5 قىز, 1 ۇلدى ومىرگە الىپ كەلگەن ايمان ابدىرازاققىزى, “بالالارىم ءتاجىحان مەن ساۋلە اپالارىنىڭ جانە يمانبەك اتاسىنىڭ ارقاسىندا ءوسىپ جاتىر. ساۋلە اپام مەن يمانبەك اتام بۇگىندە التى نەمەرە ءسۇيىپ وتىرسا, ءتاجىحان اپام التى شوبەرەسىنىڭ قىزىعىن كورۋدە” – دەيدى.
جاڭا جىلدىڭ الدىندا قازاقستان رەسپۋبليكاسىنىڭ كەيبىر زاڭنامالىق اكتىلەرىنە ازاماتتاردىڭ جەكەلەگەن ساناتتارىن الەۋمەتتىك قولداۋ ماسەلەلەرى بويىنشا وزگەرىستەر مەن تولىقتىرۋلار ەنگىزىلگەن بولاتىن. ياعني, 2010 جىلدان باستاپ كۇشىنە ەنەتىن زاڭ جوبالارى ەلىمىزدىڭ تۇرعىندارىنا ۇلكەن جەڭىلدىكتەر بەرىپ وتىر. بۇرىنعى زاڭ بويىنشا بالالارى سەگىزدەن اسقان انالار “كۇمىس القانىڭ”, وننان جوعارى بولسا “التىن القانىڭ” يەسى اتاناتىن. جاڭا جىلدان باستاپ كۇشىنە ەنگەن زاڭعا سايكەس 2010 جىلدىڭ 1 قاڭتارىنان التى بالاسى بار انالار “كۇمىس القا”, جەتى نەمەسە ودان كوپ بالاسى بار انالار “التىن القا” الاتىن بولادى. بۇل جونىندە قالا اكىمدىگى جانىنان قۇرىلعان زاڭ جوباسىن ناسيحاتتاۋ توبى قالامىزدا جانە قالاعا قاراستى اۋىلداردا “التىن القا” جانە “كۇمىس القا” توسبەلگىلەرىنىڭ بەرىلۋ جولدارى جونىندە ءتۇسىندىرۋ جۇمىستارىن جۇرگىزدى. بۇگىندە ارنايى قۇرىلعان جۇمىس توبى ماراپاتقا لايىقتى انالاردىڭ ءتىزىمىن الىپ, قۇجاتتار قابىلداپ جاتىر.
29 جاستاعى, ياعني 1981 جىلى تۋىلعان جۇزتاەۆا ايمان ءابدىرازاققىزى قالا اكىمدىگىنىڭ جانىنداعى ارنايى قۇرىلعان جۇمىس توبىنا “كۇمىس القا” ماراپاتىن الۋعا ءوز قۇجاتتارىن تاپسىرعان. بۇگىندە قالالىق اكىمدىكتىڭ ۇيىمداستىرۋ جانە ماماندار ءبولىمىنىڭ باس مامانى عاليا تونتەكوۆا ايمان ءابدىرازاققىزىنىڭ ماراپاتقا لايىقتى ەكەندىگىن ءسوز ەتىپ, الداعى ۋاقىتتا “كۇمىس القا” تاعاتىنىن ايتىپ وتىر.
جۇزتاەۆا ايمان قالاداعى ب.مومىش ۇلى اتىنداعى №12 مەكتەپتە ءبىلىم العان. قازىرگى كەزدە التى بالانىڭ اناسى. العاشقى قىزى بەكتاسوۆا ايجاننىڭ جاسى توعىزدا. ول ءال-فارابي اتىنداعى №14 مەكتەپتىڭ 4 سىنىبىندا وقيدى. ال سىمبات جەتىگە كەلسە, جالعاسبەكتىڭ جاسى بەستە. ۇشكە كەلگەن نازەركە قىزىقتى قىلىعىمەن اتاسى مەن اجەسىن كۇلدىرىپ جۇرسە, بىرگە تولعان ەگىز قىزدار ءمولدىر مەن ءجاۋدىر قاز-قاز باسىپ ءجۇر.
