2015 جىلى باستالعان «ۇلتتىق مۋزەيگە سىي تارتۋ» اتتى رەسپۋبليكالىق اكتسيا اياسىندا حالقىمىزدىڭ ساياسي-الەۋمەتتىك جانە رۋحاني-مادەني ومىرىنە ولشەۋسىز ۇلەس قوسقان تانىمال تۇلعالاردىڭ ۇرپاقتارى بۇگىنگە دەيىن كوزدەرىنىڭ قاراشىعىنداي ساقتاپ كەلگەن دۇنيەلەردى مۋزەي قورىنا تاپسىردى. قورىتىندى سالتاناتتى كورمەگە جۇمابەك تاشەنوۆتىڭ ديپلوماتيالىق تولقۇجاتى مەن وردەندەرى, ق.مىرزاليەۆتىڭ قالامسابى مەن قولساعاتى, ج.ۇشكەمپىروۆتىڭ التىن مەدالدارى مەن جارىستارعا كيگەن كيىمدەرى, گ.يسمايلوۆانىڭ قىل قالامدارى مەن ءساندى سومكەلەرى, سەرىك ساپيەۆ, يۋري مەلنيچەنكو, ۆلاديمير سميرنوۆ, باقىت سارسەكباەۆ سىندى وليمپ شىڭىن باعىندىرعان ساڭلاقتاردىڭ جەكە زاتتارى قويىلدى.
سالتاناتتى شاراعا مەملەكەت جانە قوعام قايراتكەرى دىنمۇحاممەد قوناەۆتىڭ جيەنى جاننەتا سەرىكباەۆا, قازاقستاننىڭ حالىق ءارتىسى گۇلجان اسپەتوۆا, قازاقستاننىڭ ەڭبەك سىڭىرگەن ونەر قايراتكەرى, ايتىسكەر اقىن نادەجدا لۋشنيكوۆا, اكتەر سانجار ماديەۆ, سۋرەتشى ءابىلحان قاستەەۆتىڭ شوبەرەسى ايسانىم قاستەەۆا, ءماريام جاگورقىزىنىڭ نەمەرەسى قابيبا نۇربەكوۆا جانە وزگە دە ەلىمىزگە بەلگىلى ونەر قايراتكەرلەرى, جاستار قاتىستى.
قورلاردى ەسەپكە الۋ ءبولىمىنىڭ جەتەكشىسى باتەش اقباسوۆا قورداعى ەكسپوناتتاردىڭ ارقايسىسىنىڭ سيرەك ءارى قايتالانبايتىن سونى دۇنيەلەر ەكەنىن ايتادى.
– العاشقى اكتسيالار الدىمەن ۇلكەن قالالار – استانا مەن الماتىدا وتسە, كەيىن رەسپۋبليكا بويىنشا جالعاسىن تاپتى. ءۇش جىلعا ۇلاسقان اكتسيا كەزىندە 300-دەن اسا جەكە تۇلعا 4 مىڭعا جۋىق جادىگەردى سىيعا تارتتى. كەلىپ تۇسكەن ەكسپوناتتاردى مۋزەي قورىنىڭ ىرىكتەۋ كوميسسياسىنداعى تاجىريبەلى ماماندار ساراپتامادان وتكىزەدى. وسىدان كەيىن تاقىرىپتىق باعىتتا سالالانىپ, ەكسپوزيتسيا زالدارىنا ورنالاستىرىلادى. «وتكەندى قادىرلە, بۇگىندى باعالا, كەلەشەككە سەنىمدى كۇشەيت» دەگەن جاقسى ءسوز بار. اكتسياعا بەلسەنە قاتىسقان ەل ازاماتتارى مەن قوعام قايراتكەرلەرىنە, وزگە دە اتسالىسقان جاندارعا ريزاشىلىعىمىزدى بىلدىرەمىز. مۇرانى تاپسىرۋشىلار ءۇشىن ىنتالاندىرۋ جولدارى دا قاراستىرىلعان, – دەيدى باتەش اقباسوۆا.
شارا اياسىندا امىرە قاشاۋباەۆتىڭ 1925 جىلى پاريجدە ونەر كورسەتكەنى ءۇشىن العان كۇمىس مەدالى مۋزەي قورىنا سالتاناتتى تۇردە تابىس ەتىلدى. تاپسىرىلعان ەكسپوناتتاردىڭ اراسىندا «قازاق ءۆالسىنىڭ كورولى» اتانعان ءشامشىنىڭ «كۋبان» پيانينوسى كوزگە ەرەكشە جىلى ۇشىرايدى. مۋزىكا اسپابىن شىمكەنت جاستارى 1965 جىلى كومپوزيتورعا سىيعا تارتسا كەرەك. «دۋداراري-دۋدىم, ءبىر سەن ءۇشىن تۋدىم» دەپ شىرقاعان ءماريام جاگورقىزىنىڭ سىرى كەتسە دە, سىنى كەتە قويماعان اعاش ايناسى دا وسى قاتاردان ورىن تەۋىپتى. سونداي-اق حالىق سۋرەتشىسى ءابىلحان قاستەەۆتىڭ پلەنەر شاتىرى مەن مولبەرتى دە وسى كورمەدە جاراسىم تاۋىپتى. سۋرەتشىنىڭ قىزى گۇلداريا قاستەەۆا اكەسىنىڭ «تۇركسىبتىڭ سالىنۋى», «جامبىل مەن كالينين» اتتى جۇمىستارىنىڭ ەسكيزىن دە وسى مۋزەي قورىنا تارتۋ ەتىپ وتىر.
تاريحىمىزدى تانۋعا, تۇگەندەۋگە ۇلەس قوسقان تاعىلىمدى شارا مۇنىمەن اياقتالمايدى. اۋلەتىندەگى مۇراعا قالعان بۇيىمدى وتكىزۋگە ىقىلاستى جاندارعا مۋزەي ەسىگى ءاردايىم اشىق. ال مۋزەيگە تاپسىرىلعان زات اۋا, ىلعال, شاڭ-توزاڭ, كۇننىڭ كوزى, ەلەكتر جارىعى سەكىلدى شىرۋگە, ب ۇلىنۋگە, جويىلۋعا اسەر ەتەتىن قۇبىلىستاردىڭ بارىنەن ساقتاندىرىلىپ, ارنايى كۇتىمدەگى جادىگەر ۇرپاقتان ۇرپاققا جەتپەك.
ايا ءومىرتاي,
«ەگەمەن قازاقستان»
