يكونالاردى تاپسىرۋ ءراسىمى افينادا قازاقستان سىرتقى ىستەر ءمينيسترىنىڭ ورىنباسارى رومان ۆاسيلەنكونىڭ پارلامەنتارالىق پراۆوسلاۆيە اسسامبلەياسىنىڭ (پپا) باسشىلىعى – گرەكيا پارلامەنتىنىڭ دەپۋتاتتارى افاناسيوس بۋراس جانە يواننيس ساراكيوتيسپەن كەزدەسۋى شەڭبەرىندە ءوتتى.
كەزدەسۋ بارىسىندا ر. ۆاسيلەنكو وسى ۇيىمنىڭ پارلامەنتارالىق ىنتىماقتاستىقتى نىعايتۋدا جانە دىنارالىق ۇنقاتىسۋدى ىلگەرىلەتۋدەگى ۇلەسىن جوعارى اتاپ ءوتىپ, پپا-نى 2018 جىلعى ماۋسىمدا مەرەيتويلىق 25-ءشى باس اسسامبلەياسىن وتكىزۋمەن قۇتتىقتادى.
2018 جىلعى 10-11 قازاندا استانادا پرەزيدەنت نۇرسۇلتان نازارباەۆتىڭ باستاماسىمەن 2003 جىلدان باستاپ ءار ءۇش جىل سايىن وتكىزىلەتىن VI الەمدىك جانە ءداستۇرلى دىندەر كوشباسشىلارىنىڭ سەزى قارساڭىندا قازاقستاندىق ديپلومات گرەك دەپۋتاتتارىن اتالعان فورۋمنىڭ بىرەگەي سيپاتىمەن تانىستىردى. ءىس-شارانىڭ باستى ماقساتى ءدىني كوشباسشىلاردىڭ كۇش-جىگەرىن تۇراقتىلىققا قول جەتكىزۋ, سونداي-اق وشپەندىلىك پەن توزبەۋشىلىكتەن تۋىنداعان زورلىق-زومبىلىق ينتسيدەنتتەرىن بولدىرماۋعا جۇمىلدىرۋ ەكەنى اتاپ ءوتىلدى. وسىعان وراي, ر. ۆاسيلەنكو پپا باس اسسامبلەياسىنىڭ پرەزيدەنتى - رف مەملەكەتتىك دۋما دەپۋتاتى سەرگەي گاۆريلوۆتىڭ سەزگە قاتىسۋىن قوشتادى.
ر. ۆاسيلەنكو پراۆوسلاۆيە الەمىندەگى قاسيەتتى افون تاۋىنىڭ مارتەبەسىن نازارعا الا وتىرىپ, الداعى سەز جۇمىسىنىڭ ءبىرىنشى كۇنى اشىلاتىن بەيبىتشىلىك جانە كەلىسىم مۋزەيىنىڭ ەكسپوزيتسياسىن تولىقتىرۋعا ارنالعان سىي ءۇشىن ەرەكشە العىسىن ءبىلدىردى. يكونالاردىڭ كوشىرمەلەرىندە سيمونوپەترا ءموناستىرى (گراۆەر يواننيس كالديستىڭ جۇمىسى, 1870 جىلعى 27 ناۋرىز) جانە بلاگوۆەششەنيە پرەسۆياتوي بوگوروديتسى (گراۆەر يەرودياكون ەفيميوستىڭ جۇمىسى, 1850 ج.) سيپاتتالادى.
قازاقستان مەن گرەكيانىڭ ورتاق تاريحىنا توقتالعان ر. ۆاسيلەنكو ەلىمىزدە 10 مىڭنان استام ەتنيكالىق گرەك - قازاقستان ازاماتتارى تۇراتىنىن ايتىپ كەتتى. بۇگىنگى تاڭدا گرەكتەر ءوز داستۇرلەرىن, تۋعان ءتىلىن جانە مادەنيەتىن ساقتاي وتىرىپ, سونداي-اق وزدەرىنىڭ تاريحي وتاندارىمەن, ياعني قازاقستان تاۋەلسىزدىك العاننان كەيىن گرەكياعا كەتكەن قانداستارىمەن بايلانىستى ۇزبەي, ەكى ەل اراسىنداعى «دوستىق كوپىرىنە» اينالدى. سونىمەن قاتار, ەلىمىزدە ءارتۇرلى ەسەپ بويىنشا پراۆوسلاۆيە ءدىنىن ۇستاناتىن 4 ملن. استام ادام تۇراتىن جانە دە تاۋەلسىزدىك جىلدارى ىشىندە 200-دەن استام جاڭا پروۆاسلاۆيە شىركەۋلەرى اشىلعانىن, قازاقستان زايىرلى جانە كوپكونفەسسيالى رەسپۋبليكا بولىپ تابىلاتىنىن ەرەكشە اتاپ ءوتتى.
ءوز كەزەگىندە, گرەك دەپۋتاتتارى پرەزيدەنت ن. نازارباەۆتىڭ بەيبىت ءومىر مەن جاسامپازدىقتى, دىندەر مەن حالىق اراسىنداعى يگى قارىم-قاتىناستاردى نىعايتۋعا باعىتتالعان حالىقارالىق باستامالارىنىڭ ارقاسىندا قازاقستان الەمگە تانىمال بولعانىن اتاپ ءوتتى. وسى ورايدا, ا. بۋراس جانە
ي. ساراكيوتيس استانا قالاسىندا ءوتۋى جوسپارلانعان الەمدىك جانە ءداستۇرلى دىندەر كوشباسشىلارى سەزىنىڭ جوعارى ماقساتتارى مەن يدەيالارىن قولدايتىندارىن راستاپ, فورۋم قاتىسۋشىلارىنا ءساتتى جۇمىس تىلەدى.
