ديپلومات رەتىندە بۇل ماسەلەنىڭ حالقىمىزدىڭ بارشا الەممەن – جاقىن جانە الىس شەتەلدەرمەن قارىم-قاتىناس تاريحىنا دا قاتىسى بار ەكەندىگىن اتاپ وتكىم كەلەدى. پرەزيدەنت ن.نازارباەۆ قازاقستاننىڭ شەكارالاس مەملەكەتتەرمەن اۋماقتىق ماسەلەلەرىن رەتتەدى, كورشىلەس ەلدەرمەن جانە ءىرى مەملەكەتتەرمەن دوستىق جانە ستراتەگيالىق سەرىكتەستىك قاتىناستارىن ورناتتى جانە ءوزارا ءتيىمدى ايماقتىق ەكونوميكالىق ىنتىماقتاستىق جۇيەسىن قۇرۋدا. تاريحتان العان ساباقتار قازاقستاندى جاھاندىق يادرولىق قارۋسىزدانۋ جانە تاراتپاۋ, حالىقارالىق دەڭگەيدەگى ساياسي سەنىمدىلىك پەن ىنتىماقتاستىقتى نىعايتۋ, قاقتىعىستار مەن داعدارىستاردى رەتتەۋ ماسەلەلەرىندە بەلسەندى ءارى باتىل پوزيتسيا ۇستانۋعا, ترانسۇلتتىق ەكونوميكالىق جوبالاردى ىلگەرىلەتۋگە جەتەلەيدى.
ەلباسىنىڭ « ۇلى دالانىڭ جەتى قىرى» ماقالاسى قازاقستان حالقىنا عانا ەمەس, حالىقارالىق قاۋىمداستىققا – اكادەميالىق توپتارعا, تاريحشىلارعا, مادەنيەت پەن ونەر قايراتكەرلەرىنە, مۇراجاي جانە مۇراعات ءىسىنىڭ ماماندارىنا, جۋرناليستەرگە ارنالعان. نۇرسۇلتان نازارباەۆ الەم جۇرتشىلىعىن دالا وركەنيەتىنىڭ مادەني جانە تاريحي مۇراسىن زەرتتەۋگە قاتىسۋعا شاقىرادى. سول سەبەپتى, سىرتقى ىستەر مينيسترلىگى بۇل ەڭبەكتى الەمنىڭ كوپتەگەن تىلدەرىنە اۋدارادى.
سونىمەن قاتار سىرتقى ساياسي ۆەدومستۆو مەملەكەت باسشىسى ۇسىنعان تاريحي سانانى جاڭعىرتۋدىڭ بارلىق جوبالارىن ىسكە اسىرۋعا بەلسەنە اتسالىسادى. ويتكەنى ولاردىڭ بارلىعىنىڭ حالىقارالىق مازمۇنى بار. سىرتقى ىستەر مينيسترلىگى جانە قازاقستاننىڭ ەلشىلىكتەرى ءبىزدىڭ زەرتتەۋشىلەرگە اسا ءىرى شەتەلدىك ارحيۆتەرمەن جۇمىس ىستەۋدە قاجەتتى كومەك كورسەتەتىن بولادى. « ۇلى دالانىڭ ۇلى ەسىمدەرى» – ءبىزدىڭ تانىمال, قادىرلى جانە جەر شارىنىڭ ءار تۇكپىرىندە ۇلاعاتقا يە ۇلى اتا-بابالارىمىز. ءبىزدىڭ مىندەتىمىز – ولاردىڭ بەينەلەرىن ەستە ساقتاۋ, ولار قالدىرعان مۇرانى زەرتتەۋ جانە ماڭگى ەستە قالدىرۋ. ءبىزدى 2019 جىلى استانا قالاسىندا تۇركولوگتاردىڭ دۇنيەجۇزىلىك كونگرەسىن وتكىزۋ جانە تۇركى تاريحىن زەرتتەۋ بويىنشا ەلىمىزدىڭ جانە شەتەلدىك عالىمدارمەن بىرلەسكەن ۇلكەن جۇمىس كۇتىپ تۇر. ديپلوماتتار مۇراجايلىق جانە كينەماتوگرافتىق جوبالاردى ىسكە اسىرۋعا, دالا فولكلورى انتولوگيالارىن شەتەل تىلدەرىنە اۋدارۋعا جانە ءبىزدىڭ ەجەلگى ونەرىمىز بەن تەحنولوگيالارىمىزدى الەمدىك دەڭگەيدە ىلگەرىلەتۋگە دايىن.
بۇل جوبالار ءبىزدىڭ يۋنەسكو, يسەسكو-مەن ىنتىماقتاستىعىمىزدى, تمد-مەن, تۇركى تىلدەس مەملەكەتتەردىڭ ىنتىماقتاستىق كەڭەسىمەن جانە باسقا دا ۇيىمدارمەن گۋمانيتارلىق سالاداعى قاتىناستاردى كۇشەيتىپ, بايىتادى.
ءبىز سونداي-اق قوعامدا زور سەرپىلىس تۋدىرعان «رۋحاني جاڭعىرۋ» باعدارلاماسى اياسىندا قازاقستانعا جاسالعان ءباسپاسوز تۋرلارىن ۇيىمداستىرۋ ۇدەرىسىن جالعاستىراتىن بولامىز. مۇنى ءبىز مەملەكەت باسشىسى ۇسىنىپ وتىرعان ەلىمىزدىڭ حالىقارالىق بەدەلىن نىعايتۋعا, قازىرگى زاماننىڭ مادەنيەتتەرىن ءوزارا جاقىنداستىرۋعا جانە بايىتۋعا زور ۇلەس قوساتىن اسا ۇلكەن جۇمىس دەپ ەسەپتەيمىز.
قايرات ءابدىراحمانوۆ,
قازاقستان رەسپۋبليكاسىنىڭ سىرتقى ىستەر ءمينيسترى
