نازارباەۆ ۋنيۆەرسيتەتى ەلىمىزدەگى بەلدى, بەدەلدى ۋنيۆەرسيتەتتەردىڭ بىرىنەن سانالادى. جوعارى وقۋ ورنىنىڭ ستۋدەنتتەرى الەمنىڭ ۇزدىك ۋنيۆەرسيتەتتەرى مەن ورتالىقتارىندا اعىلشىن تىلىندە بىلىمدەرىن شىڭدايدى. «Kazzinc Holdings» جشس ديرەكتورلار كەڭەسىنىڭ توراعاسى نيكولا پوپوۆيچ نازارباەۆ ۋنيۆەرسيتەتىنىڭ تاۋ-كەن ءىسى جانە جەر تۋرالى عىلىمدار مەكتەبى جانىنداعى يندۋستريالىق كەڭەستىڭ مۇشەسى بولىپ تابىلادى.
«بۇگىندە كوپتەگەن كاسىپورىندار بىلىكتى ماماندارعا ءزارۋ. بۇل ماسەلەگە دەموگرافيالىق جاعدايدىڭ دا اسەرىن جوققا شىعارۋعا بولمايدى. ءبىزدىڭ كاسىپورىنداردا جاسى ۇلعايعان, اقىل توقتاتقان, جۇمىس تاجىريبەسى مول, ءوز كاسىبىنىڭ مايتالمانى دەۋگە تۇرارلىق ماماندار جۇمىس ىستەيدى. بىراق ولار تسيفرلىق تەحنولوگيالاردان بەيحابار. ال جاس ماماندارعا تاجىريبە مەن ءبىلىم جەتىسپەي جاتادى, - دەيدى نيكولا پوپوۆيچ.
مەملەكەت باسشىسى قازان ايىنداعى جولداۋىندا ەلىمىزدىڭ ءبىلىم سالاسى جاڭارتۋدى قاجەت ەتەتىندىگىنە توقتالىپ, ءبىلىم ساپاسىن كوتەرىپ, تۇلەكتەردىڭ جۇمىسقا ورنالاسۋىنا كوڭىل ءبولۋ كەرەكتىگىن ەرەكشە اتاپ وتكەن ەدى.
«پرەزيدەنت ءبىلىم سالاسىنداعى تۇيتكىلدى ماسەلەلەردى ايتىپ قانا قويماي, ودان شىعۋدىڭ جولدارىن دا كورسەتتى. جولداۋ تۇتاستاي العاندا ءبىزدىڭ كومپانياعا, ونىڭ ءاربىر قىزمەتكەرىنە قاتىستى دەۋگە بولادى. جۇمىس بەرۋشى رەتىندە مەملەكەت باسشىسىنىڭ جوعارى وقۋ ورىندارىنداعى ءبىلىم ساپاسىن كوتەرۋ تۋرالى ۇستانىمىن تولىعىمەن قۇپتايمىز. ءوز جۇمىسىنا جەتىك, كاسىبي مامانداردى ازىرلەۋ – ءىرى كومپانيالار ءۇشىن دە, ۋنيۆەرسيتەت ءۇشىن دە اسا ماڭىزدى. جاستار تەحنيكالىق ءبىلىمدى كوبىرەك الۋى ءۇشىن وزگەرىستەر قاجەت. ءبىز بۇل شارۋاعا بەلسەنە ارالاسىپ, نازارباەۆ ۋنيۆەرسيتەتىمەن ىنتىماقتاستىق ورناتتىق. «قازتسينك» پرەزيدەنت جانىنداعى شەتەلدىك ينۆەستورلار كەڭەسىنىڭ وقۋ باعدارلامالارىن ازىرلەۋ جانە جەتىلدىرۋ جونىندەگى كوميسسياسىنىڭ قۇرامىنا ەنەدى», - دەيدى «قازتسينك» جشس اكىمشىلىك ماسەلەلەر جونىندەگى اتقارۋشى ديرەكتورى اندرەي لازارەۆ.
نازارباەۆ ۋنيۆەرسيتەتىنىڭ «تاۋ-كەن ءىسى» باعدارلاماسىنىڭ ۇيلەستىرۋشىسى دانيار مالعادجار «قازتسينكپەن» ىنتىماقتاستىق ستۋدەنتتەر ءۇشىن پايدالى ءارى جەمىستى بولعانىن ايتادى. «سالا كوشباسشىلارمەن بىرلەسە قولعا الىنعان مۇنداي جوبالار كەنشى ماماندارىنىڭ مارتەبەسىن جاڭا بەلەسكە كوتەرەدى. ويتكەنى, بولاشاق جاس ماماندارعا زاماناۋي ءوندىرىستى ءوز كوزدەرىمەن كورۋگە مۇمكىندىك بار. ءبىز ستۋدەنتتەرگە قىزمەتتىك باسپالداقتارىن, العان ءبىلىمىن قايدا جۇمسايتىن ناقتى كورسەتكىمىز كەلەدى. ۋنيۆەرسيتەتتىڭ ستۋدەنتتەرى تەك تاجىريبەدەن وتكەن جوق, قالىپتاسقان ۇلكەن ۇجىمنىڭ تىنىس-تىرشىلىگىمەن دە تانىستى», - دەيدى ول.
جوعارى وقۋ ورنىنىڭ وكىلدەرىن اسىرەسە قازتسينكتىكتەردىڭ ءوز جۇمىسىنا دەگەن قۇلشىنىسى تاڭعالدىرىپتى. ءبىر جارىم اي كولەمىندەگى تاجىريبە بارىسىندا ماگيسترانتتار ۇستازدارىنا باۋىر باسىپ قالعانداي. «مەن ورال قالاسىنىڭ تۋماسىمىن, ريددەردە ءبىرىنشى رەت بولدىم. ەرەكشە ءتانتى ەتكەنى, سۇلۋ تابيعات پەن مەيىرىمدى ادامدار.
مەنى «كازتسينك-شاحتوسترويدىڭ» ماركشەيدەر ءبولىمىنىڭ قىزمەتكەرى اناستاسيا كۋزنەتسوۆاعا بەكىتتى. ول بارلىعىن مۇقيات ءتۇسىندىرىپ, سۇراقتارىما جاۋاپ بەردى. شاحتاعا وزىمەن بىرگە الىپ ءتۇسىپ, ماركشەيدەر جۇمىسىنىڭ ءمانى مەن ماڭىزىن, ەرەكشەلىكتەرىن جاقسىلاپ ءتۇسىندىردى. مۇنداي ۇجىمدى كورگەنىمە وتە قۋانىشتىمىن. تاجىريبەمدى قىزىقتى وتكىزگەن بولىمگە, ۇستازىما العىسىمدى بىلدىرگىم كەلەدى», - دەيدى باعدارلاما قاتىسۋشىسى ايتولقىن يازيتوۆا.
ازامات قاسىم,
«ەگەمەن قازاقستان»
شىعىس قازاقستان وبلىسى
