويىن تەڭ ناتيجەمەن اياقتالعان. ءبىر قىزىعى, ويىنداردىڭ ءبارى جولداستىق كەزدەسۋ اياسىندا وتكەن. قازاقستان مەن مولدوۆا فۋتبولشىلارى ءالى كۇنگە دەيىن رەسمي ماتچ وتكىزبەگەن. 21 اقپانداعى كەزدەسۋ ەكى قۇراما اراسىنداعى بەسىنشى جولداستىق ماتچ بولماق.
وقۋ-جاتتىعۋ جيىنىنا شاقىرىلاتىن فۋتبولشىلاردىڭ ءتىزىمى كەيىن حابارلانادى.
ءالي بيتورە,
«ەگەمەن قازاقستان»
