جيىن قورىتىندىسى بويىنشا 15 قۇجاتقا قول قويىلدى. ولاردىڭ ەكەۋى – حالىقارالىق كەلىسىم. اتاپ ايتقاندا, ۇيىمعا مۇشە مەملەكەتتەر اقپاراتتىق تەحنولوگيا سالاسىنداعى قىلمىسپەن كۇرەس جونىندەگى ىنتىماقتاستىق جانە عارىش كەڭىستىگىن بەيبىت ماقساتتا پايدالانۋ جانە زەرتتەۋ جونىندەگى ىنتىماقتاستىق كونۆەنتسياسى ءبىراۋىزدان قابىلداندى.
تمد اتقارۋشى كوميتەتىنىڭ توراعاسى سەرگەي لەبەدەۆتىڭ ايتۋىنشا, مەملەكەت باسشىلارى تمد-نى دامىتۋعا قاتىستى وزەكتى ماسەلەلەردى تالقىلادى. سونداي-اق تۇرىكمەنستاننىڭ كەلەر جىلعى توراعالىعىن قولدادى. ايتسە دە, 2019 جىلى تمد-عا ەكى مەملەكەت توراعالىق ەتەدى. ونىڭ ەكىنشىسى – وزبەكستان.
«تۇرىكمەنستاننىڭ ۇسىنىسى بويىنشا تمد مەملەكەت باسشىلارى كەڭەسىنىڭ كەلەسى وتىرىسىن 2019 جىلى 11 قازاندا اشحابادتا وتكىزۋ تۋرالى شەشىم قابىلداندى. كادرلىق ماسەلەلەردەن بولەك جيىنعا قاتىسقان مەملەكەتتەر قالعان قۇجاتتاردى تالقىلاۋسىز قول قويۋعا كەلىستى», دەدى س.لەبەدەۆ.
بۇدان بولەك, تمد مەملەكەت باسشىلارى كەڭەسىنىڭ شەشىمدەرىنە قاتىستى 13 قۇجات راسىمدەلدى. ولاردىڭ قاتارىندا تۇرىكمەنستاننىڭ كەلەسى جىلداعى توراعالىعى, ۇلى جەڭىستىڭ 75 جىلدىعىنا دايىندىق شارالارى, 2021 جىلى تاجىكستاندا «دوستاستىقتىڭ مادەني استانالارى» اتتى مەملەكەتارالىق باعدارلامانى ىسكە اسىرۋ, 2019-2023 جىلدار ارالىعىندا قىلمىسپەن كۇرەس شارالارىن بىرلەسىپ جۇرگىزۋدىڭ مەملەكەتارالىق باعدارلاماسى, تمد-عا مۇشە مەملەكەتتەردىڭ تەرروريزمگە قارسى ورتالىعى تۋرالى ەرەجەنى تولىقتىرۋ, كەڭەستىڭ كەيبىر شەشىمدەرىن توقتاتۋ, تمد-عا مۇشە مەملەكەت باسشىلارىنىڭ دۇنيەجۇزىلىك كوشپەندىلەر ويىندارى تۋرالى مالىمدەمەسى, جازۋشى شىڭعىس ايتماتوۆتىڭ 90 جىلدىعىنا ارنالعان بىرلەسكەن مالىمدەمە جانە تاعى باسقا قۇجاتتار بار.
تمد-عا مۇشە مەملەكەتتەر باسشىلارىنىڭ كەزەكتى وتىرىسىنا ەلباسى نۇرسۇلتان نازارباەۆ قاتىستى. سونىمەن قاتار جيىنعا رەسەي پرەزيدەنتى ۆلاديمير پۋتين, بەلارۋس پرەزيدەنتى الەكساندر لۋكاشەنكو, ازەربايجان پرەزيدەنتى يلحام اليەۆ, قىرعىزستان پرەزيدەنتى سوورونباي جەەنبەكوۆ, ارمەنيا پرەمەر-ءمينيسترى نيكول پاشينيان, مولدوۆا پرەزيدەنتى يگور دودون جانە وزبەكستان پرەزيدەنتى شاۆكات ميرزيوەۆ, تۇرىكمەنستان مينيسترلەر كابينەتى توراعاسىنىڭ ورىنباسارى پۋرلي اگامۋرادوۆ كەلدى.
وتىرىستىڭ العاشقى بولىگى شاعىن قۇرامدا, جابىق ەسىك جاعدايىندا ءوتتى. وندا تمد توراعالىعى جانە ۇيىمعا مۇشە مەملەكەتتەر باسشىلارىنىڭ كەزەكتى وتىرىسىن وتكىزۋ ماسەلەلەرى قارالدى.
كەڭەس بارىسىندا تمد-عا توراعالىق ەتۋ مىندەتى تۇركىمەنستان تاراپىنا رەسمي تۇردە تاپسىرىلدى.
اباي اسانكەلدى ۇلى,
"ەگەمەن قازاقستان"
دۋشانبەدەن