5 قىز, 1 ۇلدى ومىرگە الىپ كەلگەن ايمان ابدىرازاققىزى, “بالالارىم ءتاجىحان مەن ساۋلە اپالارىنىڭ جانە يمانبەك اتاسىنىڭ ارقاسىندا ءوسىپ جاتىر. ساۋلە اپام مەن يمانبەك اتام بۇگىندە التى نەمەرە ءسۇيىپ وتىرسا, ءتاجىحان اپام التى شوبەرەسىنىڭ قىزىعىن كورۋدە” – دەيدى.
ايماننىڭ جولداسى تاكسيست بولىپ جۇمىس ىستەيدى. ء“ار بالانىڭ ءوز نەسىبەسى بار” – دەپ سانايتىن وتباسى مۇشەلەرى ايمانعا “ ۇلىڭا سەرىك كەرەك” دەپ قولقا سالىپ وتىرعان كورىنەدى. ال ايمان بولسا, بۇل ۇسىنىسقا قارسى ەمەس.
ەلباسىمىزدىڭ قولداۋىمەن ءجۇزەگە اسىپ وتىرعان بۇل باستامانى مەملەكەت باسشىسىنىڭ قامقورلىعى دەپ باعالاعان ايمان ءابدىرازاققىزى, ەلباسىنا ريزاشىلىعىن ءبىلدىرىپ, العىسىن ايتۋدا.
مىنە, قازىرگى كەزدە ءارتۇرلى سىلتاۋلارمەن بالا سانىن ءبىر-ەكىمەن عانا شەكتەپ قوياتىن كەيبىر انالار ايماننان ۇلگى السا ەكەن دەيمىز.
قايرات زاينيشەۆ, كەنتاۋ.
بارەكەلدى!
ابايتانۋ: ايرىقشا ارنالار
مارحابات بايعۇت.
وتكەن جىلعى كۇزدىڭ جايماشۋاق ءبىر كۇنىندە شىمكەنت شاھارىنداعى “حاكىم اباي مۋزەيىنىڭ” الدىندا “حاكىم اباي تاعىلىمدارى” اتتى كونفەرەنتسيا ۇيىمداستىرىلعانىن “ەگەمەن قازاقستان” گازەتى جازعان بولاتىن. سول كونفەرەنتسياعا مەكەمتاس مىرزاحمەت ۇلى, شەرحان مۇرتازا, ومىربەك بايگەلدى, مىرزاتاي جولداسبەكوۆ, توكەن يبراگيموۆ, ءسابيت ورازباەۆ سىندى ساڭلاقتار قاتىسقان.
بۇكىل ءومىرىن ابايتانۋعا ارناپ كەلە جاتقان ءبىلىمپاز عالىم, اباي اتىنداعى ۇلتتىق پەداگوگيكالىق ۋنيۆەرسيتەتى ابايتانۋ عىلىمي-زەرتتەۋ ورتالىعىنىڭ ديرەكتورى مەكەمتاس مىرزاحمەت ۇلى ەلدى ەلەڭ ەتكىزگەن. ابايتانۋدىڭ تىڭ تۇجىرىمداماسىن تۇسىندىرگەن. دانىشپان اقىننىڭ حاكىمدىگىن تەرەڭدەي تانىپ-بىلمەكتىڭ, مۇرالارىن مەڭگەرمەكتىڭ, اينالىمعا تۇسىرمەكتىڭ جاڭاشا جۇيەلەرىن ۇعىندىرعان.
