فۋتبول • 05 جەلتوقسان، 2018

«قازاق مەسسيى» قازاقستانعا ورالا ما؟

248 رەتكورسەتىلدى

سوڭعى جىلدارى قازاق فۋتبولىنىڭ بولاشاعى دەپ ءۇمىت كۇتتىرەتىن بىرنەشە تالانتتى جاس فۋتبولشىلار شىعا باستادى. ولاردىڭ ءبىرشاماسى قازىر ءتۇرلى دەڭگەيدەگى ۇلتتىق قۇراما ساپىندا دوپ تەۋىپ ءجۇر. سولاردىڭ ءبىرى جانە بىرەگەيى رەسەيدىڭ «ۋفا» كلۋبىندا ويناپ جۇرگەن تارازدىق اياقدوبشى ەركەبۇلان سەيداحمەت.

جۋىردا قازاقستاندىق باق بەتتەرىندە سەيداحمەت جۋىق ارادا «قايرات» نەمەسە «استانا» كوماندالارىنا اۋىسادى ەكەن سىبىس لەزدە تاراپ، الەۋمەتتىك جەلىدە ءبىراز تالقىعا ءتۇستى. بىراق «قايرات» تا، «استانا» كومانداسى دا بۇل اقپاراتقا بايلانىستى ەشقانداي مالىمدەمە جاسامادى. ال ەركەبۇلان سەيداحمەت بولسا، وتاندىق باسپاسوزگە بەرگەن سۇقباتىندا «باۋىرجان يسلامحانمەن بىرگە ويناعىم كەلەدى، «قايراتتا» ويناۋ بالا كەزگى ارمانىم» دەپ ايتقان ەدى.

بۇل اقپاراتتىڭ تاراۋىنا سەيداحمەتتى «ۋفاعا» شاقىرعان سول ۋاقىتتاعى كلۋبتىڭ باس باپكەرى سەرگەي سەماكتىڭ «زەنيت» كومانداسىنا اۋىسۋى جانە فۋتبولشىنىڭ جاراقاتىنان سوڭ الاڭعا ءجيى شىقپاۋىنا بايلانىستى ونىڭ اگەنتىنىڭ كەزەكتى «اقپاراتتىق» ءجۇرىسى بولۋى مۇمكىن دەگەن بولجام بار.

ەركەبۇلان قازاقستاندىق كوماندانىڭ بىرىنە اۋىسۋى مۇمكىن دەگەن اقپارات تارماس بۇرىن، «ۋفا» كلۋبىنىڭ ديرەكتورى شاميل گازيزوۆ وتاندىق ءبىر سايتقا بەرگەن سۇحباتىندا ەركەبۇلان سەيداحمەتكە سەنەتىنىن ايتقان. «سەيداحمەت وتە تالانتتى ويىنشى. ونىڭ پوتەنتسيالى جوعارى. «ۋفا» بۇل فۋتبولشىعا سەنىم ارتادى. ەركەبۇلاندى باسقا كلۋبقا ساتادى ەكەن نەمەسە جالعا بەرەدى دەگەننىڭ ءبارى جاي عانا قاۋەسەت. فۋتبولشى جاراقاتىنان ەندى ايىعىپ كەلەدى. تولىق جازىلعان سوڭ، الاڭعا شىعادى. ءبىز اسىقپايمىز، ول قاتارعا جىلدام ارادا قوسىلادى دەپ سەنەمىز»، دەيدى شاميل گازيزوۆ.

