جوبا اياسىنداعى العاشقى تاريحي-تانىمدىق ەكسكۋرسيا تۇركى الەمىنىڭ استاناسى تۇركىستان قالاسىندا ءوتتى. شاراعا 15 شاقتى الىس-جاقىن شەتەلدەردەن كەلگەن (اۆستريا, انگليا, فرانتسيا, شۆەتسيا, يران, قىتاي, تۇركيا, مونعوليا, تاجىكستان, رەسەي, بەلورۋس, ۋكراينا, وزبەكستان, قىرعىزستان) 30-عا جۋىق وتانداسىمىز قاتىسىپ, ولارعا قوجا احمەت ياسساۋي, ارىستان باب كەسەنەلەرى مەن ءوڭىردىڭ باسقا دا كورىكتى جەرلەرى تانىستىرىلدى.
«قاسيەتتى قازاقستان: تۋعان جەرگە تاعزىم» جوباسى اياسىندا ق.ا.ياسساۋي اتىنداعى حالىقارالىق قازاق-تۇرىك ۋنيۆەرسيتەتىندە «قازاقستاننىڭ كيەلى جەرلەرى» تاقىرىبىندا دوڭگەلەك ۇستەل بولدى.
«وتانداستار قورى» كەاق پرەزيدەنتى نۇرتاي ابىقاەۆ اتاجۇرتقا جينالعان قانداس باۋىرلارعا سالەم بەرىپ, ولارمەن وتكەن كەزدەسۋى ءۇشىن العىسىن ءبىلدىردى. قور باسشىسى باس قوسۋ ورنى رەتىندە تۇركىستان قالاسىن تاڭداۋدا ەرەكشە ءمان بارىنا دا توقتالىپ ءوتتى.
«تۋعان جەرگە تاعزىم» ءىس-شاراسى قازاقستان رەسپۋبليكاسىنىڭ ۇكىمەتىمەن بەكىتىلگەن شەتەلدەگى قازاقتاردى قولداۋ جونىندەگى 2018 – 2022 جىلدارعا ارنالعان ءىس-شارالار جوسپارىنا سايكەس جۇزەگە اسىرىلۋدا. ياعني, ءبىز تاۋەلسىزدىك جىلدارىندا الىستاعى اعايىندى قولداۋدى ەشقاشان ەستەن شىعارعان ەمەسپىز. وسىعان دالەل رەتىندە وزدەرىڭىز بۇگىن حالقىمىزدىڭ رۋحاني مۇراسىنىڭ سارقىلماس قازىناسى – تۇركىستاندى ارالادىڭىزدار. وسىنىڭ بارلىعى مەملەكەت باسشىلىعىنىڭ, وبلىس اكىمشىلىگىنىڭ تىكەلەي قولداۋىمەن جۇزەگە اسىرىلۋدا. قازىرگى كەزدە, شەتەلدەن 1 ميلليونعا جۋىق قازاقتى ەلگە كوشىرىپ الىپ, قولدان كەلەر بارلىق كومەگىمىزدى جاسادىق. بۇگىندە سول باۋىرلارىمىز قازاقستاننىڭ ازاماتى اتانىپ, ەل دامۋىنا ءوز ۇلەستەرىن قوسۋدا. سونىمەن قاتار, بۇگىنگى تاڭدا 5 ميلليوننان استام قانداسىمىز شەت مەملەكەتتەردە تۇرىپ جاتىر», دەدى ول.
