جاقىندا قازاقستاننىڭ گاز سالاسىندا دەرەكتەر بەرۋدىڭ يننوۆاتسيالىق تەحنولوگيالارىن تاجىريبەگە ەنگىزۋ ماقساتىندا قوستاناي قالاسىندا گاز كورسەتكىشتەرىن قاشىقتان جيناۋ ءۇشىن «اقىلدى» گاز ەسەپتەگىشتەر ورناتۋ جونىندەگى قاناتقاقتى جوبا جۇمىس ىستەي باستادى. قوستاناي قالاسىندا «تسيفرلى قازاقستان» مەملەكەتتىك باعدارلاماسى اياسىندا 60 «اقىلدى» گاز ەسەپتەگىش قوندىرعىلار ورناتىلدى. بۇل «قازترانسگاز ايماق» اق پەن «Beeline» ۇيالى تەلەفون وپەراتورلارىنىڭ بىرلەسكەن جوباسى رەتىندە العاش رەت قوستاناي قالاسىندا جۇزەگە اسىرىلدى.
وبلىس ورتالىعىنداعى ۇيلەرگە وسىنداي 60 يننوۆاتسيالىق ەسەپتەگىش قۇرال ورناتىلدى. جاڭا ەسەپتەگىش قۇرالدار ارقىلى گاز ەسەپتەۋ مەن ونىڭ شىعىندارىن باقىلاۋ جەڭىل بولادى, ولار ەلەكتروندى جۇيەمەن تىركەلەدى جانە ادامي فاكتوردى جوققا شىعارادى. گاز اۋاعا تاراعان جاعدايدا «اقىلدى» ەسەپتەگىش قۇرال ونى انىقتاپ, جەدەل تۇردە باقىلاۋشى كومپانياعا حابار بەرەدى. سونىمەن قاتار گازدى تۇرمىستا پايدالانۋ كەزىندە تۋىندايتىن قاۋىپتى جاعدايلاردان قورعاۋ دەڭگەيى ارتادى. ەندى كورسەتكىشتەردى قاشىقتان جازىپ الۋ اسپاپتارى ورناتىلاتىن قالالاردا باقىلاۋشىلار ءۇي-جايلارعا بارىپ جۇرمەيتىن بولادى. بۇل ءوزىن گاز كومپانياسىنانمىن دەپ تانىستىرىپ, تۇتىنۋشىلاردى الداپ سوعاتىن الاياقتاردان ساقتايدى. سونىمەن قاتار باقىلاۋشىلار دا ۇيلەردى ارالاۋ كەزىندە كەزدەسەتىن داۋ-جانجالداردان اۋلاق بولادى. دالدىگى جوعارى ولشەۋ اسپاپتارىن قولدانۋ – گازدى تۇتىنۋشى ازاماتتارعا دا, مەملەكەتكە دە پايدالى. بۇل – قاراجاتتى ۇنەمدەۋگە, گاز ىسىرابىن بولدىرماۋعا كومەكتەسەدى, ەڭ باستىسى, گاز بەرۋ سەرۆيسىن جەتىلدىرىپ, قاۋىپسىزدىكتى ارتتىرادى.
«اقىلدى» ەسەپتەگىشتەردىڭ جۇمىسى دەرەكتەردى ۇيالى بايلانىس جەلىلەرى ارقىلى بەرۋ تەحنولوگياسىنا نەگىزدەلگەن. وسى يننوۆاتسيالىق تەحنولوگيانىڭ ەرەكشەلىكتەرى نەگىزىندە تۇپكىلىكتى قوندىرعىلاردىڭ (ەسەپتەۋىشتەر, داتچيكتەر) ەنەرگيانىڭ از تۇتىنىلۋىنا قول جەتكىزىلەدى, اسپاپتار اككۋمۋلياتورىنىڭ جۇمىس ىستەۋ مەرزىمىن 10 جىلعا دەيىن ۇزارتۋعا مۇمكىندىك بەرەدى. بۇعان قوسا بۇل تەحنولوگيالار قوندىرعىلار مەن بازالىق ستانسا اراسىندا قاۋىپسىز قوسىلۋدىڭ جوعارى دەڭگەيىن قامتاماسىز ەتەدى.
