بيىلعى بۇل تۋرنيرگە قاتىسۋشىلار قاتارى كوپ بولدى. تۋرنير ەكى ساناتتا ءوتتى: ەرلەر جەكە رازريادى جانە جۇپتىق رازرياد (Pro-Am mix). العاشقىسىنا 29 تەننيسشى قاتىسسا, كەلەسىسىندە اۋەسقوي ەرلەر مەن كاسىپقوي قىزداردىڭ ون ەكى جۇبى باق سىناستى.
تەننيس باسەكەسىنىڭ جۇلدىزدى قاتىسۋشىسى رەتىندە سەرگەي شاحۆوروستوۆتى ايتۋعا بولدى. كاسىبي سپورتشى شوپتەگى حوككەيدەن ۇلكەن جەتىستىكتەرگە جەتكەن. الماتىلىق «دينامومەن» بىرگە سەگىز رەت كسرو چەمپيوناتىن جەڭىپ, ەكى رەت كسرو كۋبوگىنىڭ يەگەرى اتاندى, وداق قۇراماسىمەن بىرگە 1988 جىلعى وليمپياداعا قاتىستى. سول تۇستا ول تەننيسپەن اۋەستەنەدى, ناتيجەسىندە حوككەيشى شاحۆوروستوۆ مانسابىن اياقتاعاننان كەيىن اۋەسقوي تەننيس تۋرنيرلەرىندە ونەر كورسەتە باستادى. قازىر سەرگەي كونستانتينوۆيچ – الماتىنىڭ ەڭ اتاقتى ويىنشىلارىنىڭ ءبىرى. «ارينە, مەن ForteOpen-دە جەڭۋگە نيەتتىمىن, جەڭە الماسام دا وكىنبەيمىن. مەن ءۇشىن ەڭ باستىسى – ۋاقىتتى جاقسى وتكىزۋ, ءبىر اپتاعا قۋات الىپ, سەرگۋ جانە دوستارىمەن كەزدەسۋ», دەدى شاحۆوروستوۆ جارىس الدىندا.
جارىستاعى كاسىبي تەننيسشىلەر اراسىنداعى ەڭ تانىمال قاتىسۋشى قىرعىزستاندىق 28 جاسار كسەنيا پالكينا بولدى. ول وسىدان ءبىر اپتا بۇرىن شىمكەنت قالاسىندا ITF سەرياسىندا جەڭىسكە جەتىپ, 36 دۇركىن «فيۋچەرستىڭ» چەمپيونى اتانعان. «مەن ءۇشىن ForteOpen – بەدەلدى تۋرنير, سوندىقتان مەن وسىمەن ءۇشىنشى جىل قاتارىنان ونەر كورسەتىپ جاتىرمىن. اۋەسقويلارمەن دە, كاسىپقويلارمەن دە ويناۋ وتە قىزىقتى. مۇندا تاماشا اتموسفەرا قالىپتاسقان, جاقسى ادامدار بار», دەپ اعىنان جارىلدى ك.پالكينا. ول ForteOpen-نەن كەيىن ۇندىستانداعى WTA سەرياسىنىڭ تۋرنيرىندە ونەر كورسەتەدى, سودان كەيىن ونى فرانتسيا كۇتۋدە, وندا بىرنەشە «فيۋچەرستەر» وتەدى.
جارىستان تۇسكەن بارلىق قاراجات بالالار تەننيسىن دامىتۋعا جۇمسالادى. قىستا ۇلكەن تەننيسپەن كاسىبي اينالىساتىن بالالارعا ارنالعان رەسپۋبليكالىق تۋرنير وتپەك. ء«بىزدىڭ قىزمەتىمىزدىڭ ماڭىزدى قۇرامداس بولىگى الەۋمەتتىك جوبالاردى, سونىڭ ىشىندە بالالار سپورتىن دامىتۋعا باعىتتالعان جوبالاردى قولداۋ بولىپ تابىلادى. تەننيس تۋرنيرلەرىن وتكىزۋ ءبىز ءۇشىن جاقسى داستۇرگە اينالدى: ForteBank Open 3 ءتۋرنيرى – بىزگە كوپتەگەن جاعىمدى ەموتسيالار سىيلاعان جارقىن سپورتتىق وقيعا», دەيدى ForteBank باسقارما توراعاسى گۋرام اندرونيكاشۆيلي.
تارتىستى وتكەن تەننيس ويىنىنىڭ ناتيجەسىنە كەلسەك, كاسىبي شەبەرلەر اراسىندا ءبىرىنشى ورىندى دميتري دميتريەۆ يەلەندى. ەكىنشى ورىندى مۇحتار جانسەيىتوۆ ەنشىلەسە, ميرسايد ميردجاليەۆ ءۇشىنشى تۇعىردان كورىندى. ال اۋەسقويلار اراسىندا احمەت ۋماروۆ توپ جارسا, جان بەنياتينوۆ پەن ۆاسيلي پوپوۆ ەكىنشى, ءۇشىنشى ورىنداردى ءوزىارا ءبولىستى.
كاسىبي شەبەرلەر اراسىنداعى جۇپتىق سايىستا يۋي كونستانتين مەن داريا بەرەجنايا ءبىرىنشى ورىنعا قول جەتكىزسە, گۋرام اندرونيكاشۆيلي مەن كسەنيا پالكينا ەكىنشى ورىندى ەنشىلەدى. ءۇشىنشى ورىن انتون كومەنكو مەن يانا سيزيكوۆاعا بۇيىردى. اۋەسقويلار اراسىنداعى جۇپتىق جارىستا دەنيس ۆالەتوۆ پەن لاريسا بەكمەتوۆا ۇزدىك دەپ تانىلدى. يسلام دجەكسەنوۆ پەن اسەل تۋزەلبەكوۆا ەكىنشى ورىندى, رۋستەم بەكتۋروۆ پەن ەكاتەرينا دميتريچەنكو ءۇشىنشى ورىندى يەلەندى.
ءالي بيتورە,
«ەگەمەن قازاقستان»
