وسى ورايدا مادەنيەت جانە سپورت مينيسترلىگى ەلباسىنىڭ «بولاشاققا باعدار: رۋحاني جاڭعىرۋ» ماقالاسىندا ايتىلعان باعدارلامالىق جوسپاردى جۇزەگە اسىرىپ, جوعارىداعى ۇلى دالانىڭ قۇندى مۇرالارىن الەمگە تانىستىرۋ ماقساتىندا وتكەن جىلدىڭ جەلتوقسان ايىنان باستاپ «التىن ادامنىڭ الەم مۋزەيلەرىنە شەرۋى» اتتى شارا ۇيىمداستىرعان بولاتىن.
شەرۋ-جوبا اياسىندا مىڭعا جۋىق قۇندى جادىگەرىمىز مينسك قالاسىنداعى بەلارۋس ۇلتتىق كوركەمونەر مۋزەيى, ماسكەۋ قالاسىنداعى بۇكىلرەسەيلىك قولدانبالى-ساندىك جانە حالىقتىق ونەر مۋزەيى, باكۋدەگى ازەربايجان تاريحى ۇلتتىق مۋزەيى, قىتاي ەلىندەگى شەنسي پروۆينتسياسىنىڭ تاريح مۋزەيى, گدانسك قالاسىنداعى پولياك تاريحي مۋزەيى, كورەيا ۇلتتىق مۋزەيى قاتارلى مەكەمەلەردى ارالاپ شىققان ەكەن.
كەشە الەمدى شارلاپ شىققان التىن ادامدار مەن قۇندى بۇيىمدار كورمە جوباسىن قورىتىندىلاۋ ماقساتىندا مادەنيەت جانە سپورت مينيسترلىگى مەن ۇلتتىق مۋزەي اكىمشىلىگى ءباسپاسوز ءماسليحاتىن وتكىزدى. كەلەلى كەزدەسۋدىڭ ماڭىزى جايلى ايتىپ, ءسوز سويلەگەن مينيستر ارىستانبەك مۇحامەدي ۇلىنىڭ ايتۋىنشا, ۇلى دالانىڭ ەجەلگى جانە ءداستۇرلى ونەر تۋىندىلارىن الەمنىڭ الدىڭعى قاتارلى مۋزەيلەرىندە كورسەتۋ ارقىلى ءبىز ەلىمىزدىڭ تامىرى تەرەڭ تاريحىن, باي مادەنيەتى مەن تەڭدەسسىز قولونەرىن پاش ەتۋ, ناسيحاتتاۋ ءىسىن ءساتتى اياقتاپپىز. ياعني, كورمەنى 200 مىڭنان استام ادام كەلىپ تاماشالاپتى.
جوعارىداعى الەمنىڭ التى ەلىن ارالاپ شىققان جادىگەرلەرگە كەلسەك, بۇلاردىڭ دەنى ەرتە تەمىر داۋىرىندە ءومىر سۇرگەن العاشقى دالالىق مەملەكەتتەر مۇراسى سانالاتىن اڭ ستيلىندەگى بۇيىمدار ەكەن, سونىمەن قاتار قازاقتىڭ ءداستۇرلى مادەني جاۋھارلارى سانالاتىن ساندىك قولدانبالى ونەر تۋىندىلارى دا بار. حالىقارالىق كورمەنىڭ وتۋىنە اتسالىسۋشىلاردىڭ ءبىرى ۇلتتىق مۋزەي جانىنان قۇرىلعان «حالىق قازىناسى» عىلىمي-زەرتتەۋ ينستيتۋتىنىڭ جەتەكشىسى اقان وڭعار ۇلىنىڭ پايىمىنشا, ۇلى دالا مادەنيەتىنىڭ ءاربىر جادىگەرىنە تەرەڭ ماعىنالى دالالىق ءپالساپا سىڭىرىلگەن, سول سەبەپتى عاسىردان-عاسىرعا جالعاسقان ۇرپاق ساباقتاستىعىن شەتەلدەرگە تانىتۋىمىز ۇلكەن ءىستىڭ باستاۋى كورىنەدى.
باسقوسۋدىڭ سوڭى قازاقستاندىق جانە شەتەلدىك مۋزەي ماماندارىنىڭ پىكىر الماسۋىنا ۇلاسىپ, ءوز كەزەگىندە ازەربايجان تاريحى ۇلتتىق مۋزەيى ديرەكتورىنىڭ ورىنباسارى ماحفۋزا زەينالوۆا, بۇكىلرەسەيلىك قولدانبالى-ساندىك جانە حالىقتىق ونەر مۋزەيىنىڭ كەڭەسشىسى گالينا اندرەەۆا, بەلارۋس ۇلتتىق كوركەمونەر مۋزەيى ديرەكتورىنىڭ ورىنباسارى سەرگەي ۆەچەر, قىتاي ەلىنەن كەلگەن مۋزەي مامانى ۆان چجينسۋن, كورەيا ۇلتتىق مۋزەيىنىڭ ازيا ونەرى دەپارتامەنتىنىڭ ديرەكتورى چوي سەون دجۋ, ەلىمىزدىڭ تانىمال ارحەولوگى زەينوللا ساماشەۆتار ءوز ويلارىن ورتاعا سالدى.
بەكەن قايرات ۇلى,
«ەگەمەن قازاقستان»
