جەلتوقسان ايىندا ەلىمىزدە مەرەكەلەر قاراسى جەتكىلىكتى. وسى ۇرىمتال ءساتتى پايدالانىپ, دەمالىس كۇندەرى ستۋدەنتتەر ۇيلەرىنە اسىعادى, اۋىلداعى اعايىن قالاعا, قالالىقتار اۋىلعا جول تارتىپ, جولاۋشىلار اعىنى كۇرت كوبەيەتىنى زاڭدىلىق. تيىسىنشە, ەڭ قولجەتىمدى ءارى سەنىمدى كولىك پويىز بولعاندىقتان, تاسىمالداۋشىلاردىڭ جۇكتەمەسى ارتا تۇسەدى. الايدا, ءدال بۇگىندە سول پويىزداردا جەكەلەگەن وڭىرلەرگە بيلەت اتىمەن جوق, بارىنىڭ باعاسى شارىقتاپ كەتتى. بۇل – جىلدا قايتالاناتىن, جولاۋشىلاردىڭ قالتاسىن قاعاتىن قۇبىلىس.
ماسەلەن, استانا مەن اقتوبەنىڭ اراسى 1,5 مىڭ شاقىرىمنان اسپايدى. ال بۇل وڭىرگە جىل سوڭىندا پويىزعا بيلەت تاپشى. ارينە بيلەت ونلاين ساتىلاتىن رەسمي سايتتاردا استانا مەن ورالدىڭ اراسىندا جۇرەتىن «تالگو» پويىزدارىنا ساناۋلى بيلەت تۇر. بىراق باعاسى قىمباتتاپ كەتكەن.
ايتالىق, №095تس «استانا نۇرلى جول» – «ورال» باعىتىنداعى پويىزدىڭ 29 جەلتوقسان كۇنگى اقتوبەگە دەيىنگى ەڭ ارزان (!) بيلەت قۇنى – 35 138 تەڭگە. ال ەڭ جايلى ورىن – 58 540 تەڭگە. ءيا, قالىپتى كۇندەرى ۇشاق بيلەتىنىڭ ءوزىن بۇدان ارزانعا ساتىپ الۋعا بولاتىندىعىن ەسكەرسەك, «جولاۋشىلار تاسىمالى» اكتسيونەرلىك قوعامى ۇسىنعان باعالار قاراپايىم حالىق ءۇشىن جاعا ۇستاتارلىق جاعداي. اقتوبەدەن ارىداعى ورالعا دا ءدال وسىنداي باعا بەلگىلەنگەن. باسقا باعىتتاردا دا باعا اسپانداپ تۇر.
كۇنى كەشە «facebook» الەۋمەتتىك جەلىسىندە يرينا بەسپاەۆا ەسىمدى قولدانۋشى 31 جەلتوقسان كۇنى استانا-پەتروپاۆل باعىتىنداعى بيلەت باعاسى ادەتتەگى 5 مىڭ تەڭگەدەن 14 مىڭ تەڭگەگە دەيىن كوتەرىلىپ كەتكەندىگىن جازدى. ەكى قالانىڭ ارا قاشىقتىعى 500 كيلومەتردىڭ شاماسىندا ەكەندىگىن ەسكەرسەك, باعانىڭ ءۇش ەسەدەي قىمباتتاۋىنا نە سەبەپ؟!
وسى جاعدايعا بايلانىستى «جولاۋشىلار تاسىمالى» اق تاراپىنان رەسمي جاۋاپ الدىق.
كومپانيانىڭ كليەنتتەرمەن جانە بۇقارالىق اقپارات كوزدەرىمەن جۇمىس اتقارۋ باعىتىنىڭ جەتەكشىسى دانيار ايدارحانوۆتىڭ ايتۋىنشا, كوممەرتسيالىق باعىتتارداعى بيلەت باعاسى سۇرانىسقا ساي وسە بەرۋى مۇمكىن جانە وعان ەشقانداي شەكتەۋ بولمايدى. جالپى, كوممەرتسيالىق پويىزدار بارلىق قۇرامنىڭ 20 پايىزىن قۇرايدى ەكەن.
