بوكس • 19 قاراشا، 2018

ابىلايحان ءجۇسىپوۆ: توكيو تۋرالى ايتۋعا ءالى ەرتە...

196 رەتكورسەتىلدى

كەشە اقتاۋ قالاسىندا بوكستان قازاقستان چەمپيوناتى اياقتالدى. 10 سالماق دارەجەسى بويىنشا ەلىمىزدىڭ بارلىق وڭىرىنەن قاتىسقان بىلعارى قولعاپ شەبەرلەرى سىنعا ءتۇسىپ، ءوزارا مىقتىنى انىقتاعان بولاتىن. بۇل چەمپيوناتتا جەڭىمپاز اتانعانداردىڭ دەنى ۇلتتىق قۇراما ساپىندا بۇرىننان جۇرگەن بوكسشىلار. ايتا كەتەرلىگى، 69 كەلىدەگى فينالدىق كەزدەسۋ ابىلايحان ءجۇسىپوۆ نەگىزگى قارسىلاسى اسلانبەك شىمبەرگەنوۆتى جەڭىپ، قۇراماداعى ءبىرىنشى ءنومىرلى بوكسشىنى انىقتاپ بەرگەندەي بولدى. وسىعان وراي، 69 كيلوداعى قازاقستان چەمپيونى ابىلايحان جۇسىپوۆپەن جەدەل سۇحباتتاسقان بولاتىنبىز.  

– بيىلعى پرەزيدەنت كۋبوگىنىڭ فينالىندا اسلانبەكپەن جولىڭ تۇيىسكەنىمەن، كەزدەسۋگە شىقپادىڭ. وسى جولى سول ولقىلىقتىڭ ورنى تولعانداي بولدى. جالپى، شىمبەرگەنوۆ سەنىڭ كوزقاراسىندا قانداي بوكسشى؟

– اسلانبەك الەۋەتى جوعارى، تاجىريبەلى بوكسشى. 69 كيلودا ەكى دۇركىن ەل چەمپيونى. سوندىقتان ونى وسال دەۋگە بولمايدى. جازدا وتكەن پرەزيدەنت كۋبوگىنىڭ فينالىندا جاراقات سالدارىنان جۇدىرىقتاسا المادىم. ناتيجەسىندە جەڭىمپاز اتانعان اسلانبەك ازيا ويىندارىنا اتتاندى.  

– ۇلتتىق قۇرامانىڭ وقۋ-جاتتىعۋ جيىندارىندا سپاررينگكە شىققان بولارسىڭدار. ول كەزدەرى باسىمدىق كوبىنە كىمدە بولۋشى ەدى؟

– ءبىز سپاررينگتە دە وتە سيرەك كەزدەستىك. سەبەبى ول «استانا ارلاندارىنىڭ» ساپىندا جۇرگەندىكتەن، بىرلەسىپ وتكىزگەن جاتتىعۋلارىمىز از بولدى. ال جاتتىعۋ بارىسىنداعى بوكستا تولىعىمەن اشىلمادىق دەپ ويلايمىن. نەگىزگى قارسىلاس بولعاندىقتان كوبىنە جۇمباق كۇيدە جۇردىك.

– الدا كوپتەگەن جارىستار بار. ەكەۋارا باسەكە ءالى دە جالعاسارى انىق...

- البەتتە! مەن چەمپيونات جەڭىمپازى بولعانىممەن، بۇل وليمپياداعا بىردەن اپاراتىن جولداما ەمەس. ءارى ءدال قازىر ء«جۇسىپوۆتى وليمپياداعا اپارامىز» دەپ ەشكىم دە كەسىپ ايتا المايدى. سوندىقتان، توكيو تۋرالى ايتۋعا ءالى ەرتە. ويتكەنى ىشكى بىرىنشىلىكتە مەنىڭ لايىقتى باسەكەلەستەرىم جەتكىلىكتى. ۇنەمى ۇزدىك ەكەنىڭدى دالەلدەپ وتىرماساڭ، قۇراماداعى نەگىزگى ورنىڭدى جوعالتىپ الاسىڭ. الدا ماڭىزدى تۋرنيرلەردە بيىكتەن كورىنۋگە ءتيىستىمىن.  

– شىمبەرگەنوۆ ەكەۋىڭ 69 كيلونىڭ ءار جىلدارداعى چەمپيونىسىڭدار. دەگەنمەن بۇل جولى وعان قارسى سترەلنيكوۆ سەنى ابدەن دايىنداعان ءتارىزدى...

