فوتو: ۆيدەودان الىنعان كادر
بۇگىندە ۇيدەن تەك كۇيگەن قابىرعالار عانا قالعان. ىشىندە سىنعان ەسىكتەر, قالىڭ كۇيە مەن وتكىر ءتۇتىن ءيىسى ساقتالعان. وتكەن سەنبى كۇنى بولعان الاپات ءورت وتباسىنىڭ جالعىز باسپاناسىن جالماپ كەتكەن. بۇل ۇيدە تيمۋر مايرۋمباەۆ ەكى ۇلى جانە اكەسىمەن بىرگە تۇرعان.
تيمۋردىڭ اكەسى قۇرمان مايرۋمباەۆتىڭ ايتۋىنشا, جارىلىس كەنەتتەن بولعان. بالالار قۇرىلعىنى بولمەدە قۋات كوزىنە قوسقان ساتتە قاتتى دىبىس شىعىپ, ارتىنشا ءورت تۇتانعان. جالىن بىردەن جيھازعا تاراپ, قويۋ ءتۇتىن ءۇي ءىشىن باسىپ قالعان. تىنىس الۋ مۇمكىن بولماي, كوزگە ەشتەڭە كورىنبەگەن.
اقتوبە وبلىسى توتەنشە جاعدايلار دەپارتامەنىڭ مالىمەتىنشە, 28 اقپان كۇنى «ارمان» تۇرعىن الابىندا ورنالاسقان ءبىر قاباتتى جەكە ءۇيدىڭ شاتىرى ورتەنگەن. ءورت 20:02-دە وقشاۋلانىپ, 20:23-تە تولىق سوندىرىلگەن. ابىروي بولعاندا, زارداپ شەككەندەر مەن قۇرباندار جوق.
قۇجاتتار عانا امان قالعان. توتەنشە جاعدايدان كەيىن وتباسى تۋىستارىنىڭ ءۇيىن پانالاۋعا ءماجبۇر بولعان. قازىر ولار ۋاقىتشا باسپانا ىزدەستىرىپ جاتىر. التى جىل بويى ءوز قولىمەن تۇرعىزعان ءۇيدى ەندى قايتادان سالۋعا تۋرا كەلەدى.
ءوزى قۇرىلىسشى تيمۋر مايرۋمباەۆ قازىرگى تاڭدا قۇرىلىس ماتەريالدارىنا مۇقتاج ەكەنىن ايتادى. كۇن جىلىنا سالىسىمەن, ءۇيدى قالپىنا كەلتىرۋ جۇمىستارىنا كىرىسپەك.
