يسپانيانىڭ «بارسەلوناسى» مەن «رەالى», گەرمانيانىڭ «باۆارياسى», گوللانديانىڭ «اياكسى», يتاليانىڭ «روماسى» مەن «يۋۆەنتۋسى» جانە انگليانىڭ «مانچەستەر ءسيتيى» مەن «مانچەستەر يۋنايتەدى» ءوز جوسپارلارىن كۇنى بۇرىن جۇزەگە اسىرسا, كوپ كەشىكپەي ولاردىڭ قاتارىنا يسپانيانىڭ «اتلەتيكو», گەرمانيانىڭ «بورۋسسيا» مەن «شالكە-04» جانە پورتۋگاليانىڭ «پورتۋ» كلۋبتارى قوسىلدى.
التىنشى تۋردا «س» توبىندا اسا شيەلەنىستى باسەكەلەر ءوتتى. سەربيانىڭ «تسرۆەنا زۆەزداسىنان» باسقا ءۇش كوماندانىڭ دا پلەي-وففقا شىعۋعا مۇمكىندىكتەرى بولدى. اۋتسايدەر ءوز الاڭىندا پسج-عا لايىقتى قارسىلىق كورسەتە الماي 1:4 ەسەبىمەن ۇتىلدى. فرانتسيالىق ۇجىم ءبىرىنشى ورىندى ولجالاسا, ەكىنشى جولداما ءۇشىن تارتىس «ليۆەرپۋل» مەن «ناپولي» اراسىندا ءوتتى. بۇل ماتچتا 1:0 ەسەبىمەن جەڭىسكە جەتكەن اعىلشىندار ەكىنشى ساتىعا جايعاستى.
سول سەكىلدى «ۆ» توبىنداعى ەكىنشى جولداما ءۇشىن «توتتەنەم» مەن «ينتەر» تالاستى. سىرت الاڭدا «بارسەلونامەن» تەڭ تۇسكەن اعىلشىنداردىڭ اسىعى الشىسىنان ءتۇسىپ, ولار كەلەسى كەزەڭگە ءوتتى. ءوز الاڭىندا پسۆ-نىڭ جەڭە الماعان «ينتەر» ءۇشىنشى ورىندا قالىپ قويدى. بۇل كەزدەسۋلەردىڭ ەكەۋى دە 1:1 ەسەبىمەن اياقتالدى.
بۇگىن تۇندە 1/8 فينالدىق سايىستىڭ سوڭعى جولداماسىنا يەلىك ەتەتىن كوماندا انىقتالدى. كيەۆتە وتكەن ماتچتا «F» توبىندا ونەر كورسەتەتىن «شاحتەر» مەن «ليون» كۇش سىناستى. بۇل ويىن 1:1 ەسەبىمەن تەڭ اياقتالدى. سونىڭ ناتيجەسىندە فرانتسۋزدار سەگىز ۇپايمەن كەلەسى كەزەڭگە شىقتى. وسىلايشا, ۋەفا چەمپيوندار ليگاسىنىڭ پلەي-وفف كەزەڭىنە شىققان 16 كوماندا تولىقتاي انىقتالدى.
ءوز توپتارىندا ءۇشىنشى ورىنعا تابان تىرەگەن بەلگيانىڭ «بريۋگگە», يسپانيانىڭ «ۆالەنسيا», يتاليانىڭ «ينتەر» مەن «ناپولي», پورتۋگاليانىڭ «بەنفيكا», تۇركيانىڭ «گالاتاساراي», ۋكراينانىڭ «شاحتەر» جانە چەحيانىڭ «ۆيكتوريا پلزەن» كلۋبتارى ەۋروپا ليگاسىندا ونەر كورسەتەدى.
ال سوڭعى ورىنداردا قالىپ قويعان «موناكو» (فرانتسيا), پسۆ (گوللانديا), اەك (گرەكيا), «حوففەنحايم» (گەرمانيا), تسسكا مەن «لوكوموتيۆ» (رەسەي), «تسرۆەنا زۆەزدا» (سەربيا) جانە «يانگ بويز» (شۆەيتساريا) ءۇشىن بيىلعى ەۋروماۋسىم اياقتالدى
عالىم سۇلەيمەن,
«ەگەمەن قازاقستان»
