ەسكەرتكىش تاقتا م.اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ ۇجىمى مەن الماتى قالالىق اكىمدىگىنىڭ مۇرىندىق بولۋىمەن اشىلدى. ەسكەرتكىش تاقتانىڭ بەتىندەگى شىمىلدىقتى فاريدا ءشارىپوۆانىڭ ساحنالاس ارىپتەستەرى, ومىرلىك دوستارى قازاقستاننىڭ ەڭبەك ەرى, كسرو حالىق ءارتىسى ءاسانالى ءاشىموۆ پەن قازاقستاننىڭ حالىق ءارتىسى, مەملەكەتتىك سىيلىقتىڭ لاۋرەاتى ءسابيت ورازباەۆ ءتۇردى.
– بۇگىن فاريداعا ەسكەرتكىش تاقتا اشىپ جاتىرمىز. قاپتالداس تۇرعان قوس ۇيدە ەكەۋمىز تالاي جىل كورشى بولدىق. فاريدامەن ستۋدەنت كەزىمىزدەن باستاپ كوپتەگەن سپەكتاكلدەردە سەرىكتەسىپ بىرگە وينادىق. بۇل ومىردەن وتكەنشە دوستىعىمىزعا قىلاۋ تۇسپەي, ادەمى جاراسىمىن تاپتى. فاريدا تاربيەسىمەن, تارتىبىمەن جاستارعا ۇلگى-ونەگە بولعان تالانتتى اكتريسا. بۇل ومىردە ماڭگىلىك ەشكىم جوق. فاريدانى ەرتە كەتتى دەپ ەسەپتەيمىز. ءالى ءبىراز رولدەر سومدايتىن مۇمكىندىگى بار ەدى. بىراق تاعدىرى سولاي بولدى. مەملەكەتتىك سىيلىقتىڭ لاۋرەاتى, كەڭەس وداعىنىڭ حالىق ارتىسىنە ەندى قالا اكىمدىگى الماتى كوشەلەرىنىڭ بىرىنە فاريدانىڭ ەسىمىن بەرۋى كەرەك. توپىراعى تورقا بولسىن! – دەدى كسرو حالىق ءارتىسى, تەاتردىڭ كوركەمدىك جەتەكشىسى ءاسانالى ءاشىموۆ.
فاريدا ءشارىپوۆا جارتى عاسىردان استام ۋاقىت بويى م.اۋەزوۆ اتىنداعى قازاق اكادەميالىق دراما تەاترىندا ۇزدىكسىز ونەر كورسەتتى. ساحنادا قازاق جانە الەم كلاسسيكتەرىنىڭ درامالىق تۋىندىلارىندا, وسى زامانعى قويىلىمداردا باستى رولدەردى شەبەرلىكپەن ورىنداپ, ۇلتتىق
تەاتر ونەرىنىڭ جاڭا ساپالىق بيىككە كوتەرىلۋىنە ۇلكەن ۇلەس قوستى.
– وكىنىشتىسى, فاريدا اپايدى قازىرگى جاستار بىلمەۋى مۇمكىن. التىن داۋىس يەسى ەدى عوي! رەجيسسەر ابدوللا قارساقباەۆتىڭ «مەنىڭ اتىم قوجا» اتتى كينوسىن بارشامىز جاقسى بىلەمىز. وسى فيلمدەگى قوجانىڭ داۋى-
سىن فاريدا اپاي ورىندايدى. مىنە, قاراڭىز, سودان-اق ونىڭ قانداي تالانتتى اكتريسا بولعانىن باعامداۋعا بولادى. فاريدا اپايمەن ساحنادا بىرگە ونەر كورسەتۋ ءبىز ءۇشىن ۇلكەن ماقتانىش بولاتىن. «عاشىقسىز عاسىر» دەگەن سپەكتاكلدە ول كىسى باستى رولدە وينادى. ال مەن ونىڭ دوسىن وينادىم. فاريدا اپايمەن ساحنالاس بولۋ وتە قيىن. ول كىسى جاي عانا كوز تاستاعاندا, كوزىنە قاراۋ مۇمكىن ەمەس ەدى! ىشكى قۋاتى عاجاپ بولاتىن. ساحنادا قاتار تۇرعاندا ىشتەي دىرىلدەپ تۇراتىن كۇندەرىمدى ءالى ۇمىتا قويعان جوقپىن. بىراق ءبارىبىر ول كىسىمەن ساحنادا بىرگە ويناۋ باقىت بولاتىن. قازاقتىڭ تالانتتى قىزىن ەسكە الىپ, ۇيىنە بەلگى تاقتا ورناتىلىپ جاتقانىنا وتە قۋانىپ تۇرمىن. بۇل ءۇشىن تەاتر ۇجىمىنا جانە قالانىڭ اكىمدىگىنە راحمەت ايتقىم كەلەدى, – دەيدى قازاقستاننىڭ ەڭبەك سىڭىرگەن ءارتىسى, «قۇرمەت» وردەنىنىڭ يەگەرى عازيزا ابدىنابيەۆا.
فاريدا ءشارىپوۆا كينو سالاسىندا دا جەمىستى ەڭبەك ەتتى. ول ايگىلى رەجيسسەرلەر شاكەن ايمانوۆ, ءماجيت بەگالين, سۇلتان قوجىقوۆ, ءازىربايجان مامبەتوۆ, لەونيد اگرانوۆيچ تۇسىرگەن كوپتەگەن تانىمال فيلمدەردە وينادى. دۋبلياج سالاسىنا دا كوپ ەڭبەك ءسىڭىردى.
فاريدا ءشارىپوۆا ونەرلى جاستاردى تاربيەلەۋ ىسىنە جەتە كوڭىل ءبولدى. ت.جۇرگەنوۆ اتىنداعى ونەر اكادەمياسىندا كورنەكتى اكتەر ى.نوعايباەۆ ەكەۋىنىڭ شىعارماشىلىق شەبەرحاناسىندا شىڭدالعان جاستار بۇگىندە ەلىمىزدىڭ تەاترلارىندا جەمىستى ەڭبەك ەتىپ ءجۇر. ەسكەرتكىش تاقتانىڭ اشىلۋ سالتاناتىندا فاريدا ءشارىپوۆانىڭ تۇرعان پاتەرىندە ۇرپاقتارى داستارقان جايىپ, مارقۇمنىڭ ارۋاعىنا قۇران باعىشتادى.
ايگۇل احانبايقىزى,
«ەگەمەن قازاقستان»
