اۋەلى وبلىس اكىمى اسقار مىرزاحمەتوۆ بۇگىندە ەلىمىزدە جاستارعا پاتريوتتىق تاربيە بەرۋ ەرەكشە قارقىن العانىن, بۇل ماسەلەگە قاتىستى ەلباسى جولداۋىندا جان-جاقتى ايتىلعانىن اڭگىمەلەدى. ال مينيستر نۇرلان ەرمەكباەۆ ءوز سوزىندە ەلباسى جولداۋىندا ايتىلعان تاپسىرماعا وراي, ەلىمىزدە «جاس سارباز» بالالار مەن جاسوسپىرىمدەر اسكەري-پاتريوتتىق قوزعالىسى» رەسپۋبليكالىق قوعامدىق بىرلەستىگى قۇرىلعانىن, اتالعان شاراعا پرەزيدەنتتىڭ ءوزى قاتىسقانىن, ناتيجەسىندە بەلسەندى جۇمىس جۇرگىزىلىپ جاتقانىن ايتتى.
سونىمەن قاتار, مينيستر تاراز قالاسىنداعى «جەڭىس» ساياباعى جاستارعا پاتريوتتىق تاربيە بەرەتىن ەرەكشە ورتالىق ەكەنىن ايتا وتىرىپ, وبلىس اكىمىنە وبلىستا «جاس سارباز» بالالار مەن جاسوسپىرىمدەر اسكەري-پاتريوتتىق قوزعالىسى» رەسپۋبليكالىق قوعامدىق بىرلەستىگىنىڭ وبلىستىق فيليالىنىڭ ۇيلەستىرۋ كەڭەسىن قۇرۋ جانە اۋداندار مەن اۋىل مەكتەپتەرىندە دە اتالعان بىرلەستىكتىڭ فيليالىن اشۋ, اتالعان فيليالداردى ارنايى فورمامەن, پەداگوگتارمەن, تەحنيكالىق جابدىقتارمەن قامتاماسىز ەتۋ تۋرالى ۇسىنىسىن جەتكىزدى.
اسقار مىرزاحمەتوۆ جامبىل وبلىسى «جاس سارباز» فيليالىن العاشقىلاردىڭ ءبىرى بولىپ قۇرعانىن, ەندىگى ماقسات ەلىمىزدەگى جاڭا دەڭگەيگە كوتەرىلگەن الدىڭعى قاتارلى فيليال بولۋ ەكەندىگىن ايتتى. بۇدان كەيىن «جاس سارباز» بالالار مەن جاسوسپىرىمدەر اسكەري-پاتريوتتىق قوزعالىسى» رەسپۋبليكالىق قوعامدىق بىرلەستىگى جامبىل وبلىستىق فيليالىنىڭ توراعاسى اسحات ولجاباەۆ ءسوز الىپ, بۇگىندە فيليال جۇمىسىنىڭ قارقىندى ەكەنىن, جاستارعا پاتريوتتىق تاربيە بەرۋ ماقساتىندا وڭىردە 20 كلۋب, 14 ۇيىرمە جۇمىس اتقارىپ وتىرعانىن جەتكىزدى.
كەزدەسۋ بارىسىندا قازاقستان رەسپۋبليكاسىنىڭ قورعانىس ءمينيسترى نۇرلان ەرمەكباەۆ, جامبىل وبلىسىنىڭ اكىمى اسقار مىرزاحمەتوۆ جانە «جاس سارباز» بالالار مەن جاسوسپىرىمدەر اسكەري-پاتريوتتىق قوزعالىسى» رەسپۋبليكالىق قوعامدىق بىرلەستىگىنىڭ توراعاسى مەيىربەك مەڭدىعاليەۆ ۇشجاقتى مەموراندۋمعا قول قويدى.
حاميت ەسامان,
«ەگەمەن قازاقستان»