شارا بارىسىندا شەتەلدىك وتانداستارىمىز «قاسيەتتى قازاقستان: تۋعان جەرگە تاعزىم» ارنايى جوباسىنا قاتىسۋ مۇمكىندىگى ءۇشىن العىسىن ءبىلدىرىپ, وزدەرىن تولعاندىراتىن بىرقاتار ماسەلەلەرى مەن ۇسىنىستارىن دا ايتىپ ءوتتى. ماسەلەن, فرانتسياداعى مۇستافا شوقاي فرانتسۋز-قازاق دوستىق قوعامىنىڭ باسشىسى ياشار دينچ مىرزا ناۋرىز مەيرامىن ءار جىلى ءار ەلدە وتكىزۋگە ۇسىنىس ءبىلدىردى. ونىڭ ايتۋىنشا, بىرلەسىپ وتكىزگەن ۇلتتىق مەيرامنىڭ شەتەلدەگى قازاقتار ءۇشىن سالت-ءداستۇرى مەن مادەنيەتىن ساقتاۋىندا ماڭىزى زور بولماق. سونىمەن قاتار, فرانتسيالىق وتانداسىمىز ءتىل ماسەلەسىنىڭ دە وتە وزەكتى ەكەنىن جەتكىزىپ, شەتەلدەگى ۇستازدار قاتارىن كوبەيتۋ كەرەكتىگىن ايتتى.
ءتىل ماسەلەسىنە قاتىستى الاڭداۋشىلىقتى تاجىكستان ەلىندەگى قازاق دياسپوراسىنىڭ وكىلى زاۋرە سامينوۆا دا ءبىلدىردى. سونىمەن بىرگە, تاجىكستاندىق وتانداسىمىز قازاق تىلىندە شىعاتىن وقۋلىق-كىتاپتاردىڭ باسىلىمدىق نۇسقالارىنا قول جەتكىزسەك دەگەن نيەتىن ايتتى. بۇعان باستى سەبەپ – تاجىكستاننىڭ اۋىلدىق جەرلەرىندە جارىقتىڭ تاۋلىگىنە 2 ساعات بەرىلەتىندىگىنەن ەلەكتروندى وقۋلىقتاردى تۇتىنۋدىڭ مۇمكىن ەمەستىگى ەكەن.
موڭعوليا-قازاقستان دوستىق جانە ىنتىماقتاستىق وداعىنىڭ توراعاسى باكەي اعىپار ۇلى شەتەلدىك قازاقتاردىڭ باستى ماسەلەسى ۇلتتىق-رۋحاني قۇندىلىقتاردى ساقتاۋعا ساياتىنىن جەتكىزدى. وسى رەتتە دۇنيە جۇزىندە تارىداي شاشىلعان قازاقتاردىڭ ماسەلەلەرى مەن مۇقتاجدارىن عىلىمي تۇرعىدا زەرتتەۋدى ۇسىندى.
«وتانداستار قورى» كەاق پرەزيدەنتى نۇرتاي ابىقاەۆ ۇسىنىستاردىڭ تولىق تىڭدالعانىن, ولاردىڭ ماسەلەلەردى شەشۋ بارىسىندا ەسكەرىلەتىندىگىن جەتكىزدى.
«وتانداستار» قورى», قوعامدىق دامۋ مينيسترلىگى جانە دۇنيەجۇزى قازاقتار قاۋىمداستىعى «قاسيەتتى قازاقستان: تۋعان جەرگە تاعزىم» تاريحي-تانىمدىق ەكسكۋرسيالارىن الداعى بەس جىل ىشىندە ەلىمىزدىڭ وزگە دە وڭىرلەرىندە جۇيەلى تۇردە وتكىزۋدى جوسپارلاپ وتىر. كەلەسى رەتتە جوبا اقتاۋ, پاۆلودار, الماتى جانە ت.ب. قالالاردى قامتيتىن بولادى. ۇيىمداستىرۋشىلاردىڭ ايتۋىنشا, كيەلى جەرلەردى جاقىننان تانىپ, ءجىتى زەرتتەۋ ارقىلى شەتەلدىك قانداستار تاريحي وتانىنىڭ وتكەنىنە ءۇڭىلىپ, ەلىمىزدىڭ مادەنيەتىنە, ونەرىنە جانە حالىقتىق داستۇرلەرىنە جاقىنداي تۇسەدى.
