جيىنعا قاتىسۋشىلار ازوۆەلەكتروستال جانە كرەمەنچۋگ بولات قۇيۋ زاۋىتىنان شىققان ءبۇيىر رامالارىنان جيناقتالعان جۇك ۆاگوندارىن الداعى ۋاقىتتا پايدالانۋ ماسەلەلەرىنە ەرەكشە نازار اۋداردى.
«قتج» ۇك»اق باسقارما توراعاسىنىڭ قاۋىپسىزدىك جونىندەگى ورىنباسارى مارات شاكەنوۆ جۇك ۆاگوندارىنىڭ قوزعالىس قاۋىپسىزدىگىن قامتاماسىز ەتۋ بويىنشا ماسەلەلەردى بىرلەسە شەشۋ قاجەتتىلىگىن اتاپ ايتتى جانە ول سارىشاعان –شىعاناق تەلىمىندە جۇك ۆاگوندارىنىڭ جولدان شىعىپ كەتۋىنە ءبۇيىر راماسىنىڭ سىنۋى سەبەپ بولعانىن ەسكە سالدى.
قازاقستان اۋماعىندا 2010 جىلدان باستاپ بۇگىنگە دەيىنگى ارالىقتا ءبۇيىر رامالارىنىڭ 85 رەت سىنۋى مەن تەسىلۋ جاعدايى ورىن العان بولسا, سونىڭ ىشىندە 33-ءى كرەمەنچۋگ بولات قۇيۋ زاۋىتىنان شىققان رامالار, ال 25-ءى ازوۆەلەكتروستالدىكى بولدى. 2018 جىلدىڭ ءبىرىنشى جارتى جىلدىعىندا ۆاگون پايدالانۋ دەپوسى جۇمىسشىلارىنىڭ تەحنيكالىق قىزمەت كورسەتۋى كەزىندە 89 اقاۋلى ءبۇيىر راماسى انىقتالدى. اتالعان مەرزىمدە ۆاگونداردى جوسپارلى جوندەۋ كەزىندە اقاۋى بار جوعى تەكسەرىلگەن 36000 رامانىڭ 1412-ءسىنىڭ اقاۋى بار بولىپ شىقتى, ونىڭ ىشىندە 118 ءونىم «ازوۆەلەكتروستالدەن» شىققان, ال 125-ءى كرەمەنچۋگ زاۋىتىنىڭ ءونىمى. سونىمەن 2011 جىلدان بەرى «قازتەمىرترانس» اق 2008-2009 جىلدارى «ازوۆەلەكتروستال» زاۋىتىندا وندىرىلگەن 3971 ءبۇيىر راماسىن پايدالانۋدان شىعارىپ تاستادى.
«قتج-جۇك تاسىمالى» اق ۆاگون شارۋاشىلىعى دەپارتامەنتىنىڭ باس مەنەدجەرى دۋلات بەكتۇروۆ تەمىرجولشىلار ساپاسىز ءبۇيىر رامالارىن قولدانىستان الىپ تاستاۋ ءۇشىن كەرەكتى شارانىڭ ءبارىن جاساپ جاتقانىن ايتتى. الايدا بۇل دەتالداردى جەكە وپەراتورلار – «يستكومترانس» جشس, «برك-ليزينگ» اق (ەنشىلەس), «Petroleum» جشس, «مەگا-ينتەركوم» جشس, «المالى» تك»جشس جانە باسقالارى قولدانۋدى جالعاستىرۋدا.
وتىرىسقا قاتىسۋشىلار الداعى ۋاقىتتا ساپاسىز ءبۇيىر رامالارىنان جيناقتالعان جۇك ۆاگوندارىنىڭ پايدالانىلۋى تۋرالى پىكىر الماستى جانە قوزعالىس قاۋىپسىزدىگىن ارتتىرۋ, اعىمدى اعىتىپ جوندەۋدى جۇرگىزۋ بارىسىندا جۇمىستىڭ تولىق تسيكلىمەن قامتاماسىز ەتۋ بويىنشا ۇسىنىستارىن ايتتى.
جيىندا ۆاگون قۇراستىراتىن ونىمدەردىڭ, سونىڭ ىشىندە ءبۇيىر رامالارىنىڭ سەرتيفيكاتسياسى مەن ساپاسى ماسەلەلەرىنە باسا نازار اۋدارتىلدى.
سوعان قوسا تەمىر جول كولىگىندە بۇدان بىلاي قاۋىپسىزدىكتى نىعايتۋ سالاسىندا زاڭ بازالارىن جەتىلدىرۋ بويىنشا ۇسىنىستار دا ايتىلدى.
وتىرىس قورىتىندىسى بويىنشا حاتتاما تولتىرىلىپ, قۇجات قازاقستان تاسىمالداۋشىلارى مەن ۆاگون وپەراتورلارىنىڭ اسسوتسياتسياسىنا جولداندى.