ال ەندى شاميل گازيزوۆ نە ءۇشىن سەيداحمەتكە سەنىم ارتىپ وتىر، قازاق فۋتبولشىسى «ۋفاعا» نە ءۇشىن قاجەت؟ دەگەن سۇراققا جاۋاپ ىزدەپ كورسەك. 2017 جىلى رەسەيدە وتكەن «گراناتكين» تۋرنيرىنەن سوڭ ءوزىنىڭ تالاتىنىمەن جانە ەڭبەكقورلىعىمەن تانىلعان سەيداحمەت بىردەن «زەنيتتىڭ» كومانداسىنىڭ كوزىنە ءتۇستى. ءتىپتى، «زەنيتتىڭ» جاستار قۇرامىندا ءبىر-ەكى رەت جاسىل الاڭعا شىققان-دى. بىراق جاس مولشەرىنە بايلانىستى شەتەلدىك كوماندامەن كەلىسىم شارتقا وتىرا المادى. اراعا ءبىر جىل سالىپ، ياعني ەركەبۇلان 18 جاسقا تولعان سوڭ «ۋفا» كومانداسى وتانداسىمىزدى اتتاي قالاپ، باشقۇرستان كومانداسىنىڭ قۇرامىنا الدى. سەبەبى، تالانتتى جاس فۋتبولشى تاربيەلەپ، ەۋروپالىق توپ 5 بىرىنشىلىكتىڭ ءبىر كومانداسىنا ۇلكەن سومادا ساتۋدى كوزدەيدى. ءالى دە سول ماقساتتا ۇستاپ وتىرۋى مۇمكىن. ويتكەنى، «ۋفا» وسىعان دەيىن ۋكراينالىق جاس تالانت الەكساندر زينچەنكونى «مانچەستەر سيتيگە» ساتقان بولاتىن. سوندىقتان باشقۇرستاننىڭ بۇل كومانداسى كوپتەگەن جاس تالانتتار ءۇشىن ەۋروپاعا باستايتىن باسپالداق سەكىلدى كورىنەدى.

18 جاستاعى فۋتبولشى جىل باسىندا «ۋفا» ساپىنا اۋىسقانىن ايتتىق قوي. سول ۋاقىتتا بۇكىل رەسەيلىك جانە قازاقستاندىق باق وكىلى ونى بولاشاق «قازاق مەسسي» دەپ جارياعا جار سالىپ، ءبىر-بىرىمەن جارىسا جازىپ جاتتى. وسىلايشا، ەركەبۇلاننىڭ ويىنىنان بۇرىن اتاعى تمد ەلدەرىنە تەز تارادى. الەۋمەتتىك جەلىدەگى پاراقشالارىنا جازىلۋشى جانكۇيەرلەردىڭ سانى ساعات سايىن ارتا باستادى. بىلايشا ايتقاندا، بەلگىلى ءبىر دەڭگەيدە تانىلىپ قالدى. ال ويىن جاعىنان ازىرشە كوزگە تۇسەر ەمەس.

ەركەبۇلان رەسەي پرەمەر-ليگاسىنىڭ بيىلعى ماۋسىمىندا بار-جوعى ەكى رەت عانا الاڭعا شىقتى. سونداي-اق ول رەسەي بىرىنشىلىگىنىڭ وتكەن ماۋسىمىندا جاراقاتىن بايلانىستى ەكى رەت الاڭعا شىققان ەدى. جاراقاتىنان ايىعىپ، قاتارعا قوسىلعان سوڭ سەيداحمەت بىردەن «ۋفا» ساپىندا ويناماي، جاستار قۇرامىمەن ءبىر ويىن وتكىزدى. ۋفاداعى «نەفتيانيك» ستاديونىندا «ۋفانىڭ» جاستار قۇراماسى سانكت-پەتەربۋرگتىڭ «زەنيت» كلۋبىنداعى قۇرداستارىمەن كەزدەستى. بۇل ويىندا قوناقتار 5:0 ەسەبىمەن جەڭىسكە جەتتى. ەركەبۇلان الاڭدا سيمۋلياتسيا جاساپ، سارى قاعاز الدى. ءبىر رەت تەپكەن دوبى قاقپانىڭ جاقتاۋىنان قايتتى. ءبىر-ەكى ايىپ دوبىن ورىندادى.

ال سونان سوڭ نەگىزگى كلۋبقا ورالىپ، پرەمەر-ليگانىڭ 7-تۋرىندا ماسكەۋدىڭ تسسكا كومانداسىنا قارسى وتكەن ويىندا ەكىنشى تايمدا الاڭعا شىعىپ، نەبارى 22 مينۋت قانا ويناپ، ءبىر سارى قاعاز الدى. ەكىنشى ويىنىن كۋبوگتىق ماتچتا «نيجني نوۆگورود» كلۋبىمەن وتكىزىپ، نەگىزگى قۇرامدا 53 مينۋت وينادى. ەركەبۇلاننىڭ قازىرشە رەسەيدەگى «جەتىستىگى» وسى.

