فوتو: Kazpravda.kz/ادىلبەك تاۋەكەلوۆ
28 اقپان كۇنى يراننىڭ ميناب قالاسىندا مەكتەپكە جاسالعان سوققى سالدارىنان 150-دەن استام وقۋشى قىز قازا تاپتى. 95 ادام جاراقات الدى. اينا مۋسراليموۆا قازاق حالقى جانتۇرشىگەرلىك وقيعانى تەرەڭ كۇيزەلىسپەن قابىلداعانىن جەتكىزدى.
«بۇل جاي عانا ستاتيستيكا ەمەس. سانداردىڭ ارتىندا ۇزىلگەن ءومىر, وتباسىلاردىڭ كۇيرەگەن تاعدىرلارى, ورىندالماعان ارمان-ۇمىتتەر تۇر. جۇزدەگەن وتباسى ءبىر ساتتە سۇيىكتى قىزدارىنان, اپكە-قارىنداستارىنان, نەمەرەلەرىنەن ايىرىلدى. قارا پوليەتيلەن قاپتارعا سالىنعان كىشكەنتاي دەنەلەر تۋرالى بەينەجازبالار بۇكىل الەمگە تارادى. قازا تاپقان بالالاردىڭ تۋىستارى تراگەديا ورنىنان ولاردىڭ سومكەلەرى مەن كىتاپتارىن, جەكە زاتتارىن جيناپ جاتقان ساتتەردى كوز جاسسىز ءارى مۇنداي قايعىعا جول بەرگەن ەرەسەكتەر ءۇشىن ۇيات سەزىمىنسىز كورۋ مۇمكىن ەمەس», دەدى دەپۋتات.
ول بالالاردىڭ قاقتىعىس كەزىندە قازا تابۋى حالىقارالىق قۇقىقتىڭ ىرگەلى قاعيداتتارىنىڭ ساقتالماۋىن اڭعارتاتىنىن تىلگە تيەك ەتىپ, قازاقستان اردايىم كەز كەلگەن حالىقارالىق قاقتىعىستى بەيبىت جولمەن رەتتەۋدى قولدايتىنىن اتاپ ءوتتى.
«تەگەران ەندى بۇرىنعىداي بولمايدى»: يزرايل مەن اقش يرانعا سوققى جاسادى
«قازاقستان ارقاشان بەيبىتشىلىك, كەلىسىم جانە باقىتتى بالالىق شاق قاعيداتتارىن ىلگەرىلەتەدى. ءبىز زارداپ شەككەن وتباسىلارعا قايعىرا كوڭىل ايتىپ, بارلىق ماسەلەنىڭ تەزىرەك شەشىلۋىنە ءۇمىت بىلدىرەمىز. قايعىعا قاتىستى قولداۋ سوزدەرىن وقۋ-اعارتۋ ءمينيسترى جۇلدىز سۇلەيمەنوۆا جانە قازاقستانداعى بالا قۇقىقتارى جونىندەگى ۋاكىل دينارا زاكيەۆا ءبىلدىردى. ارىپتەستەرىم بۇل قاسىرەتتى جاعدايعا قاتتى كۇيزەلىپ, قاقتىعىس تاراپتارىن كەلىسسوزدەرگە جانە بەيبىتشىلىكتى قالپىنا كەلتىرۋگە شاقىردى. قازاقستاندى يران, يزرايل جانە اقش ەلدەرىمەن ۇزاق جىلعى ارىپتەستىك تاريحى بايلانىستىرادى. قاقتىعىسقا قاتىسۋشى تاراپتاردى پاراساتتىلىق تانىتىپ, بالالار مەن انالاردىڭ, ولاردىڭ ءومىرىنىڭ اماندىعى ءۇشىن بەيبىت كەلىسسوزدەردى مۇمكىندىگىنشە تەزىرەك باستاۋعا شاقىرامىز», دەدى اينا مۋسراليموۆا.
