«اقپارات سالاسىنىڭ ۇزدىگى» توسبەلگىسىمەن ەڭبەكتە جوعارى ناتيجەلەرگە قول جەتكىزگەنى ءۇشىن قىزمەتى بويىنشا وڭ مىنەزدەمەسى بار, وزىنە جۇكتەلگەن مىندەتتەردى ادال ءارى جاۋاپتى ورىندايتىن اقپارات سالاسىنداعى قىزمەتكەرلەر ماراپاتتالادى.
قۋات اۋەسباي ەڭبەك جولىن «انا ءتىلى» رەسپۋبليكالىق گازەتىندە ءتىلشى بولىپ باستادى. «ايقىن» گازەتىنىڭ جامبىل وبلىسى بويىنشا مەنشىكتى ءتىلشىسى بولعان. ءار جىلدارى قر جەر رەسۋرستارىن باسقارۋ اگەنتتىگى مەمجەر عوو «باسپا جانە رەداكتسيالاۋ» ءبولىمىنىڭ مەڭگەرۋشىسى-«قازاقستان جەر رەسۋرستارى» جۋرنالىنىڭ باس رەداكتورى, «اق جەلكەن» رەسپۋبليكالىق جۋرنالى باس رەداكتورىنىڭ ورىنباسارى, رەسپۋبليكالىق «حالىق ءسوزى» قوعامدىق-ساياسي گازەتىنىڭ باس رەداكتورى بولىپ قىزمەت اتقاردى.
كەيىنگى جىلدارى قر پارلامەنتى سەناتى توراعاسىنىڭ حاتشىلىعىندا, قر ۇلتتىق مۋزەيىنىڭ جۇرتشىلىقپەن بايلانىس ءبولىمىنىڭ مەڭگەرۋشىسى, ەۋرازيالىق توپ جشس-نىڭ سىرتقى كورپوراتيۆتىك كوممۋنيكاتسيالار دەپارتامەنتىنىڭ ساراپشىسى, «اتىراۋ-اقپارات» جشس ديرەكتورىنىڭ ورىنباسارى, جامبىل وبلىستىق «اق جول» گازەتىنىڭ ديرەكتور-باس رەداكتورى بولدى.
«ەگەمەن قازاقستان» ۇجىمى اتىنان ارىپتەسىمىزدى جوعارى ماراپاتىمەن قۇتتىقتاپ, شىعارماشىلىق تابىس تىلەيمىز.