وتكەن اپتادا «ۋفا» كومانداسىنىڭ باسشىلىعى سەرگەي سەماكتىڭ ورنىنا باس جاتتىقتىرۋشى بولىپ تاعايىندالعان سەرگەي توماروۆتى قىزمەتىنەن بوساتتى. وعان سەبەپ كوماندانىڭ رەسەي پرەمەر-ليگاسىندا 13 ويىننان سوڭ 16 كوماندانىڭ اراسىندا 15-ءشى ورىندا تۇرعاندىعى. وتكەن ماۋسىمدا «ۋفا» 6-ورىن يەلەنىپ، ەۋروپا ليگاسىنىڭ ىرىكتەۋ كەزەڭىنە قاتىسۋعا مۇمكىندىك الىپ ەدى. 36 جاستاعى سەرگەي توماروۆ «ۋفاعا» شىلدە ايىندا كەلگەن بولاتىن. توماروۆ باسشىلىعىمەن «ۋفا» پرەمەر-ليگاداعى 13 ويىننىڭ تەك ەكەۋىندە عانا جەڭىسكە جەتىپ، التى رەت جەڭىلىسكە ۇشىراعان. بەس ويىندا قارسىلاستارىمەن تەڭ تۇسكەن. ەندى باس باپكەردىڭ مىندەتىن اتقارۋشى بولىپ رەسەيلىك بۇرىنعى فۋتبولشى دميتري كيريچەنكو تاعايىندالدى. بالكىم، وسى جاتتىقتىرۋشى ەركەبۇلاندى الاعا ءجيى شىعارىپ، تالانتىن ۇشتاي تۇسەتىن شىعار.

جالپى، قازىرگى تاڭدا وتانداسىمىزعا الاڭعا كوپ شىعىپ، ءجيى دوپ تەبۋ قاجەت. جالىنداپ تۇرعان جاستىق شاقتا قوسالقى قۇرامدا وتىرىپ قالۋ ونىڭ بولاشاعىنا كەرى اسەرىن تيگىزەتىنى بەلگىلى. سوندىقتان ونىڭ قازاقستاننىڭ ءبىر كلۋبىنا ورالعانى دۇرىس سياقتى. بىراق قازىر قازاقستان كلۋبتارىندا دا باسەكەلەستىك جوق ەمەس. مىسالى، «قايرات» ساپىندا ەركەبۇلاننىڭ پوزيتسياسىندا اندرەي ارشاۆين، يۆو يليچەۆيچ جانە يساەل باربوزا ويناسا، ال «استانا» كومانداسىندا مارين توماسوۆ، رومان مۇرتازاەۆ جانە پەدرو ەنريكە سىندى فۋتبولشىلار بار. ەگەر، سەيداحمەت وسى اتى اتالعان فۋتبولشىلارمەن ءوز ورنى ءۇشىن باسەكەلەسە السا، وندا ەركەبۇلاننىڭ بولاشاعى بار دەۋگە تولىق نەگىز بولا الادى.

 

تالعات مۇسىرەپوۆ،

بلاگودار مەكتەبى

اقتوبە

 

سوڭعى جاڭالىقتار

تويدىڭ سوڭى توپىرلاعان اۋرۋ

ايماقتار • بۇگىن، 10:22

ۇعىنا بىلگەنگە – ۇلت تاعدىرى

ساياسات • بۇگىن، 06:57

كوڭىلگە مەدەت بولعان ماقالا

رۋحانيات • بۇگىن، 06:56

54 ادام جازىلىپ شىقتى

كوروناۆيرۋس • بۇگىن، 06:39

ەل بولىپ ەڭسەرەمىز

ساياسات • بۇگىن، 06:20

بۋمەرانگ

رۋحانيات • بۇگىن، 05:54

قورعاۋشىلارعا دا قولداۋ قاجەت

ايماقتار • بۇگىن، 05:46

تويدىڭ سوڭى توپىرلاعان سىرقات

ايماقتار • بۇگىن، 05:43

اقيرەكتە – ارىستان باب...

تانىم • بۇگىن، 05:33

تەاتردىڭ ونلاين تارتۋى

رۋحانيات • كەشە

ۇقساس جاڭالىقتار