اقتوبە قالاسىنىڭ اۋماعى مەن شەكاراسى جىلدان-جىلعا ءوسىپ كەلەدى. قازىرگى كەزدە وبلىس ورتالىعىنىڭ ىشىندە دە, سىرتىندا دا جاڭا كوشەلەر مەن ورامدار پايدا بولۋدا. ونىڭ بارىنە اتاۋ كەرەك ەكەنى بەلگىلى. ايتپەسە ەل-جۇرت جاڭا مەكەنجايلار مەن عيماراتتاردى قايدان ىزدەپ تابارىن بىلمەي, اۋرە-سارساڭعا تۇسپەي مە؟ ونىڭ ۇستىنە اقتوبە قالاسىنىڭ قۇرامىنا كىرەتىن اقجار, اقجار-2, زارەچنىي, كىرپىشتى, راۋان جانە ياسنىي سەكىلدى تۇرعىن ءۇي اۋداندارىندا ءبىراز كوشەلەر ءالى كۇنگە دەيىن اتاۋسىز قالىپ كەلىپتى.
وسىعان وراي اقتوبە وبلىستىق ءماسليحاتى 2018 جىلدىڭ ناۋرىز ايىندا 67 كوشەگە اتاۋ بەرۋ جونىندە شەشىم قابىلداعان ەدى. مىنە, سول كەزدەن بەرى 4-5 اي سىرعىپ وتە شىعىپتى. وسى ۋاقىتتىڭ ارالىعىندا جاڭا كوشە اتاۋلارى ادىلەت ورگاندارىندا تىركەلىپ, ءتيىستى قۇجاتتارى رەتتەلگەن. بۇگىنگى كۇنى قاي كوشە ەكەنىن ايعاقتايتىن كورسەتكىشتەر مەن بەلگىلەردى ءىلۋ مەن ورناتۋ جۇمىستارى قولعا الىنعان.
سونىمەن ءبىر مەزگىلدە تاۋەلسىزدىك پەن بۇگىنگى جاڭا قازاقستان قوعامى تالاپتارىمەن سايكەسە المايتىن كوشەلەردى ەل-جۇرتتىڭ زەردەسىندە ساقتالىپ قالعان بۇرىنعى ءتول اتاۋلارىمەن الماستىرۋ نەمەسە ونى باسقاشا اتاۋ شارالارى دا ءماسليحات شەشىمىنە سايكەس جۇيەلى تۇردە جۇرگىزىلىپ كەلەدى. بۇل جونىندە گازەت تىلشىسىنە اقتوبە وبلىستىق تىلدەردى دامىتۋ باسقارماسىنىڭ باسشىسى گۇلايىم تولەباەۆا ايتىپ بەردى.
ايتالىق, ناقتى دەرەكتەرگە سۇيەنسەك, قالانىڭ قاق ورتالىعىنداعى عازيزا جۇبانوۆا كوشەسىمەن قيىلىساتىن اتاۋسىز كوشە بۇگىنگى كونستيتۋتسيامىزدىڭ تۇپكى توركىنى – «جەتى جارعىنى» ومىرگە كەلتىرگەن تاۋكە حاننىڭ ەسىمىن يەلەنۋى قاي تۇرعىدان دا قيسىندى ءارى جاراسىمدى كورىنەدى. وسى ىڭعايمەن تاعى دا ءارى قاراي تىزبەلەي تۇسسەك, قابانباي باتىر, ءجۇسىپ بالاساعۇن, اقان سەرى, اقتان كەرەي ۇلى جانە ەر قوساي سەكىلدى تاريحي تۇلعالاردىڭ اتى-جوندەرى حالقىمىزدىڭ ارعى-بەرگى تاريحىمەن تىعىز ۇيلەسىم تاۋىپ تۇرعانى تالاسسىز. سونىمەن بىرگە قوزى كورپەش, قالقامان – مامىر, نارىن, سايگ ۇلىك جانە وقجەتپەس سىندى اتاۋلار دا بۇگىنگى ۇرپاق وكىلدەرىن اسىل دا اسقاق سەزىمدى ءپىر تۇتۋعا جانە تۋعان توپىراق پەن ەجەلگى سالت-داستۇرلەردى قاستەرلەۋگە ۇندەي الارى انىق.
بۇل ارادا كوشە اتاۋلارىنان كورىنىپ تۇرعانىنداي, وبلىستىق ءماسليحات دەپۋتاتتارى ايماقتىق تار ورىستىلىكتەن بويلارىن اۋلاق سالىپ, تۇتاستاي ەلىمىز ماقتان تۇتاتىن تاريحي تۇلعالاردىڭ ەسىمدەرى مەن كيەلى جەر اتاۋلارىن اسقاقتاتۋعا باسىمدىق بەرگەنى ايقىن بايقالادى.
تەمىر قۇسايىن,
«ەگەمەن قازاقستان»
اقتوبە
