«جوعارى ءبىلىم سالاسىندا وقۋ ورىندارىنا تالاپتار قاتايا تۇسەدى. گرانتتاردىڭ سانىن وسىردىك. ەندىگى كەزەكتە جاۋاپكەرشىلىكتى ارتتىراتىن ۋاقىت كەلدى. جوو-نىڭ تابىستىلىعىنىڭ باستى تالابى - وقۋ بىتكەننەن كەيىن ستۋدەنتتەردىڭ جۇمىسپەن قامتىلۋى, ولاردىڭ جوعارى ايلىعى بار جۇمىسقا ورنالاسۋى بولماق. ۋنيۆەرسيتەتتى بىتىرگەننەن كەيىن - تۇلەكتەردىڭ ءحالى نە بولدى, ولاردى ايلىعى جاقسى جۇمىسقا قابىلدادى ما؟ سولاي بولسا, دەمەك, ۋنيۆەرسيتەت مىقتى دەگەن ءسوز. ولاي بولماسا, بۇل ۋنيۆەرسيتەتتىڭ ومىرشەڭدىگى دە جوق. ول ۋنيۆەرسيتەتكە ستۋدەنتتەردىڭ تۇسپەيتىنى انىق», - دەدى پرەزيدەنت.
«وسى جىلى بارلىق ۋنيۆەرسيتەتتەر تۇلەكتەردى دايىنداپ شىعاردى. قاي ۋنيۆەرسيتەتتەن قانشاسى جۇمىسقا ورنالاسا الدى؟ ول تۋرالى جاريالى تۇردە ايتىپ, باسپاعا جاريالاپ, تەلەارنادان كورسەتۋ كەرەك. مىنە, سوندىقتان جوو-لاردى ىرىلەندىرۋ ساياساتىن جۇرگىزۋ كەرەك. ءبىزدىڭ ەلدە 130-دان استام ۋنيۆەرسيتەت بار. شىنى كەرەك, ولاردىڭ سانى بۇرىن 200-گە جۋىق ەدى. البەتتە, جوو-لارعا قارسى ەمەسپىن, كىمنىڭ قايدا وقىسى كەلسە, سوندا وقىسىن. بىراق, ەشكىمگە قاجەت بولماي قالاتىن ادامداردى دايىنداۋدىڭ, جاي ديپلوم بەرە سالۋدىڭ كەرەگى نە؟» - دەدى مەملەكەت باسشىسى.
«نارىقتا تەك جوعارى ءبىلىم بەرە الاتىن جوو-دار قالۋى كەرەك. جاھاندىق ۋنيۆەرسيتەتتەرمەن ىنتىماقتاستىقتى جالعاستىرىپ, نازارباەۆ ۋنيۆەرسيتەتىنىڭ تاجىريبەسى بويىنشا الەمنىڭ ۇزدىك توپ-مەنەدجەرلەرىن تارتۋ كەرەك. البەتتە, نازارباەۆ ۋنيۆەرسيتەتىنە قوماقتى قاراجات ءبولىنىپ جاتىر دەۋى دە مۇمكىن. بىراق, باسقا ۋنيۆەرسيتەتتەر - الماتىداعى ەكونوميكا جانە ساۋدا ۋنيۆەرسيتەتى مە ەدى - تارتىپ جاتىر عوي. ولار دا ءساتتى جۇمىس ىستەۋدە. قازۇۋ-دا سولاي ءساتتى جۇمىس بابىندا. قازىرگى ءبىلىم بەرۋ ينفراقۇرىلىمىنىڭ بازاسى نەگىزىندە نازارباەۆ ۋنيۆەرسيتەتىنىڭ ۇلگىسى بويىنشا تاعى ءبىر ايماقتىق جوو اشۋ كەرەك دەپ ەسەپتەيمىن», - دەدى پرەزيدەنت.
