ىرىكتەۋ كەزەڭىنە قازاقستاننىڭ بارلىق وڭىرلەرىنەن 4 مىڭعا جۋىق بالاپان انشىلەر جينالىپ, 19-ى عانا اقتىق سىنعا ءوتتى. مايرا مۇحامەدقىزى, جەڭىس سەيدوللا ۇلى, جانار دۇعالوۆا سىندى تانىمال ونەرپازدار قازىلىق ەتكەن دودادا ءامينا كۇشتى داۋسىمەن, دياپازونىنىڭ كەڭدىگىمەن تاڭداندىردى.
شىناشاقتاي قىزدىڭ جۇلدىزداي جارقىراعان ساتتەرى از ەمەس. ەرەكشە ەستە قالعانى–«ايالاعان استانا-2017» بايقاۋى. وندا ۆ.تسويدىڭ «كۋكۋشكا» ءانىن ناقىشىنا كەلتىرە ورىنداعاندا, زالداعى كورەرمەن قاۋىم ورىندارىنان تىك تۇرىپ قول سوعىپتى. قازىلار 50 ۇپايدان 49 ۇپاي بەرگەن. ون جاستاعى وقۋشىنىڭ ەشكىمگە ۇقسامايتىن تۇنىق داۋسى كەرەمەت ءتانتى ەتكەن. سوندا ونىڭ «مەن ءوزىمنىڭ كوپبالالى وتباسىنان شىققانىمدى ماقتان ەتەمىن. ەڭ الدىمەن اتا-اناما قارىزدارمىن. ءۇش ءسىڭلىم – جاقىن قۇربىلارىم. بايقاۋداعى ونەرىمدى ءسىڭلىم لەميناعا ارنايمىن. ونى ەمدەتكىم كەلەدى» دەگەن سوزدەرىن ەستىگەن جۇرتشىلىقتىڭ كوڭىلى بوساپ, ارمانىنىڭ ورىندالۋىنا تىلەكتەستىك بىلدىرگەن. وسىلايشا گران-ءپريدى قانجىعاعا بايلاعان جەرلەسىمىز «دەتسكايا ۆولنا» بايقاۋىنا جول تارتتى. مۇندا دا كاسىبي انشىلەرشە ساحنادا ءوزىن ەركىن ۇستادى. قازاقستاننىڭ نامىسىن ابىرويمەن قورعادى.«كورەرمەندەر كوزايىمى» اتالىمى بويىنشا ارنايى سىيلىقتى اتاقتى ءانشى لەۆ لەششەنكونىڭ ءوزى تاپسىردى.
ونەرلى اۋلەت ورتاسىندا تاربيە العان ول جاستايىنان انگە عاشىق بولىپ ءوستى. تالانت قىرىنىڭ ءبۇر جارۋىنا زور ىقپال جاساعان اتا-اناسىنا, ۇستازدارىنا العىسى شەكسىز. قازىر ونى ءان الەمىنە رەسەيلىك تانىمال پروديۋسەر لينا اريفۋللينا باۋلىپ ءجۇر. ەندىگى ماقساتى – رەسەيلىك كورەرمەندەرىن تاعى ءبىر ءتانتى ەتۋ.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
