بۇل ماجىلىسكە باتىس قازاقستان وبلىستىق سوتىنىڭ القا توراعاسى, وبلىستىق سوت سۋديالارى, اۋداندىق جانە ولارعا تەڭەستىرىلگەن سوتتاردىڭ توراعالارى قاتىسقان بولاتىن. وبلىستىق سوتتىڭ القا توراعاسى قايرات ادرانوۆ جيىن باسىندا قازىرگى قازاقستاننىڭ سوت جۇيەسى مەن بۇرىنعى ءداستۇرلى قازاق قوعامىنىڭ سوت تورەلىگى اراسىندا ۇقساستىق بارىن, بيلەر سوتى داۋلاردى شەشۋ كەزىندە تاتۋلاستىرۋ راسىمدەرىنە باسا ءمان بەرگەنىن ايتىپ ءوتتى. ەكى جاقتىڭ داۋ الدىندا ىمىراعا كەلۋىن قازىردە مەدياتسيا دەپ اتاپ ءجۇرمىز.
- كوشپەلى قازاق قوعامىنداعى بيلەر كەڭەسى – مەملەكەتتىك ماڭىزدى ماسەلەلەردى شەشكەن ماڭىزدى ورگاننىڭ ءبىرى بولدى. ەگەر بيلەر كەڭەسىنىڭ قالىپتاسۋى مەن دامۋى تاريحىنا تەرەڭ ۇڭىلەتىن بولساق, بۇل جۇيە ەجەلگى كوشپەلى دالاداعى ءداستۇردىڭ جالعاسى ەكەندىگىن كورەمىز. بيلەر تەك جەكە داۋلار بويىنشا شەشىم شىعارىپ قويعان جوق. ولار مامىلەگەر, باسقارۋشى, ايىپتاۋشى جانە قورعاۋشى رەتىندە دە ادىلدىك ورناتتى, ول ۇكىمنىڭ دۇرىستىعىنا كوپشىلىك كۇمان كەلتىرمەدى, - دەيدى وبلىستىق سوتتىڭ سۋدياسى ەسەنباي بورانباەۆ.
جينالىس ناتيجەسىندە وبلىستىق سوت توراعاسى بەك امەتوۆ اۋداندىق سوتتارعا اۋىلدىڭ اقىلدى ءارى سىيلى اقساقالدارىنان تۇراتىن بيلەر كەڭەستەرىن قۇرۋدى تاپسىردى. ال قايرات ادرانوۆ «مەدياتسيا تۋرالى» قر زاڭىن باسشىلىققا الا وتىرىپ, ءار اۋداندا بيلەردى سايلاۋدىڭ ورتاق ەرەجەسىن ازىرلەۋدى جانە ولاردى دەلدال رەتىندە ۇسىنۋ ماسەلەسىن كوتەردى. جيىن سوڭىندا اتالعان ماسەلەلەر بويىنشا ناقتى نۇسقاۋلار بەرىلدى. بۇل نۇسقاۋلاردىڭ ورىندالۋى اۋداندىق جانە تەڭ سوتتاردىڭ توراعالارىنا تاپسىرىلدى. ال وبلىستىق سوت سۋدياسى ەسەنباي بورانباەۆ وڭىردەگى بي كەڭەسىن قۇرۋ جونىندەگى ۇيلەستىرۋشى بولىپ تاعايىندالدى.
قازبەك قۇتتىمۇرات ۇلى
«ەگەمەن قازاقستان»
باتىس قازاقستان
