«الىپپە» مەن «بۋكۆار» بازالىق وقۋلىقتارى دايىندالۋدا
اتالعان جيىندا الدىمەن مەكتەپكە دەيىنگى ءبىلىم جايى ءسوز بولدى. «بۇگىن مەملەكەت-جەكەمەنشىك ارىپتەستىگى جاقسى دامىپ كەلەدى. جەكەمەنشىك بالاباقشالار ۇلەسى 30 پروتسەنتتەن استى. ال 3-6 جاستاعى بالالاردى بالاباقشامەن قامتۋدى 93%-كە جەتكىزدىك. «بالاپان» باعدارلاماسى ارقىلى بالاباقشالارداعى جالپى ورىن سانى حالىقتىڭ سۇرانىسىنان استى. بىراق ايماقتاردا ديسبالانس بار. اسىرەسە الماتى مەن استانادا دەفيتسيت ۇلكەن. ودان كەيىنگى ماڭىزدى جۇمىس – بالاباقشاعا كەزەككە تۇرۋ مەن جولداما بەرۋدى تولىعىمەن ەلەكتروندى فورماتقا اۋىستىرۋ. سوندا كەزەك جاريا تۇردە جانە تەز جىلجيتىن بولادى» دەدى ە.ساعاديەۆ. مينيسترلىكتىڭ حابارلاۋىنشا كەلەسى جىلدان باستاپ 0-ءشى سىنىپ تاربيەشىلەرى مەن مۇعالىمدەردى دايىنداۋ جۇمىسى باستالادى. لاتىنشا «الىپپە» جانە كيريليتسادا «بۋكۆار» بازالىق وقۋلىقتارىن دايىنداۋ جۇمىسى ءجۇرىپ جاتىر. وقۋلىقتار 2020-2021 وقۋ جىلىنا دايىن بولادى. ورتا بىلىمگە وتكەن جىلى كوپ كوڭىل ءبولىندى. بۇل دەڭگەيدە كەستەگە سايكەس جاڭارتىلعان مازمۇنعا كوشۋ جۇمىستارى جالعاسۋدا. جاڭا وقۋ جىلىنان باستاپ 3, 6, 8-ءشى سىنىپتار مازمۇنى جاڭارتىلعان باعدارلامامەن وقي باستايدى. 4, 9, 10-شى سىنىپتاردا اپروباتسيا باستالادى. «قازىرگى كۇنى رەسپۋبليكا بويىنشا وقۋلىقتاردى مەكتەپتەرگە جەتكىزۋ 99,4 پروتسەنتتى قۇرادى. وقۋلىقتاردىڭ ساپاسىن جاقسارتۋ ءۇشىن كوپ جۇمىس اتقارىلدى. بيىل وقۋلىقتاردىڭ ساپاسى جوعارى بولادى دەپ سەنەمىز. وقۋلىقتاردىڭ ەلەكتروندى نۇسقالارى ەنگىزىلدى», دەدى مينيستر.
«ينفورماتيكا» ءپانى 3-ءشى سىنىپتان باستالادى
سونىمەن قاتار ۆەدومستۆو باسشىسى وسى جىلى 1-11 سىنىپتارعا ارنالعان جاڭا مەملەكەتتىك ءبىلىم بەرۋ ستاندارتتارى, جاڭا تيپتىك وقۋ جوسپارلارى مەن وقۋ باعدارلامالارى بەكىتىلگەنىن, ەندى تەك قانا ءبىر تيپتىك وقۋ جوسپارى بولمايتىنىن, بىرنەشە تيپتىك وقۋ جوسپارى دايىنداپ بەكىتىلگەنىن اتاپ ءوتتى. سونىڭ نەگىزىندە مەكتەپكە وزىنە كەلەتىن جوسپار بويىنشا جۇمىس ىستەۋىنە مۇمكىندىك بەرىلگەنىن, بارلىق مەكتەپكە وسى توج-دار ارقىلى اكادەميالىق دەربەستىك بەرۋدى دۇرىس دەپ ەسەپتەيتىنىن جەتكىزدى.
«رۋحاني جاڭعىرۋ» باعدارلاماسى اياسىندا 5-7 سىنىپتاردا «ولكەتانۋ» كۋرسى العاش رەت ەنگىزىلەدى. وقۋلىقتار مازمۇنىن وڭىرلەردە قۇرىلعان اۆتورلىق توپتارمەن بىرگە جاسادىق. بۇگىندە وقۋلىقتار دايىن. ايتا كەتەتىن تاعى ءبىر جايت, بيىل «ينفورماتيكا» ءپانى 3 سىنىپتان باستالادى. «تسيفرلى قازاقستان» باعدارلاماسىنىڭ اياسىندا ينفورماتيكا ساباعى كەلەسى جىلدان 1-2 سىنىپتارعا ەنگىزىلەدى. ونىڭ باعدارلامالارى دايىندالۋدا. تسيفرلى ءبىلىم بەرۋ رەسۋرستارى بەلسەندى قولدانىلۋدا, دەدى ە.ساعاديەۆ.
جيىن بارىسىندا ءبىلىم جانە عىلىم ءمينيسترى ەلەكتروندى قۇجاتتاردى كەڭ جولاقتى ينتەرنەتى جوق مەكتەپتەردە عانا قاعاز تۇرىندە تولتىرۋعا رۇقسات بەرىلەتىنىن اتاپ ءوتتى.
