ءوزىنىڭ ءار جەڭىسىنەن كەيىن «قارا جورعانى» ناقىشىنا كەلتىرىپ بيلەيتىن 31 جاستاعى قايرات احمەتوۆتى جانكۇيەرلەر جاقسى بىلەدى. «قازاق» دەگەن بۇركەنشىك ەسىممەن تانىمال قانداسىمىز «الاش پرايد» كلۋبىنىڭ قاتارىنا قوسىلىپ, 2010 جىلدان بەرى كاسىپقويلار اراسىندا باق سىناپ ءجۇر. العاشقى جەتى جىلدا ول بىردە-ءبىر رەت جەڭىلگەن جوق ەدى. تىپتەن, 2015 جىلدىڭ 21 قاراشاسىندا برازيليالىق ادريانو موراەستى ۇتىپ, ONE عس ۇيىمىنىڭ چەمپيوندىق بەلبەۋىن يەلەندى. باسقا دا حالىقارالىق جارىستاردا احمەتوۆ ايقىن جەڭىستەرگە قول جەتكىزدى.
العاش رەت قايرات 2017 جىلدىڭ 5 تامىزىندا ءدال سول ادريانو موراەستەن قارىمتا كەزدەسۋدە جەڭىلدى. 2018 جىلى 26 اقپانىندا فيليپيندىك دجەحە ەۋستاكيوعا ەسە جىبەردى. ەكى رەتىندە دە قانداسىمىز ۇپاي سانىمەن عانا ۇتىلدى. وسىدان ءبىر ايدان اسا ۋاقىت بۇرىن وتكىزگەن ءوزىنىڭ سوڭعى جەكپە-جەگىندە قازاق سپورتشىسى قىتايلىق ما حاو بيننەن باسىم ءتۇستى. بارلىعى ول 20 كەزدەسۋ وتكىزىپ, 18 رەت جەڭىسكە جەتتى. 11 قارسىلاسىن ايقىن ۇتتى.
قايرات احمەتوۆكە قارسىلاس اتانۋى مۇمكىن دەمەتريۋس دجونسون 32 جاستا. اقش-تىڭ كەنتۋككي شتاتىننىڭ تۋماسىنىڭ كۇنى بۇگىنگە دەيىن باعىندىرماعان بەلەسى جوق. 2012 جىلدىڭ كۇزىندە UFس ۇيىمىنىڭ چەمپيوندىق بەلبەۋىن يەلەنگەننەن سوڭ ول سول اتاعىن 11 مارتە ءساتتى قورعادى. بۇل – رەكوردتىق كورسەتكىش! ۇستىمىزدەگى جىلدىڭ 4 تامىزىندا ءوز وتانداسى گەنري سەحۋدودان ۇپاي سانىمەن ۇتىلىپ, التىن بەلبەۋدەن ايىرىلدى. «قۋاتتى تىشقان» دەگەن بۇركەنشىك ەسىممەن تانىلعان دجونسون بارلىعى 31 كەزدەسۋ وتكىزىپ, 27 رەت جەڭىسكە جەتتى. 15 جەكپە-جەگىن مەرزىمىنەن بۇرىن اياقتادى. ءۇش رەت ۇتىلىپ, ءبىر باسەكەدە تەڭ ەسەپ تىركەلدى.
دەمەتريۋس دجونسوننىڭ ONE عس ۇيىمىنا اۋىساتىنىن ەستىپ قاتتى قۋاندىم. تىپتەن, شاتتاندىم دەسە دە بولادى. ول ەرەجەسىز جەكپە-جەكتە عانا ەمەس, كۇللى سپورت الەمىندە تۇبەگەيلى مويىندالعان تۇلعا. ءدال وسىنداي دەڭگەيى اسا جوعارى, اتى اڭىزعا اينالعان سپورتشىمەن ايقاسۋ مەنىڭ كوپتەن بەرگى ارمانىم ەدى, – دەيدى قايرات احمەتوۆ.
راسىندا دا, بۇل ءبىر كەرەمەت ايقاس بولاتىن ەدى. اسىرەسە, قازاق جانكۇيەرلەرىنىڭ ەرەكشە شاتتاناتىنى انىق. ويتكەنى, ەرەجەسىز جەكپە-جەكتى سەرىك ەتەتىن جىگىتتەرىمىزدىڭ دەنى كوبىنە-كوپ دەڭگەيى تومەن نەمەسە ورتاڭ قول سپورتشىلارمەن ايقاسىپ جۇرگەنى جاسىرىن ەمەس. ونداي «ۇسقىنسىز كورىنىستەر» جانكۇيەرلەردى دە جالىقتىردى. ولاي بولسا, قايرات احمەتوۆكە اق جول تىلەيىك. قانداسىمىزدىڭ جوسپارى جۇزەگە اسىپ, دەمەتريۋس دجونسونمەن ايقاس الاڭىندا جولىقسىن!
عالىم سۇلەيمەن,
«ەگەمەن قازاقستان
