تۇركىستان وبلىسى بويىنشا جاڭا وقۋ جىلىندا 55385 وقۋشى ءبىرىنشى سىنىپ تابالدىرىعىن اتتايدى. ياعني مەكتەپكە كەلەتىن وقۋشى سانى 19 مىڭعا ارتقان. دەموگرافيالىق وسىمگە بايلانىستى 2018-2025 جىلدار ارالىعىندا وبلىستا 184 مەكتەپ سالۋ قاجەتتىلىگى تۋىنداپ وتىر. بيىل 83 نىساننىڭ قۇرىلىسى جۇرگىزىلىپ جاتسا, ونىڭ 40-ى جىل سوڭىنا دەيىن پايدالانۋعا بەرىلەدى. وسىلايشا 9 اپاتتى, 5 ءۇش اۋىسىمدى, 13 ىڭعايلاستىرىلعان جانە ورىن تاپشىلىعى بايقالعان 10 مەكتەپتىڭ ماسەلەسى شەشىلمەك. سونداي-اق 3 كوللەدجدىڭ عيماراتى جاڭارادى.
وقۋشىسى كوپ ءوڭىردىڭ ءبىلىم سالاسىندا ۇستازداردىڭ الەۋمەتتىك جاعدايىن جاقسارتۋ دا الدىڭعى قاتارعا قويىلىپ وتىر. ماسەلەن, قىركۇيەك ايىنان باستاپ ۇلتتىق بىلىكتىلىك تەستىلەۋدەن وتكەن 4200 پەداگوگتىڭ ايلىق جالاقىسى ساناتتارىنا قاراي 30-50 پروتسەنتكە ارتادى. وعان وبلىستىق بيۋدجەتتەن 1 ملرد 67 ملن تەڭگە قارالعان. جاڭارتىلعان ءبىلىم بەرۋ مازمۇنىمەن ساباق بەرىپ جاتقان 32 مىڭنان استام ۇستازعا 30 پروتسەنت جالاقى قوسىلىپ, وعان بيۋدجەتتەن 10 ملرد 290 ملن تەڭگە بولىنگەن. تۇركىستان قالاسىندا وتكەن وبلىستىق تامىز كەڭەسىندە ءوڭىر باسشىسى جانسەيىت تۇيمەباەۆ وسىنداي دەرەكتەردى كەلتىرە كەلە, ۇستازدار قاۋىمىنا مەملەكەت تاراپىنان الەۋمەتتىك قولداۋ كۇشەيتىلەتىنىن اتاپ ءوتتى. «ەگەر, سىزدەر تۇركىستان قالاسىنا كەلگەن جاعدايدا ايلىق جالاقىلارىڭىزعا 20 پروتسەنت قوسىمشا اقى, ەڭبەك دەمالىستارىڭىزعا 7 قوسىمشا كۇن جانە 1 ايلىق قوسىمشا ساۋىقتىرۋ اقىسى قوسىلادى. الەۋمەتتىك سالا قىزمەتكەرلەرى مەن ۇستازدار قاۋىمى ءۇشىن تۇركىستان وبلىسىنىڭ 13 اۋدانىندا ينۆەستورلار ەسەبىنەن 14 مىڭ شارشى مەترلى 31 تۇرعىن ءۇي سالىنىپ جاتىر», دەدى وبلىس اكىمى. مۇعالىمدەردىڭ ءبىلىمىن جەتىلدىرۋ دە ماڭىزدى. بۇل ورايدا بيىل ءبىرىنشى رەت ءوڭىر ۇستازدارىنا م.لومونوسوۆ اتىنداعى ماسكەۋ مەملەكەتتىك ۋنيۆەرسيتەتىنىڭ ماگيستراتۋراسىنا 20 گرانت ءبولىنىپتى. ولار ءۇش ماماندىق بويىنشا الەمدەگى ەڭ اتاقتى وقۋ ورىندارىنىڭ بىرىندە ءبىلىمىن جەتىلدىرەدى. يگى ىسكە وبلىس بيۋدجەتىنەن قارجى قاراستىرىلعان. سونداي-اق قازىعۇرت اۋدانىندا ورنالاسقان ج.قاپپاروۆ اتىنداعى فيزيكا-ماتەماتيكا باعىتىندا وقىتاتىن مامانداندىرىلعان مەكتەپ-ينتەرناتىنا شەتتەن كەلگەن مۇعالىمدەر ءۇشىن 15 جەكە ءۇي سالىنباق. بۇگىنگى تاڭدا قاجەتتى قۇجاتتارى دايىندالىپ جاتىر.
كەڭەستە ءوڭىر باسشىسى قوعامدا ءجيى كوتەرىلىپ جۇرگەن ماسەلەگە قاتىستى كوزقاراسىن ءبىلدىردى. «بۇدان بىلاي مۇعالىمدەردى ءوز مىندەتتەرىنە كىرمەيتىن شارۋالارعا ءجونسىز جۇمساۋ توقتاتىلۋى كەرەك», دەپ مالىمدەدى ج.تۇيمەباەۆ. سونداي-اق ول بارلىق اۋدان جانە قالا اكىمدەرىنە مۇعالىمدەردىڭ جاعدايىنا مۇقيات قاراۋدى, ولاردىڭ الەۋمەتتىك ماسەلەلەرىن بارىنشا شەشۋ جونىندە تاپسىرما بەرەتىنىن جەتكىزدى. «بيىلعى تامىز كەڭەسى ەرەكشە تاريحي كەزەڭدە ءوتىپ جاتىر. ەلباسى جارلىعىمەن تۇركىستان وبلىسى قۇرىلىپ, ونىڭ ورتالىعى بولىپ تۇركىستان قالاسى بەكىتىلدى. ياساۋيدەي بابامىز, ابىلاي حان باستاعان قازاقتىڭ 21 حانى جاتقان, قازاقتىڭ قايماقتارى ماڭگى قونىس تاپقان تۇركىستاننىڭ تاريحىن ۇستازدار قاۋىمى وقۋشىلارعا ءسىڭىرۋى كەرەك», دەدى وبلىس اكىمى.
