ۇيىمداستىرىلار بارلىق شارالار مەن ەكسپوزيتسيالار كونە داۋىردەگى تاريح پەن بۇگىنگى كۇندەر جەتىستىگىن, قازاق حالقى شەبەرلەرىنىڭ ونەرىن, ۇرپاقتار ساباقتاستىعىن تۇگەل قامتيدى.
كورمەنىڭ ماقساتى – قازاق مادەنيەتىنىڭ جاڭا زامان ىرعاعىنا ءسىڭىسىپ, بەيىمدەلۋىن ناسيحاتتاۋ, جاستاردىڭ تاريحي قۇندىلىقتارعا قىزىعۋشىلىعىن وياتىپ, حالىق شەبەرلەرىنىڭ جۇمىسىن كورسەتۋ.
كورمەگە قاتىساتىن قولونەر شەبەرلەرى وزدەرىنىڭ قولىنان شىققان بۇيىمدارىن كورسەتۋمەن قاتار, جاڭا ونەردى ۇيرەنۋگە ەرىك بىلدىرگەن بارلىق جاندارعا ارناپ شەبەرلىك ساعاتتارىن تەگىن وتكىزەدى. كەلۋشىلەر ەر-توقىم, اۋىزدىق پەن قامشى سەكىلدى ات ابزەلدەرىن دە تاماشالاي الادى.
كورمەدە ەلىمىزدىڭ ءار ايماعىنان كەلگەن تاريحي جادىگەرلەر ورنالاستىرىلادى. كەلۋشى قوناقتار وتكەن عاسىرعا ساياحات جاساپ, سول داۋىردەگى كيىمدەر مەن اشەكەيلەر, تۇرمىستىق بۇيىمدار مەن ورتا عاسىرلاردا قولدانىلعان وزگە دە زاتتاردى تاماشالاي الادى. ولاردىڭ ىشىندە كونە زامان كوشپەندىلەرىنىڭ بۇيىمدارى دا بار. سول زامان ادامدارىنىڭ كوستيۋمدەرى مەن قارۋ-جاراق وزگە دە اتريبۋتتارىنىڭ عىلىمي جولمەن قايتا قالپىنا كەلتىرىلگەن ناقتى كوشىرمەلەرى قويىلادى.
ەتنوديزاينەرلەر بايقاۋىنىڭ باعدارلاماسىندا قازىرگى زامانعى قازاقى كيىمدەردىڭ ۇلگىلەرى كورسەتىلەدى. سونىمەن قاتار «توميريس» پەن كىشكەنتاي بۇلدىرشىندەرگە ارنالعان «جاس باتىر» كوستيۋمدەر بايقاۋى ۇيىمداستىرىلادى.
كوركىمەن كوز تارتقان كيىز ۇيلەردە ءيىسى مۇرىن جاراتىن ءدامدى تاعامدار پىسىرىلەدى. مۇندا مەيماندار باۋىرساق, قۇرت پەن جەنت جانە ت.ب. ءداستۇرلى قازاق تاعامدارىنان اۋىز تيە الادى.
شارا سوڭىندا فولكلورلىق مۋزىكانى ەرەكشە ينتەرپرەتاتسيادا ۇسىنار ونەرپازداردىڭ گالا-كونتسەرتى ۇيىمداستىرىلادى. كومەيمەن ورىنداۋشىلاردىڭ زاماناۋي ۇلگىلەرىن ۇسىنار تيۋرگەن كام مەن «ارقايىم» نەو-ەتنو-فولك توبى دا اننەن شاشۋ شاشادى.
وسى شاراعا كەلۋشىلەردى ەتنو ستيلىندە جۇمىس ىستەيتىن ديدجەيلەردىڭ العاشقى قازاقستاندىق بايقاۋى كۇتىپ تۇر. قوبىز, دومبىرا مەن وزگە دە ءداستۇرلى اسپاپتاردىڭ زامان اعىمىنا ساي بەيىمدەلگەن اۋەندەرى شىرايلى كەشتى اسەرلى قىلا تۇسپەك.
جازعى ماۋسىمنىڭ شىمىلدىعىن «قازاقستان – ۇلى دالا ەلى» رەسپۋبليكالىق كورمەسى جابادى. اۋقىمدى شاراعا كەلەر قوناقتار ەرەكشە ەموتسياعا بولەنىپ, تۋعان ۇلتتىڭ تاريحىنىڭ جاڭا پاراقتارىمەن تانىسادى.
شارا قازاقستان رەسپۋبليكاسى مادەنيەت جانە سپورت مينيسترلىگىنىڭ تاپسىرىسىمەن وتكىزىلەدى. كورمەنى ساعات 10.00-22.00 ارالىعىندا تاماشالاۋعا بولادى, كىرۋ تەگىن. قوناقتارعا قولايلى بولۋى ءۇشىن «حان شاتىر» سوو-دان «ەتنواۋىلعا» دەيىن ساعات 10.00-21.00 ارالىعىندا تەگىن اۆتوبۋستار قاتىنايدى.
