اقش پەن ەۋروپا قۇرامالارى جۇما كۇنى پاريجگە جاقىن سەن-كانتەن-ان-يۆەليندەگى Golf National الاڭىندا كەزدەسەدى.
ازىرگە قۇراما كاپيتاندارى تارتىسقا قاتىساتىن ويىنشىلار ءتىزىمىن جاساقتاۋدا.
امەريكا گولفشىسى فيل ميكەلسون ء«بىزدىڭ الدىمىزدا قيىن مىندەت تۇر. بىزگە قارسى ەۋروپانىڭ تالانتتى كومانداسى ونەر كورسەتپەك. ولاردىڭ قاتارىندا العىر جاس ويىنشىلار بار. كوماندا تاجىريبەلى, باسشىلىعى مىقتى. بۇعان قاراماستان, مەن ءوز كوماندامدى, جاتتىقتىرۋشىلارىمدى جاقسى كورەمىن. ەكى قۇراما ءۇشىن دە الداعى ويىن قيىن ءارى تارتىستى بولماق. ەگەر وسى جولى جەڭىسكە جەتسەك, مەن ونى ءومىر بويى ەسىمدە ساقتايمىن», دەدى ول.
سەيسەنبى كۇنى العاشقى جاتتىعۋلار باستالدى. ەۋروپا قۇراماسىنىڭ ساپىنداعى سولتۇستىك يرلانديالىق روري ماكيلروي جارىسقا ايگىلى امەريكالىق سپورتشى تايگەر ۆۋدستىڭ قاتىسۋى تۋرالى: «مەنىڭ ويىمشا, ونىڭ قاتىسۋى اقش كومانداسى ءۇشىن جاقسى ناتيجە الىپ كەلۋى مۇمكىن. ءبىز تەك تايگەر ۆۋدستى ەمەس, تۇگەل امەريكا قۇراماسىن جەڭۋگە نيەتتىمىز» دەدى.
جارىس جەكسەنبى كۇنى اياقتالادى. ويىندى تاماشالاۋعا 300 مىڭعا جۋىق كورەرمەن كەلەدى دەپ كۇتىلۋدە.