كاسىپتىك ءبىلىم ساپاسىن كوتەرۋ ماسەلەسى دە نازاردان تىس قالمايدى. جاسىراتىنى جوق, كاسىپتىك ءبىلىم مەكەمەلەرىن ءبىتىرۋشى تۇلەكتەردىڭ 25-30 پروتسەنتى جۇمىسپەن قامتاماسىز ەتىلمەي كەلەدى. ياعني قوعامعا ناقتى قانداي ماماندار قاجەت ەكەنى ءجىتى زەرتتەلمەگەندىكتەن جاستار العان ديپلومىنا ساي جۇمىس تاپپاي ءجۇر. وڭىردە وسى ولقىلىقتى بولدىرماۋ ماقساتىندا بيىل كاسىپتىك مامان دايارلاۋ باعىتىندا مەملەكەتتىك تاپسىرىستى جۇيەلەۋ ءۇشىن 7 جۇمىسشى توپ قۇرىلعان. جۇمىسشى توپ قوعامعا اسا قاجەتتى ماماندىقتاردى سارالاعان. ەندى وسى جاڭا فورمات بويىنشا وڭىرگە قاجەتتى ماماندار دايارلاناتىن بولادى. وبلىس اكىمىنىڭ مالىمدەۋىنشە, بيىل مەملەكەتتىك تاپسىرىسقا رەسپۋبليكادان 3 ملرد 900 ملن تەڭگە, ال وبلىستان 17 ملرد تەڭگە قارالعان. وسىلايشا ناقتى ءىس ارقىلى كاسىپتىك ءبىلىمنىڭ ساپاسىن كوتەرىپ, وبلىس ەكونوميكاسىنا قاجەتتى ماماندار تاپشىلىعى ماسەلەسىن شەشۋ كوزدەلىپ وتىر. ايتا كەتەلىك, تەحنيكالىق جانە كاسىپتىك ءبىلىم بەرۋدە وبلىستا 94 كوللەدج 109 ماماندىق بويىنشا كادرلار دايارلاپ كەلەدى. كەڭەستە 2017-2018 وقۋ جىلىندا اتقارىلعان جۇمىستارى مەن الداعى مىندەتتەر تۋرالى بايانداما جاساعان وبلىستىق ءبىلىم باسقارماسىنىڭ باسشىسى يساتاي ساعىندىقوۆتىڭ ايتۋىنشا, بيىل ءوڭىردىڭ ءبىلىم بەرۋ سالاسىنا 262 ملرد 24 ملن تەڭگە قارالىپ, قارجى كولەمى 2017 جىلمەن سالىستىرعاندا 6 ملرد 15 ملن تەڭگەگە ۇلعايعان. وڭىردە 909 ورتا ءبىلىم بەرۋ مەكەمەلەرى بار. مەكتەپتەردى جاڭا وقۋ جىلىنا دايىنداۋ ماقساتىندا جەرگىلىكتى بيۋدجەت ەسەبىنەن 863 مەكتەپكە اعىمداعى جوندەۋ جۇمىستارى جۇرگىزىلسە, 83 ءبىلىم بەرۋ نىسانىنىڭ قۇرىلىسى باستالعان. باسقارما باسشىسىنىڭ ايتۋىنشا, ورتا ءبىلىم بەرۋ مەكەمەلەرىندە وقۋلىقتارمەن قامتاماسىز ەتۋ كورسەتكىشى تولىق ورىندالىپ وتىر, سونداي-اق «مەكتەپكە جول» اكتسياسى بويىنشا 9604 وقۋشىعا ماتەريالدىق كومەك كورسەتىلگەن. ال وڭىردەگى 1381 مەكتەپكە دەيىنگى ءبىلىم بەرۋ ۇيىمدارىنىڭ 590-ى مەملەكەتتىك, 791-ءى جەكەمەنشىك. بيىل جەرگىلىكتى بيۋدجەت ەسەبىنەن 188 بالاباقشاعا اعىمداعى, ال 280 بالاباقشاعا كۇردەلى جوندەۋ جۇمىستارى جۇرگىزىلدى.
ايتا كەتەلىك, تامىز كەڭەسىندە وبلىس اكىمى 5 ۇستازعا «وبلىسقا سىڭىرگەن ەڭبەگى ءۇشىن» مەدالىن, 10 پەداگوگقا وبلىس اكىمىنىڭ قۇرمەت گراموتاسى مەن العىس حاتىن تابىس ەتتى. سونىمەن قاتار 20 ادام ءبىلىم جانە عىلىم مينيسترلىگىنىڭ ماراپاتتارىنا يە بولسا, 5 ۇستاز وبلىستىق ءماسليحاتتىڭ گراموتاسىمەن ماراپاتتالدى.
عالىمجان ەلشىباي,
«ەگەمەن قازاقستان»
تۇركىستان وبلىسى
