مارتوك اۋدانىندا ءوز جۇمىسىن باستاعان ء«زارۋ» پانتامەن ەمدەۋ شيپاجايىنا قازىردىڭ وزىندە تاياۋ شەت ەلدەردەن كەلىپ ەم الۋشىلار بار. اتالعان جوبانىڭ ىسكە اسىرىلۋى تۇرعىنداردىڭ دەنساۋلىعىن جاقسارتۋعا ىشكى جانە سىرتقى ءتۋريزمنىڭ دامۋىنا وڭ اسەرىن تيگىزەدى دەپ كۇتىلۋدە. شيپاجاي شىعىس قازاقستان وبلىسىنان اكەلىنگەن 150-دەن اسا مارالدىڭ مۇيىزىمەن ەمدەۋ شيكىزاتىمەن قامتاماسىز ەتىلگەن. فەرمادا بارلىعى 30 ادام جاڭا جۇمىس ورنىمەن قامتىلعان. جوبانىڭ جالپى قۇنى 450 ميلليون تەڭگەنى قۇرايدى. سونداي-اق اقتوبە قالاسىندا رەسپۋبليكانىڭ باتىس وڭىرىندە ەشقانداي بالاماسى جوق اكۆاپارك اشىلدى. سونىمەن بىرگە وبلىس ورتالىعىندا الداعى 2019 جىلى ىسكە قوسىلاتىن ەكى ءىرى ينۆەستيتسيالىق جوبا جۇزەگە اسىرىلۋدا. بۇل «IBIS» حالىقارالىق برەندىمەن 2,8 ميلليارد تەڭگە سوماسىندا بەلگىلەنگەن قوناقۇي كەشەنى جانە 4,5 ميلليارد تەڭگە تۇراتىن «بەكتۇروۆا جق» قوناقۇي كەشەنى بولىپ وتىر.
تۋريستىك ناۆيگاتسيانىڭ كوپ ءتىلدى جۇيەسىنىڭ ورنىعا باستاعانى تۋريستىك ينفراقۇرىلىمنىڭ ماڭىزدى قۇرامداس بولىگى بولىپ تابىلادى. ايتسە دە وبلىستا ءۇش تىلدە جول بەلگىلەرى مەن اقپاراتتىق ستەندتەر ءالى جاساقتالا قويماعانىن دا اشىق ايتقان ءجون. وسىعان وراي بيىلعى جىلى «قازاۆتوجولمەن» وبلىستىق كاسىپكەرلىك باسقارماسى بىرلەسە وتىرىپ, حالىقارالىق ستاندارتقا ساي جەتەكشى تۋريستىك نىساندارعا 24 جول بەلگىلەرىن جانە ءۇش تىلدە اقپاراتتىق ستەندتەر ورناتۋ ءىسىن قولعا العان.
– ءبىز تۋريزم سالاسىندا قىزمەتكەرلەردى وقىتۋعا جانە بىلىكتىلىگىن ارتتىرۋعا ەرەكشە كوڭىل بولەمىز. وتكەن جىلى 20 ەكسكۋرسوۆودقا ايلىق وقىتۋ كۋرسى وتكىزىلدى. قاتىسۋشىلار باعىتتار مەن ەكسكۋرسيالاردى ازىرلەۋ بويىنشا نەگىزگى ءبىلىم مەن داعدىلاردى ۇيرەندى. ءارى اقتوبە قالاسىندا جانە اۋدانداردا ەكسكۋرسيا جۇرگىزۋ بويىنشا تاجىريبەدەن ءوتتى. دايارلانعان ەكسكۋرسوۆودتار وتكەن جىلى «اقتوبە – قۇتتى مەكەن», «اقتوبە ينۆەست-2017» ينۆەستيتسيالىق فورۋمىنا جانە تاعى باسقا دا ەكسكۋرسيالار جۇرگىزۋگە تارتىلدى, – دەدى اقتوبە وبلىستىق كاسىپكەرلىك باسقارماسىنىڭ باسشىسى انار دارجانوۆا.