– ارينە، ءبىز رينگكە ءبىر-ءبىرىمىزدى تولىق زەرتتەپ شىقتىق. جەكپە-جەكتەرىن قالت جىبەرمەي قاراپ، تولىق نازاردا ۇستادىق. فينالدا كوپ قاتەلەستىم دەپ ويلامايمىن. الەكساندر سترەلنيكوۆ مەنىڭ ەكىنشى باپكەرىم. قازىرگى سالماعىم بويىنشا بوكسشىلاردى باپتاۋدا وڭ ناتيجە كورسەتىپ، وليمپيادا چەمپيونىن شىعارعان مامان. الدا بىرلەسىپ جۇمىس ىستەپ، اۋىز تولتىرىپ ايتارلىقتاي ناتيجەگە جەتەمىز دەپ ۇمىتتەنەمىن.  

– 64 كيلودان 69 كيلوعا اۋىسقانىنا ەكى جىل بولدى. جالپى، سالماق اۋىستىرۋدا قيىندىق بولدى ما؟    

– اسا قيىندىق بولعان جوق. كەرىسىنشە، 64 كيلودا سالماق كوپ قۋىپ ءجۇردىم. نەگىزىنەن 69 كيلو مەنىڭ تۇراقتى سالماعىم.

– بىلتىرعى ازيا چەمپيوناتى مەن الەم بىرىنشىلىگىندە وزبەك بوكسشىسىن ۇتۋعا نە جەتىسپەدى؟

– ول كەزدە وليمپيادا جۇلدەگەرىمەن بوكستاسۋعا مەندە مۇمكىن تاجىريبە جەتپەگەن بولار. جاڭا سالماققا اۋىسقان ەكى جىلدان بەرى حالىقارالىق تۋرنيرلەردە باق سىناپ، گەرمانيا مەن فينليانديادا بولدىق. جارىستاردا مۇمكىندىگىمىزدى كورسەتۋگە تىرىستىق.  

– بۇل چەمپيونات 2020 جىلعى وليمپياداعا نەگىزگى قۇرامدى ىرىكتەپ بەردى دەۋگە بولا ما؟

– مۇنداي شەشىم قابىلداۋعا ءالى ەرتەلەۋ. چەمپيون اتانعانىممەن ءبىر ساتكە دە بوساڭسۋعا بولمايدى. الدا شىمبەرگەنوۆ سياقتى تاجىريبەلى بوكسشىلارمەن تالاي ايقاستار كۇتىپ تۇر. سوندىقتان باپكەرلەرمەن بىرلەسە وتىرىپ، 69 كيلودا №1 بوكسشى بولۋ ءۇشىن ەش ايانىپ قالمايمىن.    

ءسىز نە دەيسىز؟

مىرزاعالي ايتجانوۆ، بوكستان ۇلتتىق قۇرامانىڭ باس باپكەرى:

– بۇل ەكى بوكسشى رينگتە العاش رەت كەزدەسىپ، تورەشىلەر 5:0 ەسەبىمەن جەڭىستى ابىلايعا بەردى. جەكپە-جەككە قاتىستى اركىمدە ءتۇرلى پىكىر بولۋى مۇمكىن. بىرەۋ شىمبەرگەنوۆكە جاقتاسادى، ءبىرى ءجۇسىپوۆ مىقتى دەيدى. مەنىڭشە، ەكەۋى دە كەلەشەگىنەن زور ءۇمىت كۇتتىرەتىن، ايرىقشا سەنىم ارتىپ وتىرعان سپورتشىلار. جەكپە-جەكتە ەكەۋى بىرىنەن ءبىرى ايتارلىقتاي جوعارى بولعان جوق. تەڭ دارەجەدە وتكەن كەزدەسۋ بولدى دەۋگە ابدەن لايىق. بىراق... ءاربىر راۋندتىڭ ءسال باسىمدىلىعى كوزگە ايقىن كورىنىپ تۇردى. سول باسىمدىلىق ابىلايحاننان بايقالدى. تورەشىلەر دە سونى ەسكەرىپ، جەڭىستى جۇسىپوۆكە بەردى.  الدا جوسپار تۇزىلگەننەن كەيىن، حالىقارالىق جارىستارعا اپارىپ سىنعا سالامىز. سول كەزدە كىمنىڭ شىن مىقتى ەكەنى كورىنەدى.

اڭگىمەلەسكەن

جانكەلدى قارجان،

اقتاۋ قالاسى

سوڭعى جاڭالىقتار

ەلدىك نىشاندار تاريحى

قازاقستان • بۇگىن، 18:14

اتىراۋ: ءۇي قاماققا قامالعان قىز

ايماقتار • بۇگىن، 18:00

بيىل اۋىلعا تابيعي گاز جەتەدى

ايماقتار • بۇگىن، 14:29

ۇقساس جاڭالىقتار