پرەزيدەنتتىك مادەنيەت ورتالىعىنىڭ ديرەكتورى, قايراتكەر-قالامگەر مىرزاتاي جولداسبەكوۆ اباي قالدىرعان قازىناعا قاراپ وتىرىپ, وقىپ وتىرىپ, ويلاپ وتىرىپ, قالايشا قايران قالاتىنىن مۇقاعاليداي قۇبىلىسپەن بايلانىستىرا ماعلۇمداپ, كوپشىلىكتى ودان سايىن تاڭىرقاتقان. ءسويتىپ, وڭتۇستىكتەگى وڭدى ىستەردىڭ قاتارىن رۋحاني سالاداعى سەرپىلىستەرمەن نىعايتا تۇسپەك جونىندە ۇتىرلى ۇسىنىس بىلدىرگەن. “حاكىم اباي مۋزەيى” شىمكەنتتىڭ اباي ساياباعىندا ەڭسە كوتەرىپ, مىناداي ءمانىستى باسقوسۋ جاساپ جاتىرمىز. ەندى مۇحتار اۋەزوۆ اتىنداعى وڭتۇستىك قازاقستان ۋنيۆەرسيتەتىندە ابايتانۋ كافەدراسىن نەمەسە ابايتانۋ ورتالىعىن اشۋ كەرەكتىگى وزىنەن-ءوزى سۇرانىپ تۇر ەمەس پە؟ ءۋاليحان, سەن بۇعان قالاي قارايسىڭ؟” – دەپ, وسىناۋ وقۋ ورنىنىڭ رەكتورى, ۋ.بيشىمباەۆ مىرزاعا قاراعان.
مىنەكيىڭىز, سودان بەرى ءۇش ايدان ءسال عانا استام ۋاقىت ءوتتى. م.اۋەزوۆ اتىنداعى وقمۋ-دا ابايتانۋ عىلىمي وقۋ ورتالىعى اشىلدى. ونىڭ ديرەكتورى بولىپ فيلولوگيا عىلىمدارىنىڭ كانديداتى ساتتار ومىرزاقوۆ تاعايىندالدى. جىگەرلى, جاس عالىم ءا دەگەننەن-اق تالپىنىسىن, تالاپشىلدىعىن تانىتتى. وقمۋ ستۋدەنتتەرى ەكىنشى وقۋ سەمەسترىن ابايتانۋدىڭ ايرىقشا ارنالارىنا ارنالعان ءدارىسپەن باستادى. ابايتانۋشى مەكەمتاس مىرزاحمەت ۇلى جۇرگىزگەن بۇل دارىسكە تەك ستۋدەنتتەر عانا ەمەس, وسى ۋنيۆەرسيتەتتىڭ, شىمكەنتتەگى وزگە دە وقۋ ورىندارىنىڭ وقىتۋشىلارى, اقىن-جازۋشىلار, زيالى قاۋىم وكىلدەرى قىزىعا قاتىستى.
مەكەمتاس اعامىز قازان ايىندا, “حاكىم اباي مۋزەيى” الدىندا وتكەن كونفەرەنتسيادا ورتاعا سالعان ابايتانۋدىڭ تىڭ تۇجىرىمداماسىن, جاڭاشا جۇيەلەرىن تەرەڭدەتە, اسەرلى اڭگىمەلەدى. تۇران جەرىندە تۋىنداپ جەتىلگەن جاۋانمارتلىك ءىلىمىنىڭ, تولىق ادام ءىلىمى باستاۋ-بۇلاقتارىنىڭ قاينار كوزدەرىن اشىپ, سۋسىنداتقانداي بولدى. قورقىت ابىز, قوجا احمەت ياساۋي, ءال-فارابي, ءجۇسىپ حاس حادجيپ, ءجۇسىپ بالاساعۇندار عاسىرلار قويناۋلارىنان سىر شەرتكەندەي. ابايداعى يمانيگۇل نەمەسە ءۇش ءسۇيۋ ماسەلەسىنىڭ ءمانى, اباي نەگىزىن سالعان تولىق ادام ءىلىمىن دامىتۋداعى ءشاكارىم ويلارىنىڭ ورنى, اقىل, ادىلەت, راقىم سىندى ءۇش قاسيەتتىڭ كۇردەلىلىگى, جۇرەك پەن جاۋانمارتلىك (حال) جايىنداعى باياندارى بارشانى باۋرادى. “جان ازىعىن اياقاستى ەتۋدەن ءتان قۇمارى ۇستەم ءتۇسىپ وتىرعانىن, ادامدىقتى ناداندىق, ءدىلدى دۇنيەقۇمارلىق باسىپ, تۇنشىقتىرىپ بارا جاتقانىن كورىپ-ءبىلىپ ءجۇرمىز. بۇدان ارىلۋدىڭ جولى – رۋحاني تازارۋ جولى. رۋحاني تازارۋ جولى – ابايدىڭ تولىق ادام ءىلىمىن ارنايى كۋرستار, سەمينارلار ارقىلى مەكتەپ پەن جوعارى وقۋ ورنىندا ايرىقشالاپ, جۇيەلەپ, جاڭاشالاپ جاپپاي وقىتۋ, جاستار ساناسىنا سەرگەك ءسىڭىرۋ”, – دەدى عۇلاما عالىم.
