باتىس قازاقستان وبلىسى ورتالىعىنداعى تاريحي عيمارات – كەزىندە جاhانشا دوسمۇحامەد ۇلى, حالەل دوسمۇحامەد ۇلى, سابىر سارعوجين سىندى الاش ارىستارى وقىعان ورال اسكەري رەالدى ۋچيليششەسىنىڭ ۇيىندە بۇگىندە جاھانشا دوسمۇحامەدوۆ اتىنداعى پەداگوگيكالىق كوللەدج ورنالاسقان. كوللەدجگە وسىدان ءدال 20 جىل بۇرىن جاھانشا ەسىمى بەرىلگەن بولاتىن. وسى داتاعا وراي كوللەدجگە جاھانشا مۇراسىن زەرتتەۋشى عالىمدار جينالىپ, ستۋدەنتتەر مەن ۇستازدار ۇجىمى الدىندا تاعىلىمدى شارا ءوتتى.
وسى كەزدەسۋگە ارداگەر ولكەتانۋشى جايساڭ اقباي, جاhانشا دوسمۇحامەد ۇلى اتىنداعى «قايراتكەر» قوعامدىق قورىنىڭ ديرەكتورى, الاشتانۋشى عالىم, تاريح عىلىمدارىنىڭ كانديداتى دامەتكەن سۇلەيمەنوۆا, تاريحشى ۇستاز سايلاۋ سۇلەيمەنوۆ, جاhانشانىڭ زاڭگەرلىك جولىن زەرتتەگەن عالىم, تاريح عىلىمدارىنىڭ كانديداتى, زاڭ دوتسەنتى, بۇگىندە تەرەكتى اۋدانىنىڭ پروكۋرورى بولىپ قىزمەت ەتىپ جۇرگەن راۆيل ماجيتوۆ, تاريح عىلىمدارىنىڭ كانديداتى, دوتسەنت جاڭابەك جاقسىعاليەۆ پەن سامات قۇرمانالين, باتىس قازاقستان وبلىستىق تاريح جانە ارحەولوگيا ورتالىعىنىڭ ديرەكتورى جانتاس سافۋللين, جىمپيتىداعى الاش مۋزەيىنىڭ ديرەكتورى ايناگۇل ويشىباەۆا, قاراتوبە اۋداندىق تاريحي-ولكەتانۋ مۋزەيىنىڭ ديرەكتورى نۇرلان مەڭدەشەۆ, باتىس قازاقستان وبلىستىق ادىستەمەلىك كابينەت ديرەكتورى اياگوز حامزينا, وسى كوللەدجدى 1994-2017 جىلدارى باسقارعان ۇستاز, پەداگوگيكا عىلىمدارىنىڭ دوكتورى, پروفەسسور شالقىما قۇرمانالينا, قازاقستان جازۋشىلار وداعىنىڭ مۇشەسى, جازۋشى مۇنايدار بالمولدا جانە باسقالارى قاتىسىپ, جاھانشا دوسمۇحامەد ۇلىنىڭ ءومىرى مەن قىزمەتىنە, جالپى الاش قوزعالىسى تاريحىنا قاتىستى باياندامالارىن ورتاعا سالدى.
جانتاس سافۋللين جاھانشانىڭ ءومىرىنىڭ سوڭعى كەزەڭىندە ماسكەۋدە تۇرعان ءۇيدىڭ قالاي تابىلعانىن ايتىپ, وعان ەسكەرتكىش تاقتا ورناتۋ ماسەلەسىن كوتەرسە, راۆيل ءماجيتوۆ جاھانشانىڭ ۇلتتىق مەملەكەتتىك قۇرىلىم تۋرالى تىڭ دەرەككە تولى بايانداما جاسادى.
وسى كۇنى كوللەدجدە «رۋحاني مۇرا» كابينەتى اشىلىپ, تاريح ءپانىنىڭ وقىتۋشىسى ءاليا جۇرەكەنوۆا كوللەدج تاريحىن ەل تاريحىمەن توعىستىرا تانىستىرىپ شىقتى. ايتا كەتۋ كەرەك, كوللەدجدىڭ تاريحي عيماراتى الاش رۋحىمەن تىنىستاپ تۇر دەسە بولعانداي. مۇنداعى ءار كابينەت, وقۋ زالدارى, ءتىپتى دالىزدەر مەن فويە الاش ارىستارىنىڭ ءومىر جولى مەن قىزمەتىنەن حابار بەرەتىن كورنەكى اقپاراتقا تولى.
شارا اياسىندا «الاش ارىستارى بەينەلەۋ ونەرiندە» اتتى سۋرەت بايقاۋى ۇيىمداستىرىلدى. رەسپۋبليكالىق «جىل مۇعالiمi-2017» بايقاۋىنىڭ جەڭiمپازى, سۋرەتشى نۇرلان ءحامزيننىڭ شاكىرتتەرى الاش قايراتكەرلەرىنىڭ بەينەسىن قاعازعا ءتۇسىرىپ, شەبەرلىك كورسەتتى.
- كوللەدج يەلەنىپ وتىرعان جاھانشا دوسمۇحامەد ۇلىنىڭ ەسىمىن جاس ۇرپاقتىڭ ەسىندە قالدىرۋ, ەلگە ەتكەن قىزمەتىن ناسيحاتتاۋ ماقساتىندا بىرنەشە شارا ويلاستىرعان بولاتىنبىز. جاقىندا «جاھانشا ىزىمەن» اتتى تاريحي ەكسپەديتسياعا شىعىپ كەلدىك. كوللەدج ستۋدەنتتەرى مەن ۇستازدار توبى الاش كوسەمىنىڭ تۋعان جەرى – بۇلدىرتى اۋىلىندا, جىمپيتىداعى الاش تاريحى مۋزەيىندە بولىپ, تاريحي توپىراقپەن تانىستى. مىنە, «جاھانشا وقۋلارى» ءوتىپ جاتىر. بۇل كۇنى كوللەدجدەگى ءار توپ الاش تاريحىنا قاتىستى شاعىن قويىلىمدار قويدى. بىرنەشە سەكتسيادان تۇراتىن «جاھانشا وقۋلارى» كەزىندە ستۋدەنتتەر كوپتەگەن تىڭ مالىمەتكە قانىقتى. جەكەلەگەن دەمەۋشىلەردىڭ كومەگىمەن كوللەدجدiڭ وزات, بەلسەندi ستۋدەنتتەرiنە جاhانشا اتىنداعى اتاۋلى ستيپەنديا تاعايىندالدى. بۇگىن وسى شاكىرتاقىنى العاشقى يەلەرىنە تابىستادىق, - دەيدى كوللەدج ديرەكتورى سۆەتلانا باقىشەۆا.
قازبەك قۇتتىمۇرات ۇلى,
«ەگەمەن قازاقستان»