وبلىستىق تۋريستىك كەشەننىڭ ماڭىزدىڭ قۇراۋشىسىنىڭ ءبىرى تۋريستىك ءونىمدى سىرتقى جانە ىشكى باعىتتاردا ىلگەرىلەتۋ جانە ناسيحاتتاۋ بولىپ تابىلادى. وسىعان وراي وڭىردە بىرقاتار جوبالار مەن ءىس-شارالاردى ىسكە اسىرۋ كوزدەلگەن. وبلىستىڭ تۋريستىك پورتالىنا ينتەگراتسيالانعان تۋريستىك اقپاراتتىق تۇعىر-تەرمينال اقتوبە قالاسىنىڭ اۋەجايىنا ورناتىلدى. اتالعان تۋريستىك-اقپاراتتىق تۇعىر تۋريستەرگە بارلىق قاجەتتى اقپاراتتاردى جەتكىزە الادى. ونىڭ ىشىندە مارشرۋتتار ايماقتىڭ كورىكتى جەرلەرى, ورنالاسۋ ورىندارى تاماقتانۋ جانە ويىن-ساۋىق نىساندارى, تۋريستىك كومپانيالار بار. ءاربىر كورەرمەنگە ۆيرتۋالدى نۇسقادا نىساندارمەن تانىسۋ جانە قاتىسۋ اسەرىن بەرەتىن وبلىستىڭ كيەلى گەوگرافياسىنىڭ نىساندارىنا 3D تۋرلارى جاساقتالدى. بۇل www.visitaktobe.kz سايتىنىڭ تۋريستىك پورتالىمەن بىرىكتىرىلگەن. وبلىستىڭ كرەاتيۆتى جاستارىن قىزىقتى بەينە روليكتەر ءتۇسىرۋ جولى ارقىلى تۋريستىك نىساندارعا دەگەن قىزىعۋشىلىعىن ارتتىرۋعا مۇمكىندىك بەرەتىن ءوڭىردىڭ تۇرعىندارى اراسىندا ء«تۋريزمنىڭ ەڭ كرەاتيۆتى پرومو روليگى» بەينە بايقاۋىن وتكىزۋ بەلگىلەندى. اتالعان بايقاۋ اياقتالعاننان كەيىن ەڭ ۇزدىك بەينە روليك الەۋمەتتىك جەلىلەردە ورنالاستىرىلادى. بۇگىنگى كۇندەرى قاتىسۋشىلاردان ءتيىستى ءوتىنىم قابىلداۋ ءىسى جۇرگىزىلۋدە.
اقتوبە قالاسى بويىنشا ەكسكۋرسيالىق اۆتوبۋستاردا بالالاردىڭ تانىم-كوكجيەگىن دامىتۋ ماقساتىندا تۋعان ولكەنىڭ تاريحىمەن تانىستىرۋ, سونىمەن بىرگە تۋريستىك كومپانيالاردى وبلىس تۇرعىندارى مەن قوناقتارىنا ەكسكۋرسيالاردى اقىلى تۇردە ۇيىمداستىرۋ ءۇشىن تەگىن تۋريستىك ەكسكۋرسيالار جۇرگىزىلۋدە. وڭىردە وتكەن جىلدان باستاپ جەرگىلىكتى جانە رەسپۋبليكالىق ماڭىزى بار كيەلى جەرلەر مەن كورنەكتى ورىنداردىڭ ءتىزىمىن جاساۋ قولعا الىنىپ, سول ءتىزىم بارعان سايىن تولىقتىرىلىپ كەلە جاتقانى دا ءوڭىر ءتۋريزمى الەۋەتىنىڭ ارتۋىنا سەپتىگىن تيگىزۋدە. اتاپ ايتقاندا, ونىڭ قاتارى ءبىرىنشى كەزەكتە كەسەنەلەر مەن مەموريالدىق كەشەندەر ەسەبىنەن ارتا تۇسۋدە. وعان كەلۋشىلەردىڭ تىركەلۋ كورسەتكىشى دە كوڭىلگە قونادى. بيىلعى جىلدىڭ العاشقى جارتى جىلدىعىندا اتالعان نىساندارعا كەلۋشىلەردىڭ سانى 13 000 ادامنان اسىپ ءتۇستى. وڭىردە بۇعان دەيىن جاسالعان تالداۋلار مەن ساراپتامالار بارىسى ىسكەرلىك ءتۋريزمنىڭ ۇلەسى الدىڭعى كەزەككە شىققانىن ايعاقتايدى. مۇنىڭ ءوزى مارتەبەلىك فورۋمدار مەن كونفەرەنتسيالار, كورمەلەر ءارى وزگە دە مادەني جانە سپورتتىق ءىس-شارالار ارقاسىندا جۇزگە اسىرىلعان.
تەمىر قۇسايىن,
«ەگەمەن قازاقستان»
اقتوبە
