ءوز سوزىندە ول بانك سەكتورىن جۇيەلى تۇردە جاڭعىرتۋ اياقتالعاننان كەيىن مەملەكەتتىك ساياساتتىڭ نەگىزگى باسىمدىعى ەكونوميكاعا ۇزاق مەرزىمدى ينۆەستيتسيالار تارتۋدىڭ باستى كوزى رەتىندە قور نارىعىن دامىتۋعا اۋىساتىنىن اتاپ ءوتتى.
نۇرجان تۇرسىنحانوۆتىڭ ايتۋىنشا, مەملەكەت باسشىسى باعالى قاعازدار نارىعى تۋرالى زاڭنامانى حالىقارالىق وزىق تاجىريبەلەر مەن قازىرگى ەكونوميكانىڭ سۇرانىسىنا ساي كەشەندى تۇردە قايتا قاراۋ مىندەتىن جۇكتەگەن. وسىعان بايلانىستى اگەنتتىك ۇلتتىق بانكپەن بىرلەسىپ قور نارىعىن دامىتۋدىڭ 2030 جىلعا دەيىنگى باعدارلاماسىن جانە «باعالى قاعازدار نارىعى تۋرالى» جاڭا زاڭ جوباسىن ازىرلەۋدى باستاماق.
ساقتاندىرۋ جانە قور نارىعىن دامىتۋدىڭ باعدارلاماسى ازىرلەنەدى
جاڭا زاڭنىڭ باستى ماقساتى – كاپيتالدى ەكونوميكانىڭ ناقتى سەكتورىنا ءتيىمدى باعىتتاي الاتىن يكەمدى ءارى تۇراقتى نارىقتىق ەكوجۇيە قالىپتاستىرۋ. بۇل جۇمىس جەتى ستراتەگيالىق باعىت بويىنشا جۇزەگە اسىرىلادى. اتاپ ايتقاندا:
-
ينستيتۋتسيونالدىق, بولشەك جانە شەتەلدىك ينۆەستورلار ەسەبىنەن ينۆەستورلىق بازانى كەڭەيتۋ;
-
جەكە سەكتور كومپانيالارىن قور نارىعىنا شىعۋعا ىنتالاندىرۋ;
-
نارىق ينفراقۇرىلىمىن جەتىلدىرۋ;
-
جاھاندىق كاپيتال نارىقتارىمەن ىقپالداستىقتى ارتتىرۋ;
-
جاڭا قارجى قۇرالدارى مەن يننوۆاتسيالاردى ەنگىزۋ;
-
كورپوراتيۆتىك باسقارۋدى دامىتۋ;
-
رەتتەۋ مودەلىن كەشەندى جاڭارتۋ.
سونداي-اق حالىقارالىق كاپيتال نارىقتارىنا ينتەگراتسيانى تەرەڭدەتۋ, قاداعالاۋدىڭ تاۋەكەلگە باعدارلانعان ءارى يكەمدى مودەلىنە كوشۋ جوسپارلانىپ وتىر. بۇل شارالار قور نارىعىن رەتتەۋدىڭ تيىمدىلىگىن ارتتىرىپ, يننوۆاتسيالىق باستامالارعا قولايلى ورتا قالىپتاستىرۋعا مۇمكىندىك بەرەدى.
بۇدان بولەك, جەتەكشى حالىقارالىق جانە وتاندىق ساراپشىلاردىڭ قاتىسۋىمەن قولدانىستاعى زاڭناماعا تالداۋ جاسالىپ, باعالى قاعازدار نارىعىن رەتتەۋدىڭ بىرىڭعاي ءارى جۇيەلى ءتاسىلى قالىپتاستىرىلادى. ىشكى قور نارىعى مەن استانا حالىقارالىق قارجى ورتالىعى اراسىنداعى ءوزارا ىقپالداستىقتى كۇشەيتۋ, سونداي-اق قازاقستان قور بيرجاسى (KASE) وكىلەتتىكتەرىن كەڭەيتۋ جانە جۇيەلىك تاۋەكەلدەردى باعالاۋ تەتىكتەرىن جەتىلدىرۋ دە نەگىزگى باسىمدىقتاردىڭ قاتارىندا.
ۇلتتىق بانك: بيزنەس رۋبل مەن دوللاردىڭ اۋىتقۋىنا تاۋەلدىلىكتى تومەندەتەدى
قور نارىعىن دامىتۋدىڭ 2030 جىلعا دەيىنگى باعدارلاماسىن 2026 جىلدىڭ قىركۇيەگىنە دەيىن ازىرلەۋ كوزدەلسە, «باعالى قاعازدار نارىعى تۋرالى» جاڭا زاڭ جوباسى بيىلعى جىلدىڭ سوڭىنا دەيىن دايىن بولادى.
