ونىڭ ايتۋىنشا, سول اتا-انالاردىڭ قانشاسى بالاسىنا كىتاپ اپەرىپ ءجۇر؟ قانشاسى بالاسىن كىتاپحاناعا جەتەكتەپ باردى ەكەن؟ قانشاسى ارنايى گازەت-جۋرنالعا جازىلادى؟ بالالارىنا ماقساتتى تۇردە گازەت-جۋرنال جازدىرىپ بەرىپ, ونى بىرگە وقيتىن, تالقىلايتىن قازىبەك قۇتتىمۇرات ۇلى سەكىلدى اتا-انا بىزدە سيرەك. ودان گورى «بالام گادجەتتەردى شەمىشكەشە شاعادى» دەۋ ابىرويلىراق. وسىنداي ۋاقىتتا بالالار باسىلىمىن شىعارۋ دا وڭاي ەمەس.
باياعى «پيونەر» مەن «قازاقستان پيونەرىن», بۇگىنگى «اق جەلكەن» مەن «ۇلاندى» شىعارامىز. بۇلدىرشىندەرگە ارنالعان «بالدىرعانىمىز» بار. بۇگىنگى زاماننىڭ بالالارىنىڭ تالعامىنا ساي بولسىن, بالالار وزىنە قاجەتىن تاپسىن دەپ, بارىمىزدى سالامىز, دەيدى بالالار باسىلىمىنىڭ باسشىسى.
قازىر ەكى بالانىڭ ءبىرى شەتەلدە وقىعىسى كەلەدى عوي, وسىنى ەسكەرىپ, دامىعان ەلدەردە وقىعان, وقىپ جاتقان, جۇمىس ىستەپ جۇرگەن جاستاردى ۇزبەي جاريالايمىز. تەك قانا «بولاشاق» باعدارلاماسىمەن ەمەس, ءوز بەتىمەن گرانت يەلەنىپ, ءبىلىم الىپ جاتقان تالاپتى جاستاردى تانىستىرامىز. ءبىر عانا مىسال. الىبەك داتباەۆ دەگەن قازاقتىڭ جىگىتى ايگىلى Booking.com كومپانياسىندا جۇمىس ىستەيدى. وسى الىبەكتىڭ ءبىر سۇحباتىن وقىعان امان دەگەن بالا ايگىلى كومپانيادا جۇمىس ىستەۋدى الدىنا ماقسات ەتىپ قويىپتى. وسى ماقساتى جولىندا الىبەككە حات جازىپ, الىبەك وعان ءجون سىلتەپ, اقىرى قۇجات تاپسىرىپتى. وكىنىشكە قاراي, ءبىرىنشى جىلى سىناقتان وتە الماپتى. بىراق امان سوندا دا قايتپاي, جاقسىلاپ دايىندالىپ, ءبىر جىلدان كەيىن قايتا تاپسىرىپتى. بۇگىندە ول – امستەردام قالاسىندا ورنالاسقان Booking.com كومپانياسىندا جۇمىس ىستەيتىن 15 قازاقتىڭ بىرەۋى. وتكەن نومىرلەرىمىزدىڭ بىرىندە اماننىڭ سۇحباتىن جاريالادىق. اماننىڭ اڭگىمەسى دە تالاي تۇلەكتىڭ قيالىنا قانات بىتىرەرى انىق.
الەمدى شارلاپ, ەل كەزىپ, جەر كورۋدى ارماندامايتىن بالا جوق. سونداي بالالار 27 مەملەكەتكە ساياحاتتاعان, سونىڭ 12-ءسىن ۆەلوسيپەدپەن شارلاعان قۋات بولاتوۆتىڭ سۇحباتىنان قۋات الماسىنا كىم كەپىل؟! سيرەك ماماندىقتار مەن ولاردىڭ قىر-سىرى تۋرالى سول ماماندىقتاردىڭ يەلەرى ايتقان اڭگىمە قىزىقسىز دەپ كىم ايتتى؟ جاسوسپىرىمدەردىڭ اكە-شەشەسىنە, اپكە-اعاسىنا ايتپايتىن جان سىرىن بىزگە جازاتىنى ولارعا پسيحولوگيالىق قولداۋ كورسەتۋدىڭ ماڭىزىن كورسەتپەي مە؟ مۇنىڭ سىرتىندا روبوت جاساپ, ءىت تەحنولوگيانى مەڭگەرگەن; ءبىلىم جارىسىندا وزا شاپقان; قاتارىنان ەرەك تۋعان; تالابى تاۋداي بالالار تۋرالى قانشاما ماتەريال جازىلىپ جاتىر. مۇمكىندىگى شەكتەۋلى بولا تۇرا, ءتورت مۇشەسى ساۋ ادامداردان گورى وراسان تابىسقا جەتىپ جۇرگەندەردىڭ ومىرىنەن نەگە ۇلگى الماسقا؟!.
شىمكەنتتەگى نازارباەۆ زياتكەرلىك مەكتەبىنىڭ وقۋشىلارى قول كۇشىمەن ەمەس, ءبىلىمنىڭ كۇشىمەن سوناۋ شالعايداعى افريكا ەلدەرىنە تازا اۋىز سۋ جەتكىزۋگە كومەكتەسىپ جۇرگەنىن بىلگەندە تاڭدانىسىمىزدى جاسىرا المادىق. استانالىق وقۋشى قىزدىڭ قاتەرلى ىسىككە قارسى ءدارى جاساپ جۇرگەنى; جاس عالىمنىڭ ديابەتتەردىڭ جاعدايىن جەڭىلدەتىپ, اپتاسىنا ءبىر رەت قابىلدايتىن ينسۋلين ويلاپ تاپقانى; ءشىريتىن پوليەتيلەن پاكەت ويلاپ تاپقان ەركەبۇلاننىڭ ەرەن ەڭبەگى; مۇمكىندىگى شەكتەۋلى جاندارعا تەگىن پروتەز جاساپ بەرىپ جۇرگەن بالالار...
الەمدى وزگەرتەتىن وسىنداي جىلت ەتكەن دۇنيەلەردى دە قالت جىبەرمەۋگە تىرىسامىز. سىزدەردىڭ دە قاپەردە بولسىن. ال ول ءۇشىن, دارحان قىدىرالى اعامىز ايتقانداي, «بالالىق شاقتىڭ قاراشاڭىراعى ىسپەتتى» بالالار باسىلىمدارىنا نازار سالا جۇرگەيسىزدەر. ءبىزدىڭ گازەت-جۋرنالدارىمىزعا ءبىر جىلدىق جازىلۋ قۇنى ءبىر اساعاننان قالمايتىن ءبىر پيتستسانىڭ باعاسىنداي-اق. جىل ون ەكى اي ۇيىڭىزگە كەلىپ تۇراتىن, بالاڭىزعا باعىت-باعدار بەرەتىن باسىلىم ءۇشىن تىم از, دەيدى جۇلدىز ءابدىلدا.
