بيىلعى جىلدىڭ 19 ماۋسىمىندا مەملەكەت باسشىسىنىڭ جارلىققا سايكەس, تۇركىستان قالاسى وبلىس ورتالىعىنا اينالدى. اتالعان وزگەرىستەر ايماقتىڭ قارقىندى دامۋىنا تۇرتكى بولاتىنى ءسوزسىز. «بۇل وتاندىق بيزنەستەگى ەرەكشە وقيعا. فورۋم اياسىندا ينۆەستيتسيالىق بلوك بويىنشا 250 شەتەلدىك قوناق: جەكە ينۆەستورلار, حالىقارالىق ترانسۇلتتىق كومپانيالاردىڭ وكىلدەرى, ينۆەستيتسيالىق قورلاردىڭ, قارجى ينستيتۋتتارى مەن بانكتەردىڭ باسشىلارى كەلەدى دەپ كۇتىلۋدە», – دەيدى تۇركىستان وبلىسى اكىمىنىڭ ورىنباسارى ەربول تاسجۇرەكوۆ.
ساراپشىلاردىڭ ايتۋىنشا, ينۆەستيتسيالاردىڭ قوماقتى بولىگى تۋريزم سالاسىنا باعىتتالادى. 2017 جىلدىڭ قورىتىندىسى بويىنشا, تۇركىستان قالاسىنا كەلگەن تۋريستەر سانى 1,2 ملن ادامدى قۇراعان (57,2%-كە وسكەن). ال 2018 جىلدىڭ ءبىرىنشى جارتى جىلدىعىندا قالاعا كەلۋشىلەر سانى 700 مىڭنان استى, بۇل وتكەن جىلدىڭ وسى كەزەڭىمەن سالىستىرعاندا 60%-كە كوپ.
فورۋم تۇركىستان وبلىسىنىڭ اكىمى ق.ج.تۇيمەباەۆتىڭ قولداۋىمەن وتەدى. تاپ وسى شارا اياسىندا ەڭ باستى اقپاراتتىڭ, ياعني تۇركىستان وبلىسىنىڭ قالاي داميتىنى جانە وبلىستىڭ الدىندا قانداي ەكونوميكالىق ءتۇيىندى ماسەلەلەر تۇرعاندىعى ءمالىم بولادى.
«ەگەمەن-اقپارات»