ءبىز قوستاناي قالاسىنداعى گاز قىزمەتىن كورسەتۋ مەكەمەسىنىڭ جاۋاپتى قىزمەتكەرلەرىمەن بىرگە «اقىلدى» گاز ەسەپتەگىشتەر ورناتىلعان ۇيلەردى ارالادىق. قاناتقاقتى جوبا رەتىندە ورناتىلعان بۇل قوندىرعىلار ەشقانداي اقاۋسىز جۇمىس ىستەپ تۇر. گاز ەسەپتەگىش قوندىرعىلار ورناتىلعان ۇيلەردەگى تۇرعىنداردىڭ ايتۋىنشا, بۇل جوبا وتە ءتيىمدى كورىنەدى. ونىڭ ۇستىنە قاناتقاقتى جوبا اياسىندا 60 قوندىرعى قوستانايلىقتارعا تەگىن ورناتىلىپ بەرىلدى. «اقىلدى» گاز ەسەپتەگىشتەردى جەكەمەنشىك ۇيلەرگە ورناتۋ شىعىنىن «قازترانسگاز ايماق» جانە «Beeline» كومپانياسى كوتەرىپ وتىر.
يننوۆاتسيالىق «اقىلدى» گاز ەسەپتەگىش قوندىرعى ورناتىلعان پاتەر يەلەرىنىڭ ءبىرى بىزبەن اڭگىمەسىندە: «بۇل گاز ەسەپتەگىش قۇرالداردىڭ ورناتىلعانىنا ءبىر ايدىڭ ءجۇزى بولدى. وسى ۋاقىت ىشىندە ءبىز ونىڭ قاراپايىم مەحانيكالىق گاز ەسەپتەگىشتەردەن ارتىقشىلىعىن انىق سەزىنىپ ۇلگەردىك. ەندى ۇيىمىزگە گاز كورسەتكىشىن تەكسەرەتىن باقىلاۋشىلار كەلمەيتىن بولادى, قوندىرعى گاز كورسەتكىشتەرىن قاشىقتان بەرىپ وتىرادى. گاز ەسەپتەگىشتىڭ كورسەتكىشتەرىن ءبىز دە تەكسەرىپ وتىرامىز. ونىڭ ۇستىنە گاز ەسەپتەگىش قوندىرعى ءۇيدىڭ ىشىنە ورناتىلعان. بۇل ءبىز ءۇشىن قولايلى. قورىتا ايتقاندا, ءبىز جاڭا قوندىرعىنىڭ جۇمىسىنا ريزامىز», دەپ ءمان-جايدى قاناعاتتانعاندىق سەزىممەن تولىق باياندادى.
– جوعارى دالدىكپەن گاز تۇتىنۋ كولەمىن ايقىندايتىن «اقىلدى» گاز ەسەپتەگىش قوندىرعى تۇرعىندار ءۇشىن دە, مەملەكەت ءۇشىن دە وتە پايدالى. وسىنداي قوندىرعىلاردىڭ ەسەبىنەن ءبىز گاز قۇبىرلارىنىڭ اقاۋىن جوققا شىعارامىز. سونىمەن بىرگە رۇقساتسىز گاز قۇبىرلارىنا قوسىلۋ وقيعالارىنا دا توسقاۋىل قويامىز. وسى يننوۆاتسيالىق قوندىرعىلاردىڭ كومەگىمەن گاز تۇتىنۋ مولشەرىن ءدال ەسەپتەپ, ونىڭ تۇتىنۋ قاۋىپسىزدىگىن دە ارتتىرامىز, – دەيدى بىزبەن اڭگىمەسىندە «قازترانسگاز ايماق» اق-تىڭ قوستاناي وبلىسى بويىنشا تۇرعىندارعا جەدەل قىزمەت كورسەتۋ مەكەمەسىنىڭ باستىعى دانيل سيابرو.
جىلقىباي جاعىپار ۇلى,
«ەگەمەن قازاقتان»
