ەلىمىزدەگى جالپى ەلەكتر قۋاتىنىڭ 30 پايىزى «سامۇرىق-ەنەرگو» اق قۇرامىنا كىرەتىن كومپانيالارعا تيەسىلى. بۇگىنگى تاڭدا كومىرمەن جۇمىس ىستەيتىن بارلىق ەلەكتر ستانسالارىندا نورماعا سايكەس پايدالانىلاتىن قاتتى وتىن جيناقتالعان.
− «سامۇرىق-ەنەرگو» اق-نىڭ بارلىق ەنەرگيا وندىرەتىن جانە ەنەرگيا تاراتاتىن ۇيىمدارى جابدىقتاردىڭ جوسپارلانعان جوندەۋ جۇمىستارىن دەر ۋاقىتىندا اياقتادى. بەكىتىلگەن تارتىپپەن كۇزگى-قىسقى كەزەڭدە جۇمىسقا دايىندىعى تۋرالى پاسپورتتار الىندى, – دەدى س. تۇيتەباەۆ. ونىڭ ايتۋىنشا, حولدينگىنىڭ «ەكىباستۇز گرەس-1», «ەكىباستۇز-گرەس-2», «مويناق سەس», «شاردارا سەس», «الماتى ەلەكتر ستانسالارى» ۇيىمدارى ەلەكتر جانە جىلۋ جۇكتەمەلەرى بەكىتىلگەن كەستە بويىنشا جۇمىس ىستەۋدە. سونىمەن قاتار س.تۇيتەباەۆ «بوگاتىر كومىر» جشس جىلۋ بەرۋ ماۋسىمىنا دايىندىق اياسىندا تاپسىرىس بەرۋشىلەردىڭ بارلىق سۇرانىسىن ورىنداعانىن اتاپ ءوتتى. كەنىشتە وندىرىلگەن قاتتى وتىننىڭ 80 پايىزعا جۋىعى ەلەكتر ەنەرگياسى مەن جىلۋ ءوندىرۋ ءۇشىن رەسپۋبليكانىڭ ەنەرگيا ءوندىرۋشى كاسىپورىندارىنا جىبەرىلگەن. بيىلعى 10 ايدىڭ كورسەتكىشى بويىنشا كەنىشتە 36,5 ملن توننا كومىر وندىرىلگەن.
س.تۇيتەباەۆتىڭ ايتۋىنشا, قازاقستاندا 2016 جىلدان باستاپ ەلەكتر قۋاتىنىڭ قورى ارتىپ قامتاماسىز ەتۋ تۇرعىسىنان ەشقانداي تاپشىلىق تۋىنداماعان. ءتىپتى, «سامۇرىق-ەنەرگو» اق بۇگىنگە دەيىن كورشى رەسەيگە ەلەكتر قۋاتىن ەكسپورتتاپ كەلگەن.
ەركەجان ايتقازى,
«ەگەمەن قازاقستان»
