دۇشپانىما بىلەمىن الاسامىن,
دوستارىما بيىكپىن, تاماشامىن.
اقيقاتى قازاقتىڭ اقىن قىزى,
قاي تورىڭە قويساڭ دا جاراسامىن, - دەگەن اقىننىڭ جىر شۋماعى جازىلعان ەسكەرتكىشتىڭ بيىكتىگى تۇعىرىمەن قوسا العاندا 6 مەترگە جۋىقتايدى.
قولادان قۇيىلعان تۋىندىنىڭ اۆتورى - بۇعان دەيىن اباي اۋدانىندا قۇنانباي مەن ۇلى اقىننىڭ ەسكەرتكىشتەرىن جاساعان تالانتتى جاس ءمۇسىنشى نۇربول قاليەۆ. «ول كىسى جاستايىنان جەتىم قالىپ, ءوزىنىڭ ەڭبەگىمەن, وجەتتىلىگىمەن, تالانتىمەن بيىك بەلەستەردى باعىندىرعان تۇلعا. سەمەيگە ءوزى بارىپ ءبىلىمىن شىڭداعان. اباي اۋدانىندا كومسومول قاتارىندا بولعان. سول جەردە ونىڭ انشىلىك قابىلەتىن ءبىرىنشى بايقاعان جازۋشى مۇحتار اۋەزوۆ ەكەن. الماتىعا جەتەلەپ اكەلگەن دە - مۇحاڭ. عابيت مۇسىرەپوۆ باستاعان ۇلىلار بۇل كىسىنىڭ تالانتىن باعالادى. قازاقستاننىڭ حالىق جازۋشىسى, مەنىڭ ۇستازىم ءازىلحان نۇرشايىقوۆ اعامىز ول كىسىنىڭ ءتورت قاسيەتىن - انشىلىگىن, اقىندىعىن, عالىمدىعىن جانە قايراتكەرلىگىن بولە جارا ايتۋشى ەدى.
ولجاس سۇلەيمەنوۆ باستاعان «نەۆادا-سەمەي» انتيادرولىق قوزعالىسىنا بەلسەنە ارالاسىپ, سوناۋ سانكت-پەتەربۋرگتە قوزعالىستىڭ بولىمشەسىن قۇردى. كەيىن ەلىمىزگە شەت ەلدىكتەر كەلىپ, جەرىمىزدىڭ بايلىعىن توناي باستاعان كەزدە «سويلە, قالام» دەگەن كىتاپ جازىپ, جانايقايىن جەتكىزدى. تۇتاستاي العاندا, سانالى عۇمىرىن حالقىنا ارناعان ەرەكشە جان ەدى. وسى رەتتە تۇرسىنحاننىڭ ۇلى, جوقتاۋشىسى رەتىندە كۇللى جازۋشىلار اتىنان الاشقا اياۋلى تۇلعانىڭ ەسىمىن ۇمىتپاي, ۇلىقتاپ جاتقان جارمالىق ازاماتتارعا, اۋدان باسشىسى نۇرلان سىدىقوۆقا شىنايى العىسىمدى بىلدىرەمىن», - دەدى ەسكەرتكىشتىڭ اشىلۋىندا ءسوز العان جازۋشى, مەملەكەتتىك سىيلىقتىڭ يەگەرى ءسابيت دوسانوۆ.
سەگىز قىرلى, ءبىر سىرلى تۇلعا ەسىمىن ۇلىقتاۋعا ارنالعان مەرەيتويلىق شارالار ودان ءارى «وركەندى ولكە - مەرەيلى مەكەن» دەگەن اتاۋمەن اۋدان كۇنى اياسىندا اتالىپ ءوتىپ, رەسپۋبليكالىق عىلىمي-تاجىريبەلىك كونفەرەنتسيامەن جالعاستى. كونفەرەنتسيادا ادەبيەتتانۋشى - عالىمدار سەرىكقازى قوراباي مەن راقىمجان تۇرىسبەك ت.ءابدىراحمانوۆانىڭ شىعارماشىلىعى تۋراسىندا بايانداما جاسادى. س.قوراباي ءوز سوزىندە اقىننىڭ اياقتالماي قالعان 5 تومدىق شىعارمالار جيناعى دايىندالىپ, شىعارىلسا, سەمەي, الماتى جانە استانا قالالارىنداعى كوشەلەرگە عالىم ەسىمى بەرىلسە دەگەن ۇسىنىسىن جەتكىزدى.
ازامات قاسىم,
«ەگەمەن قازاقستان»
شىعىس قازاقستان وبلىسى,
جارما اۋدانى,
قالباتاۋ اۋىلى
سۋرەتتى تۇسىرگەن جاقسىلىق مۇراتقالي
