جوبا قازاقستان پرەزيدەنتى ن. نازارباەۆتىڭ «بولاشاققا باعدار: رۋحاني جاڭعىرۋ» اتتى ماقالاسىنان تۋىنداپ وتىر. جوعارى وقۋ ورنىنىڭ بريگاداسى ءوزىنىڭ ءۇش كۇندىك تانىمدىق ساپارى بارىسىندا وكرۋگتىڭ اقتۇما, چەركاسسك جانە قارعالى اۋىلدارىنداعى ورتا مەكتەپتەردە بولىپ, وقۋ ورىندارى اراسىندا بايلانىس ورناتۋ جونىندە كەلىسىم جاساستى.
ءبىز وسىعان وراي دەلەگاتسيا باسشىسى, قازاق مەملەكەتتىك قىزدار پەداگوگيكالىق ۋنيۆەرسيتەتى تاربيە جانە الەۋمەتتىك جۇمىستار جونىندەگى دەپارتامەنتىنىڭ ديرەكتورى جاڭاگۇل سۇلتانوۆامەن كەزدەسىپ, ساپار بارىسى جايىندا كەڭىرەك مالىمەت بەرۋىن سۇراعان ەدىك.
– ساپاردى اقتۇما اۋىلىنداعى پەتروپاۆل ورتا مەكتەبىنەن باستادىق. مۇندا مەكتەپ ديرەكتورى باۋىرجان يبرايىموۆامەن ەكى وقۋ ورنى اراسىنداعى بايلانىس جونىندە كەلىسىم جاساسقاننان كەيىن ۋنيۆەرسيتەتتىڭ «ۇماي انا» ۇيىرمەسىنىڭ فيليالىن اشۋ ءراسىمىن وتكىزدىك. مۇنداعى باستى ماقسات – قازىرگى قوعامدىق ورتادا ازاماتتىق ۇستانىمدارى بار, العان ءبىلىمىن تاجىريبە جۇزىندە ۇشتاستىرا بىلەتىن, پاراساتتى, سالت-ءداستۇر مەن مادەنيەتتى دارىپتەيتىن, بۇگىنگى ومىرگە بەيىم, شىنايى جان-جاقتى دامىعان قىزداردى قالىپتاستىرۋ, اۋىل مەكتەپتەرىندەگى ادەبي شىعارماشىلىقپەن اينالىساتىن جاس تالاپ قىزداردىڭ تۋىندىلارىمەن تانىسىپ, ولارعا قولما-قول باعىت بەرۋ. ءبىزدىڭ تاراپىمىزدان بولعان بۇل ۇسىنىستى مەكتەپ باسشىلىعى وتە جاقسى قابىلدادى. سول جەردە ۇيىرمەمىزدىڭ جاڭا مۇشەلەرىنىڭ دە بىرقاتارىمەن تانىسىپ ۇلگەردىك. بۇدان كەيىن اۋىل تۇرعىندارى مەن مەكتەپ ۇجىمى الدىندا قوناقكادەلىك دارىستەرىمىزدى وقىدىق. ولاردا ونەرتانۋ عىلىمىنىڭ مۇمكىندىكتەرى مەن سالالارى, مەكتەپ وقۋشىلارىنىڭ اتا-انا مەن مۇعالىم, قورشاعان ورتاعا دەگەن قارىم-قاتىناسىن جاقسارتۋدىڭ جولدارى مەن تاسىلدەرى, وقۋشىلاردىڭ ءوسۋ پروتسەسىندە, ولاردىڭ جاس جانە جەكە پەداگوگيكالىق-پسيحولوگيالىق ەرەكشەلىكتەرىنە قاراي قاقتىعىستىڭ سەبەپتەرى مەن سالدارلارىن انىقتاۋ جانە ولاردى شەشۋدىڭ جولدارى تۋرالى كەڭىنەن ءسوز بولدى. سوڭىنان ۋنيۆەرسيتەتىمىزدىڭ «توميريس» بي ءانسامبلى كونتسەرت قويدى.
كەلەسى كۇنى وكرۋگتىڭ چەركاسسك اۋىلىنا ايالدادىق. مۇندا ءبىز بىرقاتار تاريحي جەرلەرمەن تانىستىق. ازامات سوعىسى كەزىندە چەركاسسك قورعانىسىنىڭ ورنى بولعان تاريحي مەكەن بولعان بۇل اۋىلدا كورەتىن نارسەلەر از ەمەس ەكەن. سونىڭ ءبىرى وسىنداعى تاريحي-ولكەتانۋ مۋزەيى بولدى. بۇل جەردە دە مەكتەپ باسشىلىعىمەن ءوزارا بايلانىس جونىندەگى كەلىسىمگە وتىردىق. مۇندا دا «ۇماي انا» ۇيىرمەسىنىڭ جەرگىلىكتى بولىمشەسى قاز تۇرىپ, قانات قاقتى. ءبىزدىڭ وقىعان لەكتسيالارىمىز بۇل اۋىلدىڭ تۇرعىندارى مەن مەكتەپ ۇجىمىنىڭ كوڭىلىنەن شىقتى. مۇنى جينالعاندار تاراپىنان ءتۇرلى سۇراقتاردىڭ قويىلىپ, تاقىرىپقا قىزىعۋشىلىق تانىتۋى انىق بايقاتتى. ءبىز مۇنداي جىلى شىرايلى قاۋىشۋدى ءۇشىنشى كۇنى قارعالى اۋىلىنداعى ورتا مەكتەپتەن دە كوردىك. بارلىق جەرلەردە ءبىزدىڭ باستامالارىمىز بارىنشا جىلى قابىلداندى. ال ۋنيۆەرسيتەتتىڭ كىتاپحانا ءبولىمىنىڭ مەڭگەرۋشىسى مايراش اكىمجانوۆا جينالعانداردى رۋحاني جاڭعىرۋ تاقىرىبىندا جارىق كورگەن 17 كىتاپتىڭ مازمۇنىمەن تانىستىردى. ءبىر سوزبەن ايتقاندا, بريگادا ءوزىنىڭ الدىنا قويىلعان ماقسات پەن مىندەتتى تولىق ورىنداپ قايتتى. ەندى جاڭا باستالعان بايلانىس بۇدان ءارى ورىستەي تۇسەتىن بولادى. «تۋعان جەرگە تاعزىم» جوباسى جۇمىسىن جالعاستىرا بەرەدى.
