ونلاين-داۋىس بەرۋدىڭ جانە استانا قالاسى اكىمدىگىنىڭ جانىنداعى «ەڭبەك جولى» كونكۋرسىنىڭ جەڭىمپازدارىن انىقتاۋ جونىندەگى كوميسسيا شەشىمىنىڭ قورىتىندىسى بويىنشا «ەڭبەك جولى» كونكۋرسىنىڭ «ۇزدىك ەڭبەك اۋلەتى» اتالىمىندا ءبىرىنشى ورىندى راحيمبەرليندەر اۋلەتى يەلەندى. اۋلەتتىڭ ۇلكەنى ديدار الىمقىزى №34 ورتا مەكتەپتىڭ ديرەكتورى, وسى كۇنگە دەيىن مەكتەپتىڭ دەڭگەيىن كوتەرىپ, تاربيەلى دە بىلىكتى, جاۋاپكەرشىلىگى جوعارى, باسقارۋ تەورياسىن جاقسى مەڭگەرگەن, ۇجىمدى باسقارۋ قابىلەتى جوعارى قىزمەتكەر. ەڭبەك جولىندا قول جەتكىزگەن تابىستارى ءۇشىن كوپتەگەن العىس حاتتارمەن, قۇرمەت گراموتالارى جانە سەرتيفيكاتتارمەن ماراپاتتالعان. اتاپ ايتقاندا, 2016 جىلى «جىلدىڭ ۇزدىك مۇعالىمى» اتانعان. راحيمبەرليندەر اۋلەتىنىڭ جالپى پەداگوگيكالىق ەڭبەك ءوتىلى – 136 جىل. اۋلەتتە بارلىعى 5 پەداگوگ بار. ولاردىڭ بارلىعى ەلىمىزدىڭ ءار وبلىستارىندا جالپى ءبىلىم بەرەتىن مەكتەپتەرىندە مۇعالىمدىك قىزمەت اتقارعان جانە ءالى دە اتقارىپ كەلەدى. ال جۇلدەلى ەكىنشى ورىندى سۇلەيمەنوۆتەر اۋلەتى يەلەندى. اۋلەتتىڭ باسشىسى جەكسەنباي سۇلەيمەنوۆ – ەلەكترلەندىرۋ جانە ەنەرگەتيكا كافەدراسىنىڭ ورتالىق ەلەكتروتەحنيكالىق زەرتحاناسىنىڭ باسشىسى, قۇرمەتتى تەمىرجولشى. تەمىر جول سالاسىنا ءوز ۇلەسىن وتباسىنىڭ 15 مۇشەسى قوسىپ وتىر. اۋلەتتىڭ جالپى ەڭبەك ءوتىلى – 345 جىل. جەڭىمپازداردى انىقتاۋ جونىندەگى كوميسسيا شەشىمىمەن ءۇشىنشى ورىن گولتسۆارت اۋلەتىنە بۇيىردى. اۋلەتتىڭ باسشىسى الەكساندر گولتسۆارت «استانا – ەنەرگيا» اق تەتس-2 باس ينجەنەردىڭ ورىنباسارى. سونىمەن قاتار اتالعان كاسىپورىندا جۇبايى, ۇلى مەن كەلىنى دە ەڭبەك ەتەدى. اۋلەتتىڭ جالپى ەڭبەك ءوتىلى – 112 جىل.
ايتا كەتەتىن تاعى ءبىر جايت, «جۇمىس ىستەيتىن جاستاردىڭ ۇزدىك تالىمگەرى» اتالىمى بويىنشا ساۋلە كەنجەتايقىزى ۇزدىك دەپ تانىلدى. ول «بيكوم-ينجينيرينگ» جشس-تە باس ساۋلەتشى بولىپ جۇمىس ىستەيدى. ەكىنشى ورىندى «استانا – ەنەرگيا» اق حيميا تسەحىنىڭ اۋىسىم باستىعى تاتيانا گەنناديقىزى يەلەنسە, ءۇشىنشى ورىنعا «ەلەكتروۆوز قۇراستىرۋ زاۋىتى» جشس جيناقتاۋ تسەحىنىڭ شەبەرى ەرتاي بەردىباي ۇلى لايىق دەپ تانىلدى.
سونىمەن قاتار ء«وندىرىستىڭ ۇزدىك جاس مامانى» اتالىمى بويىنشا ءبىرىنشى ورىندى استانا قالاسى اكىمدىگىنىڭ حالىقتى جۇمىسپەن قامتۋ ورتالىعى» كمم-دە ء«باسپاسوز قىزمەتى ءبولىمىنىڭ» باسشىسى دانيار بايجانوۆ, ەكىنشى ورىندى «ORKEN» كاسىبي وقىتۋ ورتالىعىنىڭ باسشىسى جانبولات احمەتوۆ جانە ءۇشىنشى ورىندى نۇرسۇلتان نازارباەۆ حالىقارالىق اۋەجايىندا پەرسونال جونىندەگى جانە اسكەري ەسەپكە الۋ مامانى شاحريزات قاناتقىزى يەلەندى.
بيىل جاڭا اتالىم رەتىندە «كورەرمەندەر كوزايىمى» ەنگىزىلگەن ەكەن. بۇل اتالىمعا استانا قالاسىنىڭ باس ونكولوگى, «استانا مەديتسينالىق ۋنيۆەرسيتەتى» اق ديرەكتورلار كەڭەسىنىڭ مۇشەسى, استانا قالاسىنىڭ ونكولوگتەرى مەن راديولوگتەرى قوعامىنىڭ توراعاسى مۇحتار تولەۋتاەۆ لايىق دەپ تانىلدى.
راۋان قايدار,
«ەگەمەن قازاقستان»
