بۇل شەرۋدىڭ باستى ماقساتى – مەملەكەتتىك رامىزدەردى جان-جاقتى ناسيحاتتاۋ جانە اتا زاڭىمىزدا ايتىلعان قۇندىلىقتاردى كوپشىلىككە كەڭىنەن ءتۇسىندىرۋ. كوك تۋىمەن تۇعىرلى, ەلتاڭباسىمەن ەڭسەلى, انۇرانىمەن ايباتتى, قازاق ەلىنىڭ ماڭگىلىكتىڭ داڭعىلىنا تۇسكەن كەرۋەن كوشىنىڭ ءون بويىندا جاڭا زاماننىڭ جىلى لەبى ەسەدى. شۇعىلالى كۇننىڭ استىندا قالىقتاپ ۇشقان قىران دا قازاقتىڭ الار بيىگى اسقاق ەكەنىنەن سىر شەرتەتىندەي.
ال كيەلى شاڭىراق بولىپ بەينەلەنگەن ەلتاڭبا دا شانشىلعان ۋىقتارمەن ءبىرتۇتاس ورنەك قۇرىپ, التىن پىراقتارمەن كومكەرىلىپ, «مەنىڭ, قازاقستانىم!» دەگەن ۇران سوزدەرمەن اۋەزدى انگە ۇلاسىپ, جۇرەكتەردى تەربەيدى.
اۆتوشەرۋ زەرلى زەرەندىنىڭ سۇلۋ تابيعاتى اياسىنان ءوتىپ, اۋدان ورتالىعىنداعى الاڭعا كەلىپ توقتادى. ءبىر-بىرىمەن تىزبەكتەلگەن كولىكتەر كوك تۋىمىزبەن بەزەندىرىلىپ, ازاتتىقتىڭ ءار كۇنى ءوزىنىڭ اسەرلى تاعىلىمىمەن قىمبات ەكەنىنەن حابار بەرگەندەي. شەرۋگە قاتىسۋشىلار الاڭعا جينالعان قاۋىممەن تىلدەسىپ, سۇحباتتاستى. اتا زاڭ مەرەكەسىنىڭ اياسىندا ۇيىمداستىرىلعان شارانىڭ ءمانى مەن ماڭىزى ءتۇسىندىرىلدى.
ابىلاي حاننىڭ اق ورداسى قونعان كيەلى بۋراباي اۋدانىنىڭ ورتالىعى – ششۋچە قالاسىندا ونعا تارتا كوك تۋمەن بەزەندىرىلگەن اۆتوشەرۋ بىرنەشە كوشەنى ارالاپ ءوتىپ, ورتالىق الاڭعا كەلىپ توقتادى. بۇل جەردە جۇزدەن استام ادام قاتىسقان ميتينگ ءوتتى. جەرگىلىكتى ونەرپازداردىڭ ءان شاشۋىمەن باستاۋ العان شارادا بۋراباي اۋدانى اكىمىنىڭ ورىنباسارى ماليكە نۇرپانوۆا ءسوز سويلەپ, بارشا قاۋىمدى الداعى كونستيتۋتسيا كۇنىمەن قۇتتىقتادى.
«ەل بىرلىگى» قوعامدىق بىرلەستىگىنىڭ توراعاسى باقىت سماعۇل پاتريوتتىق راۋىشتە ءسوزىن جالعاپ, كەشەگى عۇن مەن ساق بابالارىمىزدان جالعاسقان تاريح جولىنا شولۋ جاسادى. ال اتالعان بىرلەستىك توراعاسىنىڭ ورىنباسارى ەسبولات دۇيسەنباەۆ شاراعا جينالعان جالىندى جاستاردى ءبىر جەلپىندىرىپ, ەلدىكتىڭ اسقاق ۇعىمىن تەبىرەنە جەتكىزدى.
بايقال ءبايادىل,
«ەگەمەن قازاقستان»
اقمولا وبلىسى
