قازاق سپورتشىلارىنىڭ بۇگىنگى جەڭىسى مەن جەتىستىگىنىڭ بارلىعى تاۋەلسىزدىكتىڭ ارقاسىندا دەپ بىلەمىن. ەل ومىرىندەگى ەڭ ەڭسەسى بيىك, تەگەۋرىنى تەكتى مەرەكە – تəۋەلسىزدىك مەيرامى. ويتكەنى بۇل كۇننىڭ ماعىناسى مەن مəن-مازمۇنى اسا تەرەڭ.
مەنىڭ قىتايداعى بالالىق شاعىم التاي وبلىسىنداعى ەرتىس وزەنىنىڭ بويىندا ءوتتى. قاراپايىم قازاق اۋىلىندا تۋىپ وستىك. ەسەيە كەلە الەمدە قازاق ەلى بار ەكەنىن بىلدىك. قىتايدا ءجۇرىپ ەڭ العاش بوكس ۇيىرمەسىنە بارعاندا جاتتىقتىرۋشى اعاي بىزدەن «مۇندا نەگە كەلدىڭدەر» دەپ سۇرادى. ءبارىمىز ءبىر اۋىزدان چەمپيون بولۋعا كەلگەنىمىزدى ايتتىق. سوندا ول كىسى «ماعان چەمپيوننىڭ كەرەگى جوق. ءبىرىنشى ادام بولۋلارىڭ كەرەك» دەپ ەدى. «سەندەر چەمپيون بولىپ, ارتىنان تىلدەرىڭدى شايناپ, ءبىر جەردە توپىراققا اۋناپ جاتساڭدار نەمەسە ەل امانداسا المايتىنداي دارەجەدە تالتاڭداپ جۇرسەڭدەر ول دۇرىس بولمايدى» دەگەن ەدى. سوندا عانا چەمپيون دەگەن اتاقتىڭ ارتىندا ۇلتتىق مۇددە, قانشاما جاۋاپكەرشىلىك جاتقانىن تۇسىنگەندەي بولدىم. قاي سالادا, قاي كاسىپتە بولسىن ۇلتتىڭ مۇددەسى بيىك تۇرماسا, ول ادام ۇلكەن جەتىستىككە جەتە المايدى.
«قازاقستانعا كەتەمىز» دەگەن ءسوز بالا كۇننەن قۇلاققا ابدەن ءسىڭىستى بولىپ قالعان ءارى ۇلكەن مەدەۋ بولاتىن. مەن قىتاي ەلىندە دە قازاقستاندى ارقالانىپ ءجۇردىم. قازاقستاننىڭ ازاماتتىعىن الۋعا شەشىم قابىلدانعان كەزدە قىتاي بوكس فەدەراتسياسى باسشىلارىنا: «جۇرەگىم – قازاق دەپ سوعادى. وتباسىم وسىندا. اتاجۇرتىمدا شاڭىراق كوتەردىم. اعايىن-تۋىستارىمنىڭ بارلىعى وسى جاقتا. سوندىقتان قازاقستان اتىنان جۇدىرىقتاسۋعا رۇقسات ەتىڭىزدەر», دەپ الدارىنان ءوتىپ, ءوتىنىش حات جازدىم. ماقساتىم – قازاقستاننىڭ كوك بايراعى استىندا وليمپيا ويىندارىنا قاتىسىپ, التىن جۇلدە يەلەنۋ بولاتىن. دەگەنمەن ورتاعا ساياسات ارالاسىپ, وليمپياداعا بارا المايتىن بولدىم. قىتاي جاعى رۇقسات بەرمەي قىرسىعىپ وتىرىپ الدى. ايتپەسە باس باپكەر مىرزاعالي ايتجانوۆتىڭ شاقىرتۋىمەن ۇلتتىق قۇرامامەن بىرگە جاتتىعۋ جۇمىستارىنا دا قاتىستىم.
لوندونعا بارا المايتىنىمدى بىلگەن كەزدە كوڭىل كۇيىم قاتتى ءتۇسىپ كەتىپ ەدى. وليمپيا ويىندارىنا بارا الماسام دا, سول ۋاقىتتا «استانا ارلاندارى» بوكس كلۋبىندا قازاق ەلىنىڭ نامىسىن قورعادىم. بۇل دا مەن ءۇشىن جۇبانىش بولدى. قىتايدان كەلگەندەگى ماقساتىم قاي جارىستا بولسىن قازاقتىڭ نامىسىن قورعاۋ ەدى. سول كۇنگە جەتكىزگەن قۇدايعا شۇكىر دەيمىن. سوندىقتان تəۋەلسىزدىگىمىز ۇزاعىنان ءارى باياندى بولسىن! تəۋەلسىز ەلدىڭ باعى دا جوعارى, اسپانى دا كەڭ. ءبىز سونداي باققا جەتكەن حالىقپىز. ەلىمىز گۇلدەنە, نۇرلانا بەرسىن!
قانات يسلام,
كاسىپقوي بوكسشى
