جيىندا مەملەكەت باسشىسى شىمكەنت قالاسىن دامىتۋ ءۇشىن جاسالۋى ءتيىس جۇمىستارعا توقتالىپ, شاھاردى وركەندەتۋدىڭ بىرنەشە باعىتىن اتاپ كورسەتتى. اسىرەسە, شىمكەنتتى جاڭا دەڭگەيگە كوتەرۋ ءۇشىن تۋريزم سالاسىنا ەرەكشە دەن قويۋ قاجەتتىگىن جەتكىزدى.
«مۇندا وپەرا جانە بالەت تەاترى, دەندروباق, زووباق, كونتسەرت زالدارى, تەاترلار, مۋزەيلەر جانە تاعى باسقا قوعامدىق ورىندار كوپ. مۇنداي مادەني ورتالىقتار كوپ جەردە جوق, ال شىمكەنتتە ءبارى بار», دەدى ن.نازارباەۆ.
ەلباسى مۇنداي ورتالىقتار شاھاردىڭ وركەندەي تۇسۋىنە وڭ سەرپىن بەرەتىنىن ايتىپ ءوتتى.
سونىمەن قاتار ءتۋريزمدى دامىتۋ جول جانە كولىك ينفراقۇرىلىمدى جاقسارتۋ قاجەتتىگىن تاپسىردى.
«تۋريزم دەگەن ءسوزدى قازاق ونشا بىلە بەرمەيدى. قازىرگى تاڭدا قوجا احمەت ياسساۋي كەسەنەسىنە جىلىنا ميلليوننان استام ادام كەلەدى. الەمدە تۋريزم – بيزنەستىڭ ەڭ ۇلكەن سالاسى, ەڭ تابىستى كوزى. ءبىز دە وسىعان ۇمتىلۋىمىز قاجەت. قازاقستانعا كەلگىسى كەلەتىن, كورگىسى كەلەتىن ادام كوپ. وسىنى ەسكەرىپ, اۋەجاي, تەمىر جول ۆوكزالى, اۆتوۆوكزال سەكىلدى قوعامدىق كولىك جوعارى دەڭگەيگە كوتەرىلۋى ءتيىس. شىمكەنت – تۋريستەر ءۇشىن تارتىمدى ورتالىققا اينالۋى كەرەك», دەدى پرەزيدەنت.
مەملەكەت باسشىسى اتالعان مىندەتتەردى ورىنداۋعا ۇكىمەت تە, اكىمشىلىك تە كومەكتەسەتىنىن جەتكىزدى. بىلتىر سوچي قالاسىندا وتكەن تمد ەلدەرى باسشىلارى كەڭەسىندە 2020 جىلى شىمكەنت قالاسى تمد-نىڭ مادەني استاناسى اتانادى دەپ جاريالانعان بولاتىن. ن.نازارباەۆ وسىعان نازار اۋدارىپ, دايىندىق جۇمىستارىن پىسىقتاۋدى تاپسىردى.
بۇدان كەيىن وزبەكستانمەن شەكارالىق فورۋم وتكىزۋدى جوسپارلاۋدى تاپسىرىپ, وتاندىق تاۋارلاردى كورشى ەلدىڭ نارىعىنا شىعارۋدىڭ ماڭىزدىلىعىنا توقتالدى.
«ۇكىمەت پەن قالا اكىمشىلىگى بىرلەسىپ, شىمكەنتتە حالىقارالىق دەڭگەيدەگى ءىس-شارالاردى وتكىزۋ جوسپارلارىن ازىرلەۋدى تاپسىرامىن. استانا مەن الماتىدا ءتۇرلى حالىقارالىق جيىندار ءوتىپ جاتىر. ەندى شىمكەنتتى دە سول قاتارعا قوسىپ, حالىقارالىق ءىس-شارالار وتەتىن الاڭعا اينالۋى كەرەك. ول ءۇشىن ءتيىستى عيماراتتار – كونفەرەنتس زالدار, كونگرەس حولل سالىنۋ قاجەت», دەدى ن.نازارباەۆ.
سونداي-اق ەلباسى اۋا رايىنىڭ قولايلى بولۋى قويىلعان تاپسىرمالاردى جەدەل جۇزەگە اسىرىپ, شىمكەنت قالاسىن دامىتۋعا وڭ سەرپىن بەرەتىنىنە سەنىم ءبىلدىردى.
اباي اسانكەلدى ۇلى,
«ەگەمەن قازاقستان»
شىمكەنت قالاسى