سونىمەن قاتار ەلباسى جولداۋىندا ايتىلعان مىندەتتەردى جۇزەگە اسىرۋ ماقساتىندا جاڭا وقۋ جىلىنان باستاپ جاڭارتىلعان ءبىلىم بەرۋ مازمۇنى بويىنشا ساباق بەرەتىن 205 مىڭ مۇعالىمنىڭ جالاقىسى 30%-كە كوبەيگەندىگىن ايتا كەتكەن ءجون. جانە بيىل پەداگوگتاردى اتتەستاتتاۋدىڭ جاڭا جۇيەسى ەنگىزىلدى. بۇل بىلىكتىلىك ساناتتارى ءۇشىن لاۋازىمدىق جالاقىعا 30%-تەن 50%-كە دەيىن قوسىمشا ۇستەمەاقىنى قاراستىرادى. «اتتەستاتتاۋعا مامىر ايىندا 60 مىڭعا جۋىق مۇعالىم قاتىسىپ, 36 مىڭنان استامى اتتەستاتسيادان ءوتتى. ولار 63 پروتسەنتتى قۇرادى. وسى جىلدىڭ قىركۇيەك ايىنان باستاپ جاڭا اتتەستاتسيا تارتىبىنەن وتكەن مۇعالىمدەرگە كاتەگوريالارىنا سايكەس قوسىمشا اقى تولەنەدى. سونىمەن بىرگە اعىمداعى جىلى 110 مىڭنان استام پەداگوگ رەسپۋبليكالىق بيۋدجەت ەسەبىنەن بىلىكتىلىكتى ارتتىرۋ كۋرستارىنان وتۋدە. 8 مىڭنان استام ءپان مۇعالىمدەرى جەكە پاندەردى اعىلشىن تىلىندە وقىتۋ ءۇشىن تىلدىك كۋرستاردا وقۋدا. ولاردىڭ 5 مىڭعا جۋىعى وسى وقۋ جىلىنان باستاپ ساباق بەرۋگە كىرىسەدى», دەدى ەرلان كەنجەعالي ۇلى.
گرانتتار ۋنيۆەرسيتەتتەرگە ەمەس, بالالارعا بەرىلەدى
بيىل پرەزيدەنت نۇرسۇلتان نازارباەۆتىڭ بەس الەۋمەتتىك باستاماسى بويىنشا قوسىمشا 20 مىڭ گرانت بولىنگەنى بەلگىلى. سوڭعى ۋاقىتتا ۇيالى تەلەفوندارعا كوپتەگەن جوعارى وقۋ ورىندارىنان «شەكتىك بالدى جيناساڭ بولدى, وقۋ ورنىمىزعا قابىلدايمىز» دەگەن مازمۇندا حاتتار لەگى كەلىپ جاتقانى جاسىرىن ەمەس. وسى ورايدا جۋرناليستەر تاراپىنان قويىلعان ساۋالعا مينيستر ءوز ويىن ءبىلدىردى.
«بىرىنشىدەن, گرانتتار ۋنيۆەرسيتەتتەرگە ەمەس, بالالارعا بەرىلەدى. ءوزىنىڭ گرانت يەگەرى اتانعانىن كەز كەلگەن تۇلەك ينتەرنەت رەسۋرستارى ارقىلى بىلۋگە تولىق مۇمكىندىگى بار. ال جاڭاعىداي تاراپ جاتقان اقپاراتتار سەنىمسىز حاتتار دەۋگە بولادى. ەگەردە ۋنيۆەرسيتەت جارناما رەتىندە نەمەسە بەلگىلى ءبىر تۇلەككە وزدەرىنىڭ گرانتتارىن بەرەمىز دەسە, ءبىز بۇل ماسەلەگە ەشقانداي قارسىلىق تانىتا المايمىز. بۇل وقۋ ورنىنىڭ ءوزىنىڭ ىشكى ماسەلەسى», دەدى ول.
ءبىلىم جانە عىلىم ءمينيسترى قىركۇيەكتەگى ماڭىزدى ماسەلەلەردىڭ ءبىرى جاتاقحانا جايىنا دا توقتالىپ, وسى ورايدا اتقارىلىپ جاتقان ماسەلەلەرگە ءمان بەرىپ ءوتتى.
«جاتاقحانا ماسەلەسىنە قاتىستى ەلباسى باستاماسىمەن جاڭا مەحانيزمدى بەكىتتىك. جاتاقحانالاردى جەكەمەنشىك كومپانيالار, ۋنيۆەرسيتەتتەر سالسا, ينۆەستيتسيالىق قارجىسىن 8 جىلدا قايتارىپ بەرەتىن بولامىز. قازىر بىزدە 77 مىڭ ورىنعا ەسەپتەلگەن جاتاقحانا قۇرىلىسىن سالۋ ءۇشىن وڭىرلەردەن جەر بولىنگەن بولاتىن. الداعى ۋاقىتتا وسى ماسەلە توڭىرەگىندە جۇمىستى جالعاستىراتىن بولامىز», دەدى مينيستر.
راۋان قايدار,
«ەگەمەن قازاقستان»