– زاڭ بويىنشا كوممەرتسيالىق باعىتتارعا باعانى بەلگىلەۋ ءوز قۇقىعىمىزدا. سوندىقتان وسىنداي باعىتتارداعى بيلەت ازايعان سايىن, سۇرانىس كوبەيگەن سايىن قىمباتتاپ, باعا 35 پايىزدان دا اسىپ كەتەدى. كوممەرتسيالىق باعىتتارعا ساتىلاتىن بيلەتتەردەن تۇسكەن قارجى تىكەلەي كومپانيانىڭ دامۋىنا, جاڭا سەرۆيستىك قىزمەتتى ەندىرۋگە, بارلىق ۆاگوندار پاركىن تەحنيكالىق جاراقتاندىرۋدى جاقسارتۋعا جانە پروتسەستەردى اۆتوماتتاندىرۋعا باعىتتالادى, – دەيدى د.ايدارحانوۆ.
وسى رەتتە كومپانيا وكىلى پويىز بيلەتتەرىنىڭ 45 كۇن بۇرىن ساتىلىمعا شىعارىلاتىندىعىن جانە ەرتەرەك الىنعان بيلەتتىڭ ارزان بولاتىندىعىن اتاپ ءوتتى.
– قازىر كوپ باعىتتارعا بيلەتتەر جوق. ويتكەنى جولاۋشىلار الدىن الا ساتىپ العان. بۇل تەك بيىلعى احۋال ەمەس. سونىڭ وزىندە كومپانيا تاراپىنان جەلتوقسان ايىنداعى مەرەكەلەر قارساڭىندا قوسىمشا 250 ۆاگون شىعارىلدى. سول ارقىلى قوسىمشا 45-50 مىڭداي جولاۋشىنى ارتىعىمەن تاسىمالداۋعا مۇمكىندىك تۋدى. ۆاگوندار پاركى 100 پايىز قولدانىستا, – دەيدى «جولاۋشىلار تاسىمالى» اق وكىلى.
د.ايدارحانوۆتىڭ ايتۋىنشا, جۋىردا عانا قوستاناي – الماتى باعىتىندا قوسىمشا ءۇش رەيس شىعارىلعان. جالپى, 2018 جىلدىڭ 11 قىركۇيەگىنەن «جولاۋشىلار تاسىمالى» اق ەلىمىزدىڭ بارلىق ىشكى باعىتتارىنداعى باعانى رەتتەۋدىڭ يكەمدى جۇيەسىن ەنگىزگەنىن ايتادى. باعالاردى رەتتەۋدىڭ يكەمدى جۇيەسى ديناميكالىق تاريفتىك باسقارۋ باعدارلاماسى بويىنشا قولدانىسقا الىنعان. بۇل كوپتەگەن اۋە جانە جەر ءۇستى تاسىمالداۋشىلار جۇمىسىندا كەڭىنەن قولدانىلاتىن الەمدىك تاجىريبە. ءبىر سوزبەن ايتقاندا, جونەلتۋ كۇنى جاقىنداعان سايىن بيلەت باعاسى دا وسە تۇسپەك.
قالاي دەسەك تە, شۇعىل جولعا شىعۋعا ءماجبۇر جولاۋشى دىتتەگەن جەرىنە جەتۋگە پويىز كولىگىن تاڭدار بولسا, قالتاسىنىڭ ءتۇبى كورىنىپ قالۋى مۇمكىن. الىس-بەرىس, بارىس-كەلىستەرى دەمالىس, مەرەكە كۇندەرى جانداناتىن حالقىمىز ءۇشىن «جولاۋشىلار تاسىمالى» اق قولدانىپ وتىرعان الەمدىك تاجىريبە قولايسىزدىق تۋدىرۋدا.
سەرىك ابدىبەك,
«ەگەمەن قازاقستان»
