ءتورت جىلدا ءبىر رەت ۇيىمداستىرىلاتىن, مىقتىلاردىڭ مىقتىسى عانا سىنعا تۇسەتىن دوداعا ەلىمىزدىڭ سپورتشىلارى تاۋەلسىز مەملەكەت رەتىندە ەڭ العاش 1994 جىلى نورۆەگيانىڭ ليللەحاممەر قالاسىندا اق قار, كوك مۇز ۇستىندە وتكەن قىسقى وليمپيا ويىندارىنا قاتىستى. ال جازعى وليمپيادانى 1996 جىلى اتلانتاداعى دودادان باستادى. جەرلەستەرىمىز بۇگىنگە دەيىن ءتورت جىلدىقتىڭ باستى باسەكەسىنە جالپى سانى 13 رەت قاتىسىپ, 67 جۇلدە ولجالادى. ونىڭ 60-ىن جازعى, جەتەۋىن قىسقى وليمپياداشىلار يەلەندى.
قازاقستان قۇراماسىنا وليمپياداداعى العاشقى التىندى 1994 جىلى نورۆەگيانىڭ ليللەحاممەر قالاسىندا وتكەن قىسقى وليمپيا ويىندارىندا شاڭعىشى ۆلاديمير سميرنوۆ سالدى. وكىنىشكە قاراي, ازىرشە بۇل التىن قىسقى وليمپياداداعى العاشقى جانە سوڭعى التىن مەدال بولىپ تۇر. ەكى جىلدان كەيىن اقش-تىڭ اتلانتا قالاسىندا وتكەن جازعى وليمپيا ويىندارىندا وتانداستارىمىز 11 مەدال يەلەندى. ونىڭ ۇشەۋى التىن جۇلدە بولاتىن. سول جىلى بوكسشى ۆاسيلي جيروۆ, بەسسايىسشى الەكساندر پارىگين جانە گرەك-ريم بالۋانى يۋري مەلنيچەنكو تۇعىردىڭ ءبىرىنشى ساتىسىنان كورىندى.
2000 جىلى سيدنەي تورىندە جالاۋى جەلبىرەگەن بايراقتى باسەكەدە ەكى قازاق بوكسشىسىنىڭ باعى جاندى. 20 جاستاعى بوكسشى بەكزات ساتتارحانوۆ فينالعا دەيىن قارسىلاستارىن ءبىر دەممەن جەڭىپ شىعىپ, وليمپيادانىڭ التىن جۇلدەسىن ولجالادى. ەكىنشى التىن مەدالدى ەلىمىزدىڭ كوك بايراعىن وليمپيادانىڭ اشىلۋ سالتاناتىندا ۇستاپ شىققان ەرماحان ىبىرايىموۆ ەل قورجىنىنا سالدى. ال سيدنەيدەگى ءۇشىنشى التىن جۇلدەنى جەڭىل اتلەت ولگا شيشيگينا سالدى.
2004 جىلى افينىدا بوكسشى باقتيار ارتاەۆ بارلىعىنان وزا شاۋىپ, 69 كيلو سالماقتا وليمپيادا چەمپيونى اتاندى. بۇل جولى باقتياردىڭ جالعىز التىنىن كوڭىلگە مەدەت تۇتتىق. ارادان ءتورت جىل وتكەندە بەيجىڭ وليمپياداسىندا بوكستان ءدال وسى سالماقتا باقىت سارسەكباەۆ وزا شاۋىپ, ءسوزىن ەلباسى مەن جۇمەكەن ناجىمەدەنوۆ, ءانىن ءشامشى قالداياقوۆ جازعان ءانۇرانىمىزدى وليمپيادا تورىندە تۇڭعىش رەت شىرقاتتى. سونىمەن قاتار تاپ وسى تاۋەلسىزدىكتىڭ ارقاسىندا باقىت سارسەكباەۆ پەن سول جىلى قىتاي قۇراماسىنىڭ اتىنان شىققان قانداسىمىز قانات يسلام تۇعىردىڭ بيىك ساتىسىنا شىعىپ, قازاقتىڭ كوك تۋىن جامىلىپ تۇردى. ءبىر قىزىعى, وليمپ شىڭىن باعىندىرعان باقىت سارسەكباەۆ پەن قانات يسلام وزگە ەلدە تۋىپ, تاريحي وتانىنا ورالعان سپورتشىلار.
2012 جىلى لوندونداعى XXX وليمپيا ويىندارىندا قازاق سپورتشىلارى ءۇش بىردەي التىن جۇلدە ولجالاپ, بۇرىنعى بيىگىنە قايتا شىقتى. ءبىر قىزىعى, بوكستان 69 كيلو سالماقتا سىنعا تۇسكەن سەرىك ساپيەۆ چەمپيون اتانىپ, ارتاەۆ پەن سارسەكباەۆتىڭ جەڭىستى جولىن جالعادى. ال اراعا 12 جىل سالىپ ولگا رىپاكوۆا جەڭىل اتلەتيكاداعى ەكىنشى التىن مەدالدى ەل قورجىنىنا سالدى. سونىمەن قاتار ۆەلوشاباندوز الەكساندر ۆينوكۋروۆ وليمپيادانىڭ العاشقى كۇنىندە التىن مەدال ولجالاپ, ەل مەرەيىن اسىردى. وسىدان ەكى جىل بۇرىن ريو تورىندە وتكەن دودادا قازاق وعلاندارى تاعى دا ءۇش التىن مەدال ەنشىلەدى. ريودا بوكسشى دانيار ەلەۋسىنوۆ وليمپيا ويىندارىندا «قازاق سالماعى» اتانىپ كەتكەن 69 كيلو سالماقتا قارسىلاستارىن قوعاداي جاپىرىپ, التىن مەدالدى الدى. اۋىر اتلەت نيدجات راحيموۆ ەل قورجىنىنا ەكىنشى التىن مەدال سالسا, دميتري بالاندين سۋدا ءجۇزۋ سپورتى بويىنشا قازاقستاننىڭ وليمپيادا تاريحىنداعى العاشقى التىن مەدالدى يەلەندى.
مىنە, تاۋەلسىز قازاق ەلى ساڭلاقتارىنىڭ وليمپيا ويىندارىنداعى ناتيجەسى وسىنداي. قازىرگى تاڭدا كەز كەلگەن الەمدەگى سپورت دەرجاۆاسى وليمپيادا جانە الەم چەمپيوناتتارىندا ەلىمىزدىڭ سپورتشىلارىمەن ساناساتىن جاعدايعا جەتتى. قازاق سپورتشىلارىنىڭ وليمپ تورىندەگى جەڭىسى مەن جەتىستىگى سوڭدارىنان ەرگەن وعلانداردىڭ بۋىنىن بەكىتىپ, بولاشاعىن نىعايتۋعا قىزمەت ەتىپ كەلەدى.
ءالي بيتورە,
«ەگەمەن قازاقستان»
