بۇل كەزدەسۋلەردىڭ قاتىسۋشىلارى «عىلىم مەن ونەر كودى» اتتى اشىق رەسپۋبليكالىق ءمۇسىن سايىسىنا نوبايلار مەن ماكەتتەر جاساپ جاتقان قازاقستان مۇسىنشىلەرىنىڭ شىعارماشىلىق شەبەرحاناسىنا بارادى. سايىس ماقساتى – دەنساۋلىق ساقتاۋ سالاسىنداعى يننوۆاتسيالىق تەحنولوگيالاردى بەينەلەيتىن ۇزدىك نوبايلاردى كوتەرمەلەۋ. ورناتىلعان ءمۇسىن شىمكەنت قالاسىنداعى قازاقستانداعى فارماتسەۆتيكالىق ءوندىرىسىنىڭ كوشباسشىسى بولىپ تابىلاتىن SANTO كومپانياسىنىڭ نىشانىنا اينالماق.
ۇيىمداستىرۋشىلار سايىسقا قاتىسۋعا 56 كاسىبي ءمۇسىنشىنى جينادى. جۇلدەلى ورىنعا الماتى مەن استانانىڭ عانا ەمەس, اتىراۋ, وسكەمەن, شىمكەنت قالالارىنىڭ سۋرەتشىلەرى دە كۇش سىناستى. ءمۇسىن سايىسىنا قاتىسۋعا سەگىز ءمۇسىنشى قىز نيەت ءبىلدىردى. نەگىزى, قىزداردىڭ مۇسىنمەن اينالاسۋى وتە سيرەك كەزدەسەتىن قۇبىلىس. اعاش ويۋ, ءمارمار جانە گرانيتتى وڭدەۋ, قولا قۇيۋ نازىك جاندار ءۇشىن وتە اۋىر جۇمىس سانالادى. گۇلفيا مەلدەش بۇل تۋرالى «قىزدار ەش ۋاقىتتا تايسالماي, ءوزىن كورسەتە الاتىن قىزمەت ءتۇرىن تاڭداعانى دۇرىس دەپ ويلايمىن. ءبىز ءوز قابىلەتىمىزگە سەنۋىمىز كەرەك. سوندا عانا باسقالار بىزگە سەنەدى!» دەدى. گۇلفيا كەزدەسۋدىڭ سوڭىنا قاراي قۇرالمەن جۇمىس ىستەۋدى جانە قولانى تەگىستەپ اجارلاۋ ءادىسىن كورسەتتى.
قازاقستان سۋرەتشىلەر وداعىنىڭ مۇشەسى, ءمۇسىنشى تىلەۋبەردى بيناشەۆ الماتى كوركەمونەر مەكتەبىن 1981 جىلى بىتىرگەن. ول مونۋمەنتالدى جۇمىستارىندا ۇلتتىق ونەر ەستەتيكاسىنا نەگىزدەلەتىن ورتاازيالىق پلاستيكاسىنىڭ كوركەم ءتىلىن كەڭىنەن قۇلپىرتىپ پايدالانادى. سالتتىق باعانا تۇرىندە جاسالعان, بۋىنداردىڭ اۋىسپالىعىن بىلدىرەتىن تىلەۋبەردىنىڭ «جەتىاتا» اتتى كومپوزيتسياسى ءا.قاستەەۆ اتىنداعى مەملەكەتتىك ونەر مۇراجايىنىڭ توپتاماسىندا ساقتاۋلى.
اكە ونەرىن كورىپ وسكەن قىزى گۇلفيا مەلدەشتىڭ سكۋلپتۋراعا دەگەن سالقار سەزىمى ءبىر ءسات سۋىعان ەمەس. قىزدىڭ ونەرگە دەگەن ىنتىزارلىعى اۋىپ, قازاق كولىك جانە بايلانىس اكادەمياسىنىڭ قاسىنداعى مۇحامەدجان تىنىشپاەۆ, شۋ ستانساسىنداعى تۇرار رىسقۇلوۆ, تانىمال اكتەر ءاسانالى ءاشىموۆ مۇسىندەرىنىڭ اۆتورى بولۋى دا بەكەردەن-بەكەر ەمەس. بۇگىندە ونەرىنە بۋىرقانعان شابىت قوسىپ, توسىنداۋ كەيىپتەردى بەينەلەۋى, تىڭ تۇرپاتتى مۇسىندەردى سومداۋى تاڭعالدىرادى. اكەسى تىلەۋبەردىنىڭ ساز كەشە اسپەتتەيتىن ونەرىن كورىپ وسسە دە بالا كۇننەن وسى قاجىر-قايراتتى تالاپ ەتەتىن قيىن ماماندىقتىڭ وزىنە باۋراعانى جۇمباق.
بۇلقىنعان بۇلا بۇلاقتار... كەرىم ءبىر دۇنيە... سازارعان ساز بالشىقتان وزگەشە ورنەك سالىپ وي تولعاۋ سىلقىم سىرلارعا جەتەلەيدى. الدىڭىزداعى ارناسىن اشىپ بۇلقىنعان عاجايىپ ءمولدىر بۇلاق كاۋسار ارنالارعا اينالىپ, جازيرالى جاعالاۋلارعا جەتكەندە ورنەكتى ونەر تولقىتىپ جىبەرەدى. ەي, دەيسىز سوندا... بۇلقىنعان بۇلا بۇلاقتار... عاجاپتىعىنا تاڭداي قاعاسىز... نەتكەن عاجاپ دۇنيە... اتكەنشەك تەربەتكەن بوزبالا مەن بويجەتكەن ءومىردىڭ الدىڭىزدان شىعار سىرلى كۇيىندە جەتەلەي بەرەدى.
ءمۇسىنشى ءۇيىنىڭ اۋلاسىنداعى قاربالاس ءبىر ءومىر وزەگى, نەگە ەكەنىن, ءۇزىلىپ تۇسكەندەي بولىپ قالىپ قويدى...
ساپارباي پارمانقۇل,
«ەگەمەن قازاقستان»
الماتى
