كونفەرەنتسياعا ۇلىبريتانيا, فينليانديا, اقش, قىتاي, رەسەي, گەرمانيا, نيدەرلاندى, نورۆەگيا, ارمەنيا, وزبەكستان, قىرعىزستان جانە تاعى باسقا الىس-جاقىن شەتەلدەن كەلگەن ەكى مىڭنان اسا عالىم مەن مۇعالىم قاتىستى. سونىمەن قاتار ەلىمىزدىڭ تۇكپىر-تۇكپىرىنەن كەلگەن ەڭ ۇزدىك مۇعالىمدەر دە قاتىسىپ, ءوز ويلارىن ورتاعا سالدى.
حالىقارالىق كونفەرەنتسيادا شەتەلدىڭ بەدەلدى ساراپشىلارى مەن سپيكەرلەرى قاتىسۋشىلارعا ارنايى ءدارىس وقىدى. اتاپ ايتار بولساق, كەمبريدج ۋنيۆەرسيتەتى ءبىلىم فاكۋلتەتىنىڭ دەكانى سيۋزان روبەرتسون ء«ححى عاسىر داۋىرىندەگى جاھاندىق بىلىكتىلىكتەرگە يە وقۋشىعا اينال: قيىندىقتار مەن فاكتىلەر», لوندون ۋنيۆەرسيتەتتىك كوللەدجى ءبىلىم ينستيتۋتىنىڭ قۇرمەتتى پروفەسسورى, اتى اڭىزعا اينالعان پەداگوگ-پسيحولوگ شالۆا اموناشۆيلي «مەكتەپكە دەيىنگى ءبىلىم بەرۋدەگى گۋمانيتارلىق پەداگوگيكانىڭ تاجىريبەسى», گونكونگ ۋنيۆەرسيتەتىنىڭ ءبىلىم سالاسى دەپارتامەنتىنىڭ ديرەكتورى, قىتاي ءبىلىم جۇيەسىندەگى رەفورماتورلاردىڭ ءبىرى كاي-مينگ چەن ء«بىلىم مەن عىلىمنىڭ ماڭىزى تۋرالى», EduCluster Finland – يننوۆاتسيا جانە سىرتقى بايلانىس ديرەكتورى, فيندىك ءبىلىم جۇيەسىنىڭ يننوۆاتورى دەۆيد مارش «CLIL مانماتىنىندە وقىتۋ مەن وقۋ قالاي وزگەرەدى؟» جانە ماسساچۋسەتس تەحنولوگيا ينستيتۋتىنىڭ پروفەسسورى توماس حاۋس «وقۋشىلارعا نەگىزگى حيميانى قالاي جەڭىلدەتۋگە بولادى» تاقىرىبىندا ءوز ءدارىس وقىپ, ءوز تاجىريبەلەرىمەن ءبولىستى.
استاناداعى كونفەرەنتسيا 12 باعىتتا جۇمىس ىستەپ, 50-دەن اسا ءتۇرلى ءىس-شارا ءوتتى. جيىندا ءبىلىم جۇيەسىندەگى وزگەرىستەر, مۇعالىمدەردى وقىتۋ, كاسىبي دامىتۋ جانە ولاردىڭ جان-جاقتى وركەندەۋى, ورتا ءبىلىم كۋرريكۋلۋمىنداعى يننوۆاتسيا مەن تەندەنتسيا جونىندەگى پلەنارلىق جانە سەكتسيالىق ارنايى وتىرىستار دا ۇيىمداستىرىلدى. سونىمەن قاتار ءار ءتۇرلى فورماتتاعى جۇمىس, ياعني, باياندامالار, شەبەرلىك ساعاتتارى, پرەزەنتاتسيالار, دوڭگەلەك ۇستەلدەر, پانەلدىك ديسكۋسسيالار, سەمينارلار, پوستەر-سەسسيالار مەن ءبىلىم رەسۋرستارىنىڭ كورمەسى دە ۇيىمداستىرىلدى.
نازارباەۆ زياتكەرلىك مەكتەپتەرى» دەربەس ءبىلىم بەرۋ ۇيىمىنىڭ باسقارما ءتورايىمى كۇلاش ءشامشيدينوۆانىڭ ايتۋىنشا, كونفەرەنتسياعا قاتىسۋعا ءوتىم بەرگەندەردىڭ سانى وتە كوپ بولعاندىقتان ەڭ ۇزدىك دەگەندەرىن تاڭداپ العان. «بيىلعى حالىقارالىق كونفەرەنتسيانىڭ ءبىر ەرەكشەلىگى – مىڭنان اسا عىلىمي بايانداما كەلىپ ءتۇستى. وسى بايانداما بويىنشا ەكسپەرتتىك توپ جۇمىس ىستەپ, تاڭداپ الىنعان 200 بايانداما تىڭدالىمعا جىبەرىلدى. سونداي-اق ەلىمىزدىڭ جانە شەتەلدىڭ مۇعالىم, ديرەكتورلارى وزدەرىنىڭ باياندامالارىمەن شىعىپ جاتىر», دەيدى ك.ءشامشيدينوۆا.
وسىمەن سەگىزىنشى رەت ۇيىمداستىرىلعان ەكى كۇندىك استانالىق كونفەرەنتسيا وتاندىق جانە عالامدىق ءبىلىم سالاسىنىڭ ەڭ وزەكتى ماسەلەلەردى تالقىلاۋعا ارنالعان عىلىم الەمىندەگى بەدەلدى الاڭعا اينالىپ ۇلگەردى.
ءالي بيتورە,
«ەگەمەن قازاقستان»
