اۋستريا پرەزيدەنتى الەكساندر ۆان دەر بەللەن, بۇۇ-نىڭ سەگىزىنشى باس حاتشىسى پان گي مۋن, اۋستريانىڭ بۇرىنعى پرەزيدەنتى حاينتس فيشەر, سەربيانىڭ پرەمەر-ءمينيسترى الەكساندر ۆۋچيچ جانە تاعى باسقا دا ساياسات ساڭلاقتارىن ءبىر ارنادا توعىستىرعان باسقوسۋدا عالامدىق تەكتونيكالىق ساياسي-ەكونوميكالىق وزگەرىستەر كونتەكسىندەگى ەلەۋلى ماسەلەلەر سارالاندى.
وزەكتى فورۋمعا ەلىمىزدىڭ جەتەكشى وقۋ ورىندارىنىڭ ءبىرى – ءال-فارابي اتىنداعى قازۇۋ جانە تاياۋدا ۋنيۆەرسيتەت جانىندا قۇرىلعان پان گي مۋن اتىنداعى تۇراقتى دامۋ ينستيتۋتى بۇۇ-نىڭ جاھاندىق ازاماتتىق جانە تۇراقتى دامۋ باعىتىنداعى باستامالارىن جۇزەگە اسىرۋ بويىنشا ىنتىماقتاستىقتىڭ پەرسپەكتيۆالارىن تالقىلاۋ ماقساتىندا شاقىرىلعان بولاتىن.
ەسكە سالساق, قازۇۋ «بۇۇ-نىڭ «اكادەميالىق ىقپال» جاھاندىق حابىن 2014 جىلدان بەرى باسقارىپ كەلەدى. از ۋاقىت ىشىندەگى ناتيجە دە جامان ەمەس. باعدارلامانىڭ ماڭىزدى قاعيدالارىن ىسكە اسىرۋدا حالىقارالىق دەڭگەيدە كوشباسشى بولعان ۋنيۆەرسيتەتتى الەمنىڭ وزىق ەلدەرى كوشباسشى رەتىندە جوعارى باعالاپ وتىر.
قازۇۋ رەكتورى, اكادەميك عالىم مۇتانوۆتىڭ «ۋنيۆەرسيتەت 4.0 – جوعارى ءبىلىم بەرۋدەگى جاڭا كەزەڭ» اتتى بايانداماسى فورۋمعا قاتىسۋشىلاردىڭ ەرەكشە قىزىعۋشىلىعىن تۋدىردى. اتالعان باستاما بۇعان دەيىن بۇۇ-نىڭ نيۋ-يوركتەگى شتاب-پاتەرىندە مامىر ايىندا وتكىزىلگەن كونفەرەنتسيا بارىسىندا العاش رەت ۇسىنىلعان ەدى. وسى قىزمەتتەگى ايقىن باعىت مەملەكەتتىك باعدارلاما – «بولاشاققا باعدار: قوعامدىق سانانى جاڭعىرتۋ» يدەياسىنان باستاۋ الادى.
جاڭا ۋنيۆەرسيتەت مودەلىنىڭ باستى ماقساتى – وسكەلەڭ ۇرپاقتى بويىندا الەمدىك جوعارى رۋحاني-ادامگەرشىلىك قاسيەتتەرى مەن بەلسەندى ازاماتتىق ۇستانىمى بار ىزگى ازامات رەتىندە قالىپتاستىرۋ. فورۋمعا قاتىسۋشىلار اتاپ وتكەندەي, «ۋنيۆەرسيتەت 4.0» جاڭا مودەلى جاھاندانۋ جاعدايىندا, سونداي-اق جاڭا تەحنولوگيالاردىڭ قارقىندى دامۋى كەزەڭىندە الەم ءۇشىن ماڭىزدى.
قازاقستاندىق جوعارى وقۋ ورنىنىڭ فورۋمعا قاتىسۋىنىڭ باستى ناتيجەسى عالامدىق ازاماتتىق ورتالىعى (اۋستريا), تۇراقتى دامۋ ينستيتۋتى (وڭتۇستىك كورەيا) جانە ءال-فارابي اتىنداعى قازۇۋ اراسىندا ستراتەگيالىق سەرىكتەستىك تۋرالى كەلىسىمگە قول قويۋ بولدى. قۇجاتتى اۋستريانىڭ ەكس-پرەزيدەنتى حاينتس فيشەر, بۇۇ-نىڭ سەگىزىنشى باس حاتشىسى پان گي مۋن جانە قازۇۋ رەكتورى عالىم مۇتانوۆ (قازاقستان) قول قويىپ بەكىتتى. كەلىسىم ادامزاتتىڭ جاھاندىق ماسەلەلەرى مەن قازىرگى زاماننىڭ سىن-تەگەۋرىندەرىن شەشۋدە تاراپتاردىڭ كۇش-جىگەرىن بىرىكتىرۋگە مۇمكىندىك بەرمەك.
فورۋمعا قاتىسقان ايتۋلى عالىمدار مەن الەمدىك دەڭگەيدەگى ساراپشىلار ەلىمىزدىڭ عالامدىق ىنتىماقتاستىققا قوسىپ كەلە جاتقان ۇلەسىن ەرەكشە باعالاپ, العىس ءبىلدىردى.
ارمان وكتيابر,
«ەگەمەن قازاقستان»
الماتى
