كوميتەت توراعاسى اسقار بەيسەنباەۆ كەزدەسۋدى اشا كەلىپ, تۇرعىن ءۇي-كوممۋنالدىق شارۋاشىلىقتىڭ ءتيىمدى جۇمىس ىستەۋى قازاقستاندىقتار ءۇشىن ماڭىزدى ماسەلەلەردىڭ ءبىرى ەكەنىن اتاپ ءوتتى.
وسىعان بايلانىستى تۇرعىن ءۇي-كوممۋنالدىق شارۋاشىلىق سالاسىنداعى زاڭنامانى ودان ءارى جەتىلدىرۋ قاجەت. ينۆەستيتسيالار جانە دامۋ مينيسترلىگى ازىرلەگەن تۇرعىن ءۇي-كوممۋنالدىق شارۋاشىلىق سالاسىن رەتتەيتىن ءتيىستى زاڭ جوباسى پارلامەنتتىڭ قاراۋىنا تۇسكەن بولاتىن.
ينۆەستيتسيالار جانە دامۋ ءمينيسترىنىڭ ورىنباسارى قايىربەك وسكەنباەۆ دەپۋتاتتارعا تۇرعىن ءۇي-كوممۋنالدىق شارۋاشىلىعى سالاسىنداعى جوسپارلانىپ وتىرعان رەفورمالاردى تانىستىردى. الداعى اۋقاتتا ء«بىر ءۇي – ءبىر مەنشىك يەلەرىنىڭ بىرلەستىگى – ءبىر شوت» سەكىلدى كوپ پاتەرلى تۇرعىن ۇيلەردى باسقارۋ ۇلگىسى ۇسىنىلاتىن بولادى. بۇل تۇرعىندارعا قارجىنى تەك وزدەرىنىڭ ۇيلەرىنىڭ كۇردەلى جوندەۋ جۇمىستارىنا جيناقتاۋعا, سونىمەن قاتار قارجىلاردىڭ ءتۇسىمىن جانە ولاردىڭ ماقساتتى جۇمسالۋىن باقىلاۋعا مۇمكىندىك بەرەدى.
سەناتور ءالىمجان قۇرتاەۆ تۇرعىن ءۇي-كوممۋنالدىق شارۋاشىلىعى سالاسىندا ورىن العان ماڭىزدى ماسەلەلەرگە توقتالدى. ول تاريف قالىپتاستىرۋ ءۇردىسىنىڭ اشىق ەمەستىگى, اپاتتى تۇرعىن ۇيلەردىڭ شامادان تىس كوپتىگى, تۇرعىن ءۇي باسقارۋ ورگاندارى جۇمىسىنىڭ ناشارلىعى مەن قىزمەت ساپاسى دەڭگەيىنىڭ تومەندىگى, رەسۋرس ۇنەمدەۋدى ىنتالاندىرۋ مەن جاڭا تەحنولوگيالاردى ەنگىزۋ مەن تۇرعىن ءۇي باسقارۋ ورگاندارىنا اسەر ەتۋ تەتىكتەرىنىڭ جوقتىعى سەكىلدى ماسەلەلەردى ءاتاپوتتى.
كەزدەسۋگە "قازاقستان قۇرىلىس جيناق بانكى" اق باسقارما توراعاسىنىڭ ورىنباسارى جانار جۇبانيازوۆا, تابيعي مونوپوليانى رەتتەۋ, باسەكەلەستىكتى جانە تۇتىنۋشىلاردىڭ قۇقىقتارىن قورعاۋ كوميتەتى توراعاسىنىڭ ورىنباسارى اسان دارباەۆ, سولتۇستىك-قازاقستان وبلىسى اكىمىنىڭ ورىنباسارى انتون فەدياەۆ, «تكش قازورتالىعى» اق باسقارما توراعاسىنىڭ ورىنباسارى مەيىرجان مايكەنوۆ, «رەسپۋبليكالىق پاتەر مەن ءۇي-جاي يەلەرى كووپەراتيۆتەرىنىڭ اسسوتسياتسياسى» زاڭدى تۇلعالار بىرلەستىگىنىڭ ۆيتسە-پرەزيدەنتى شاميدەن تاپاەۆ ءسوز سويلەدى.
كەزدەسۋگە قاتىسۋشىلار ەلىمىزدىڭ تۇرعىن ءۇي قورىنىڭ جاعدايىن, ۇيلەردى كۇردەلى جوندەۋدەن وتكىزۋدى قارجىلاندىرۋ, پاتەر يەلەرى جيناعان قارجىنى جۇمساۋدىڭ اشىقتىعى جانە تاعى باسقا ماسەلەلەردى تالقىعا سالدى.
كەزدەسۋ قورىتىندىسى بويىنشا قازاقستان رەسپۋبليكاسى تۇرعىن ءۇي-كوممۋنالدىق شارۋاشىلىعى سالاسىن ءتيىمدى قولداۋ جانە ودان ارى دامىتۋ شارالارى ازىرلەنەتىن بولدى.
