ە. ءبىرتانوۆتىڭ ايتۋىنشا, بۇگىنگى تاڭدا ەلىمىزدە شامامەن 240 مىڭ مەديتسينالىق قىزمەتكەر بار. ونىڭ ىشىندە 70 مىڭى — دارىگەرلەر, 170 مىڭى — مەيىربيكەلەر. سونىڭ ىشىندە دارىگەرلەردىڭ 20%, مەيىربيكەلەردىڭ 12% جەكەمەنشىك سەكتوردا جۇمىس ىستەيدى.
قر دسم مالىمەتتەرى بويىنشا, كادرلىق قامتاماسىز ەتۋگە بايلانىستى قابىلدانىپ جاتقان شارالار دارىگەر كادرلاردىڭ جەتىسپەۋشىلىگىن 2007 جىلى 5,5 مىڭ ماماننان 2017 جىلى 2,8 مىڭعا دەيىن ارتتىرۋعا مۇمكىندىك بەرگەنىن اتاپ وتكەن ءجون, ياعني ماماندار 48,7% ارتقان. 2020 جىلعا قاراي كادرلار تاپشىلىعىن 1,9 مىڭعا دەيىن, نەمەسە قاراستىرىلعان شتاتتىق بىرلىكتەن 2,7% دەيىن تومەندەتۋ كوزدەلىپ وتىر.
مەديتسينالىق كادرلارمەن قامتاماسىز ەتۋدى ودان ءارى ارتتىرۋ ءۇشىن قر دەنساۋلىق ساقتاۋ مينيسترلىگى مامانداردى جالداۋ جانە جەرگىلىكتى جەرلەردە ۇستاۋ ءۇشىن بىرقاتار شارالار اتقارۋدا. بيىل مامان تاپشىلىعى 2800 ادام بولعان جاعدايدا, ينتەرناتۋرا تۇلەكتەرى, ەمحانالاردا جالپى پراكتيكا دارىگەرى, حيرۋرگ جانە تەراپەۆت بولىپ جۇمىس ىستەي الاتىن 6000 جۋىق تۇلەك, سونداي-اق 1500 جۋىق اۋقىمى تار مامان ءبىتىردى.
ء«بىز مامان تاپشىلىعىنان ءۇش ەسە كوپ تۇلەك شىعارامىز. دەگەنمەن, تۇلەكتەر ەڭبەك نارىعىندا جەكەمەنشىك كلينيكالارعا جۇمىسقا ورنالاسۋدى ءجون سانايدى جانە اۋىلدى ەلدى مەكەندەر مەن ەمحانالارعا ورنالاسۋدى قالامايدى», — دەدى ە. ءبىرتانوۆ.
وسىعان وراي جەرگىلىكتى اتقارۋشى ورگاندارعا وڭىرگە جوعارى جانە جوعارىدان كەيىنگى ءبىلىمى بار كادرلاردى دايارلاۋ ءۇشىن جەرگىلىكتى بيۋدجەت ەسەبىنەن ءبىلىم بەرۋ تاپسىرىسىن جاساۋعا مۇمكىندىك بەرىلدى.
«ستۋدەنتتەر اكىمدەردىڭ گرانتتارىمەن ءبىلىم العاننان كەيىن, وزدەرى كەلگەن وڭىرگە بارىپ جۇمىس ىستەۋى كەرەك. كەلەسى جىلدان باستاپ گرانتتا وقىعان بارلىق تۇلەكتەرگە مىندەتتى ءۇش جىلدىق ەڭبەكتى وتەۋ تالابىن ەنگىزەمىز. ارنايى مەملەكەتتىك كوميسسيا ولاردى وسى وڭىرلەرگە بولەتىن بولادى. مەملەكەت ولاردىڭ وقۋىنا اقى تولەگەننەن كەيىن, ولار سول جەرگە بارىپ جۇمىس ىستەۋى كەرەك», — دەدى ەلجان ءبىرتانوۆ.
سونداي-اق, مينيستر گرانتتاردى ءبولۋ كەزىندە تۇلەكتىڭ قايدان كەلگەنى, ونىڭ ۇلگەرىمى قانداي ەكەنى سەكىلدى كوپتەگەن فاكتورلار ەسكەرىلەتىنىن ايتتى. تالانتتى, دارىندى تۇلەكتەر بار بولسا, ولارعا ماگيستراتۋرادا, دوكتورانتۋرادا وقۋدى جالعاستىرۋعا مۇمكىندىك بەرىلەدى.
قر دەنساۋلىق ساقتاۋ مينيسترلىگىنىڭ مالىمەتىنە قاراعاندا, بيىل 458 بالا نەمەسە جالپى ستۋدەنتتىڭ 14,7%-ى, 253 رەزيدەنت نەمەسە جالپى رەزيدەنتتىڭ 17%-ى (2017 جىلى 75 ادام نەمەسە 5%) جەرگىلىكتى بيۋدجەت قاراجاتى ەسەبىنەن وقۋعا تۇسكەن.
ماماندار اۋىلدى جەرگە قاراعاندا, قالادا جۇمىس ىستەگەندى قالايدى. مينيستر ە. ءبىرتانوۆتىڭ ايتۋىنشا, اۋىلدىق ەلدى مەكەندەرگە جۇمىس ىستەۋگە كەلگەن جاس ماماندارعا الەۋمەتتىك قولداۋ شارالارىن قاراستىرۋ ارقىلى جەرگىلىكتى مەديتسينا كادرىنىڭ جەتىسپەۋشىلىگىن شەشۋگە بولادى.
وسىلايشا, اكىمدىكتەر اۋىلعا بارعان ماماندارعا الەۋمەتتىك قولداۋ كورسەتىپ, كوتەرمە جاردەماقى, جاتاقحانا, جەڭىلدەتىلگەن نەسيە مەن جالاقىلارىنا 25% قوسىمشا اقى تولەۋ, ءتىپتى كوممۋنالدىق شىعىن مەن وتىنمەن قامتاماسىز ەتۋگە مىندەتتى.
ء«بىز الەۋمەتتىك قولداۋ شارالارىن زاڭدى تۇردە بەكىتتىك. بۇگىنگى تاڭدا وقۋ بىتىرگەن مامانداردىڭ تەك 40%-ى وبلىس اكىمدەرىنىڭ الەۋمەتتىك قولداۋىمەن قامتىلعان. ءبىز بۇل كورسەتكىشتى ۇلعايتقىمىز كەلەدى. كەلەسى اپتادا ءبىز بۇل ۇلەستى 60%-عا جەتكىزۋدى ۇسىناتىن بولامىز. وقۋ بىتىرگەن جاس مامانداردى اۋىلعا بارۋعا قىزىقتىرۋ ءۇشىن بىزگە تۇرعىن ءۇي, كوتەرمە جاردەماقى, بىلىكتىلىگىن ارتتىرۋ ءۇشىن قارجى بولىنەتىنىنە كەپىلدىك بەرۋ كەرەك. بۇل جاعدايدا بارلىعى جەرگىلىكتى جەردە جۇمىس ىستەيتىن كاسىپورىن باسشىلارى مەن اكىمدىكتەردىڭ قولىندا», — دەدى ە. ءبىرتانوۆ.