“پاراساتتى جاستار” بايقاۋى
ءنازيرا جارىمبەتوۆا.
ا.بايتۇرسىنوۆ اتىنداعى قوستاناي مەملەكەتتىك ۋنيۆەرسيتەتى بيىل ءبىرىنشى رەت ستۋدەنتتەردىڭ “پاراساتتى جاستار-2010” اتتى كونكۋرسىن ۇيىمداستىردى. وندا ستۋدەنتتەر جاساعان يننوۆاتسيالىق بيزنەس-جوبالار تالقىعا ءتۇستى. بايقاۋدىڭ ەكىنشى شەشۋشى تۋرىنا وتكەن ون بەس جۇمىس قۇرامىنا وبلىسقا بەلگىلى كاسىپكەرلەر, بانك باس- شىلارى, قوعامدىق كاسىپكەرلىك, ەكونوميكالىق ۇيىمدار جەتەكشىلەرى, دەپۋتاتتار, بيلىك وكىلدەرى كىرگەن بەدەلدى كوميسسيا قۇزىرىنا بەرىلدى.
كوميسسيا مۇشەلەرى الدىمەن ستۋدەنتتەردىڭ جۇمىستارى يننوۆاتسيالىق جانە شىعارماشىلىق سيپاتقا يە دەگەن باعا بەردى. قازىلاردىڭ كاسىبي دەڭگەيدەگى سۇزگىسىنەن وتكەن وسى ون بەس جۇمىستىڭ بەسەۋى العاشقى ستۋدەنتتەر كونكۋرسىنىڭ جەڭىمپازى دەپ تانىلدى. ولاردىڭ اراسىندا ستۋدەنتتەر قۇرىلىسقا كەتەتىن تسەمەنت شىعىنىن ازايتۋ تەحنولوگياسىن, اۋىل شارۋاشىلىعى داقىلدارىن ساتۋدىڭ ەلەكتروندىق الاڭىن ۇيىمداستىرۋدى, تازالىق قاعازىن شىعاراتىن شاعىن زاۋىت سالۋدى, باسەكەگە قابىلەتتى جاستاردىڭ تۇلعالىق الەۋەتىن دامىتۋ تەحنولوگياسىن جاساۋدى كوتەرەدى. كوميسسيا مۇشەلەرى جوبالاردىڭ كەيبىرىن قارجىلاندىرۋ قازىردەن-اق باستالۋى كەرەكتىگىن دە ايتتى.
“پاراساتتى جاستار” ستۋدەنتتەردىڭ يننوۆاتسيالىق جوبالارى بايقاۋى الداعى جىلى جالعاسىن تابادى جانە ول تەك قوستاناي ۋنيۆەرسيتەتى ەمەس, وبلىستاعى باسقا دا جوعارى وقۋ ورىندارىن قامتيتىن بولادى.
قوستاناي.
سوڭعى جاڭالىقتار
ەرتەڭ ەلىمىزدىڭ بىرقاتار وڭىرىندە ءتۇمان ءتۇسىپ, بوران سوعادى
اۋا رايى • كەشە
ءجۇرسىن ەرمان: جاڭا كونستيتۋتسيا – ەلدىڭ, حالىقتىڭ ءۇمىتى
اتا زاڭ • كەشە
كونستيتۋتسيالىق رەفورماعا كوزقاراس: قوعامنىڭ پىكىرى قانداي؟
اتا زاڭ • كەشە
